Kowane ‘Dan Majalisa Zai Samu N150m a Rabon N54bn da Za Ayi Domin Yin Ayyuka
- Fiye da Naira biliyan 50 za a batar a majalisar wakilan tarayya domin a aiwatar da kwangiloli a 2023
- Kowane ‘dan majalisa zai tashi da Naira miliyan 150 da za ayi amfani da ita ayi a bunkasa mazabarsa
- Daga cikin ayyukan ‘yan majalisar Najeriya akwai yin dokoki, sa ido a gwamnati da gudanar da ayyuka
Abuja - ‘Yan majalisar wakilan tarayya a Najeriya za su samu jimillar Naira biliyan 54 domin su gudanar da ayyukan mazabu a fadin kasar nan.
A rahoton da Punch ta fitar dazu, an ji yadda kowane ‘dan majalisar wakilai zai samu Naira miliyan 150 domin ya kai ayyuka a inda yake wakilta.
‘Yan majalisar da su ka yi magana ba tare da sun bari an kama sunayensu ba, sun tabbatar da doka ta ba su damar kai kwangiloli a mazabunsu.
Asali: Twitter
Kudin da 'yan majalisa su ke tashi da su
A dokar kasa da tsarin mulki, za a iya ware wani katafaren aiki a mazaba ko shiyyar ‘dan majalisa, wanda zai taba rayuwar wadanda yake wakilta.
DUBA: Shigo shafin Legit.ng na manhajar Legit.ng na Telegram! Kada ka bari komai ya wuce ka
Ana warewa Sanatoci da ‘yan majalisar wakilai wannan kudi a ma’aikatun gwamnatin tarayya bayan irin dawainiyar da ake yi da su.
Haka zalika ‘yan majalisar dokokin da ke jihohi su na samun kudin da za su yi wannan aiki a karkashin kasafin kudin ma’aikatun jihohinsu.
Talakawa su na cikin ha'ula'i
Idan an gama kwangilar, za a samu ya na da dauke da sunan ‘dan majalisar da ya yi sanadiyyar gudanar da aikin, hakan ya bude kofar badakala.
A lokacin da talakawa su ke kuka da tsadar rayuwa, rahoton ya ce gwamnati mai-ci ta kara adadin kudin da ake warewa ‘yan majalisa da N50m a yanzu.
Idan ‘dan majalisa zai samu N150m, babu mamaki kudin da Sanatoci za su samu ya karu sosai a kasar da mata su ke lalata domin su samu na abinci.
Ba yau aka fara wannan aiki ba
A majalisar da Femi Gbajabiamila ya jagoranta tsakanin 2019 da 2023, Honarabul Kwamoti Laori ya tona yadda ake warewa kowane ‘dan majalisa kudi.
Laori mai wakiltar Numan/Demsa/Lamurde ya taba cewa kowanensu ya na samun N100m da zai iya yi wa mutanensa ayyuka a mazabun da yake wakilta.
A wancan lokaci, ‘dan majalisar kasar ya koka da cewa ana samun matsala wajen kasafi, a karshe yake cewa ayyukan da ake yi ba su wuce na N80m.
Asali: Legit.ng
