An ba Kwankwaso Shawara kan Shirin Haɗakar Atiku, Peter Obi da El Rufai a 2027

• Yayin da ƴan adawa ke shirin haɗaka domin kayar da Bola Tinubu a 2027, jigon NNPP ya gargadi Rabiu Musa Kwankwaso
• Asiwaju Moshood Shittu ya bukaci Sanata Kwankwaso ya kula da motsinsa na siyasa, ka da ya yanke shawara cikin gaggawa
• Ɗan siyasar ya ke cewa gaggawar haɗakar siyasa ce ta haifar APC wadda ta zama mafi muni bayan kayar da Goodluck Jonathan

Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum

Kano - Jigo a jam’iyyar NNPP, Asiwaju Moshood Shittu, ya gargadi jagora, Sanata Rabiu Musa Kwankwaso, da kada ya yi gaggawar shiga haɗakar jam'iyyun adawa.

Asiwaju Shittu, wanda tsohon darektan kwamitin kamfen Kwankwaso ne a zaɓen 2023 ya bayyana haka ne yayin da yake zantawa da manema labarai a Abuja a karshen mako.

Ya ce yin gaggawar haɗa kai da wata jam’iyya ba tare da cikakken tsari ko shiri ba, na iya zama matsala kamar yadda ya faru gabanin zaɓen 2015, rahoton Leadership.

Kara karanta wannan

Sanata Kalu ya watsa wa matasan Arewa ƙasa a ido, ya yi maganar karawa da Tinubu a 2027

Ba a so a maimaita hadakar 2014

Jigon NNPP ya ce bai kamata a sake maimaita kuskuren da aka yi a 2014 ba, lokacin da aka yi gayyar jam’iyyun adawa cikin gaggawa domin kawar da tsohon shugaba Goodluck Jonathan.

A cewarsa, a lokacin an ƙulla wannan haɗaka ne ba tare da tantance cancantar wanda za a tsayar a matsayin ɗan takara ba.

"Sakamakon hakan ya kasance bala’i domin mun ƙare da wani da ya fi Jonathan muni," in ji shi.

Asiwaju ya ba Kwankwaso shawara

Ya bukaci Kwankwaso da ya nazarci al’amuran siyasa sosai kafin ya yanke shawara kan ko zai shiga wata kawancen siyasa gabanin 2027.

A cewarsa, tsohon gwamnan Kano ya zama babban jigo a siyasar Najeriya, amma bai kamata ya bari gaggawa ko yawan magoya baya su rinjaye shi ba.

"A yau, kowa na son Kwankwaso ya kasance a gefensa. Yana da farin jini, amma dole ne ya yi taka-tsan-tsan. Wanene za a tsayar takara? Menene manufofin haɗakar?

Kara karanta wannan

Fubara: Gwamnonin PDP sun nufi kotun koli kan dokar ta baci a jihar Ribas

"Shin akwai cikakken tsari a haɗakar da ake shirin yi ta ƴan adawa? Wadannan tambayoyi dole ne a amsa su kafin a ci gaba da shirye-shirye," in ji Shittu.

Abubuwan da ke karya haɗakar siyasa

Ya kuma bayyana cewa mafi yawan haɗakar jam’iyyun adawa a Najeriya suna gazawa ne saboda rashin ingantaccen tsari, rashin ƙwararrun ‘yan takara, da rashin manufa.

A ƙarshe, ya yi kira ga Kwankwaso da ya sanya muradun al’ummar Najeriya a gaba fiye da lissafin siyasa.

A cewarsa, tarihi zai fi tunawa da Kwankwaso bisa kyawawan shawarwari da ya yanke fiye da yin gaggawar haɗaka da wasu ƴan adawa maras inganci.

NNPP ta sake taso Kwankwaso a gaba

A wani labarin, kun ji cewa jam’iyyar NNPP ta tsagin Agbo Major ta jaddada raba gari da Madugun Kwankwasiyya, Rabiu Musa Kwankwaso da ƙungiyar TNM.

Tsagin NNPP ya aika wasiƙa zuwa ga INEC tare da tura kwafinta ga sufetan ƴan sandan Najeriya domin sanar da shi cewa babu ruwan jam'iyyar da su Kwankwaso.

Wanda ya tantance Muhammad Malumfashi, babban edita a Legit.ng.

Asali: Legit.ng