Kano: 'Yan Kasuwa Sun Tafka Asara Yayin da Ruwan Sama Ya Mamaye Kasuwar Kantin Kwari
- Gagarumar ambaliyar ruwa ta faru sakamakon mamakon ruwan sama da aka yi a ranakun Lahadi da Litinin a kwaryar birnin Kano
- 'Yan kasuwar sutturu na Kantin Kwari na cigaba da kirga asara yayin da ambaliyar ruwa ta lalata kayan sama da N200 miliyan
- An gano cewa, shaguna da rumfunan 'yan kasuwa sama da 250 ne suka salwanta inda ambaliyar ruwan har ofishin SEMA ta hada da
Kano - Masu sana'ar sutturu a fitacciyar kasuwar Kantin Kwari suna cigaba da kirga asara bayan gagarumar ambaliyar ruwa ta lalata kayan sama da N200 miliyan a sama da shaguna 250 da rumfuna.
Wannan ya faru ne sakamakon mamakon ruwan sama da aka yi a ranakun Lahadi da Litinin a kusan dukkan yankunan birnin Kano wanda ya kawo ambaliyar ruwa har a ofishin hukumar taimakon gaggawa ta jihar, SEMA.
Asali: UGC
An kwashe sama da sa'o'i hudu ana zabga ruwan sama a kwaryar birnin a ranar Litinin, Daily Trust ta lura cewa manyan tituna da wasu anguwanni duk sun cika makil da ruwa.
Wannan ya saba faruwa tun daga farkon daminar inda kusan dukkan magudanun ruwa ke toshewa da datti kuma a halin yanzu akwai gine-ginen da aka yi a hanyar ruwa.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Daily Trust ta rahoto cewa, a farkon watan nan SEMA tace a kalla rayuka tara da gidaje 6,417 ne suka salwanta yayin da kadarorin sama da N500 miliyan suka salwanta tun daga farkon daminar bana.
'Yan kasuwa sun dora laifi a kan gwamnati kan gine-gine
Da yawan 'yan kasuwar Kantin Kwari sun dora laifin abinda ke faruwa a kan gwamnati wacce suka ce ta dinga gine-gine a kan hanyoyin ruwa da titunan kasuwar.
SEMA ta koka da rashin tsaftar 'yan kasuwan inda tace hakan ne ke kawo toshewar magudanun ruwa da suka rage a kasuwar.
Jerin sunayen jihohi 32 na Najeriya da za a fuskanci ambaliyar ruwa a 2022
A wani labari na daban, darakta janar na Nigeria Hydrological Services Agency, NIHSA, Clement Nze, ya ce bayanai daga binciken ambaliyar ruwa na shekarar 2022 sun nuna cewa za a samu ambaliyar ruwa a jihohi 32 na kasar nan har da babban birnin tarayya na Abuja.
A yayin jawabi a Abuja lokacin gabatar da kiyasin hukumar na wuraren da za a iya samun ambaliyar ruwa, ya bayyana jihohin Adamawa, Abia, Akwa Ibom, Anambra, Bauchi, Bayelsa, Benue, Cross-River, Delta, Ebonyi, Ekiti, Edo a cikin wuraren da ake kyautata tsammanin samun ambaliyar ruwan.
Har ila yau, sauran jihohin da ake kyautata zaton samun ambaliyar ruwan sun hada da Gombe, Imo, Jigawa, Kaduna, Kano, Kebbi, Kogi, Kwara, Legas, Nasarawa, Niger, Ogun, Ondo, Oyo, Rivers, Sokoto, Taraba, Zamfara da FCT Abuja.
Asali: Legit.ng
