Osun: Mutanen Ministan Buhari sun taimaka mani ta bayen fage inji ‘Dan takaran PDP

• Ademola Adeleke ya tabbatar da cewa da taimakon tsofaffin jiga-jigan APC ya lashe zaben Osun
• Sanata Ademola Adeleke ya ce akwai na-kusa da Rauf Aregbesola da suka ba shi gudumuwa a PDP
• An yi wa APC makarkashiya ne a sanadiyyar rigimar tsohon Gwamna da Gwamna Gboyega Oyetola

Osun - Ademola Adeleke ya ce wasu abokan Ministan harkokin cikin gida, Ogbeni Rauf Aregbesola a siyasa, sun taimaka masa a zaben Gwamnan jihar Osun.

Daily Trust ta rahoto Sanata Ademola Adeleke ya na mai bayanin rawar ganin da wasu daga cikin ‘Ya ‘yan APC suka yi wajen samun nasarar PDP a zaben.

‘Dan takaran yake cewa bai yi magana kai-tsaye da Rauf Aregbesola ba, amma shakka babu, ya ce wasu a cikin yaran gidansa a siyasa sun yi wa PDP aiki.

Kara karanta wannan

Jerin gwamnonin da suka sha ƙasa a zaɓe yayin da suka yi yunƙurin tazarce kan kujerun su a Najeriya

Sanata Ademola Adeleke ya bayyana haka ne da aka yi hira da shi a gidan talabijin na Channels.

Ban yi magana da Aregbesola ba - Adeleke

“Ban yi aiki da Aregbesola ba. Ban ma yi magana da shi ba, amma na san abokan siyasarsa irinsu Kolapo Alimi, lauyan da ya kare Oyetola a kotu ya yi.”

“Duk lokacin da mu ka hadu a kotu, saboda ni wayayyen mutum, zan je in gaida su, ya rika mamaki meyasa na keg aida su a lokacin da suke faman yaka ta.”

“Daga baya ya fada mani ashe gaisuwar tayi tasiri, sun san na ci zabe, murdiya aka yi mani, amma nake gaida su. Sai Aregbesola da Oyetola suka yi fada.”

- Sanata Ademola Adeleke

Kamar yadda Adeleke ya bayyana, daga baya Alimi ya same shi, ya fada masa zai so ya shigo jam’iyyarsu. Amma ya ce sam bai yi wata magana da Aregbesola ba.

Kara karanta wannan

Yadda rikicin cikin gida ya raba kan APC, ya sa PDP ta karbe mulki a jihar Osun

‘Dan takaran da ya yi galaba a zaben yake cewa jagororin jam’iyyar APC a Osun sun shigo PDP, kuma sun bada gudumuwa wajen ganin an karya APC a zaben.

“Mutanen nan sun mallaki hankalinsu ta yadda za su dauki zabi, su goyi baya na ko akasin haka. Suna ganin ni ne zan lashe zabe, suka zo wuri na.”

“Ban san ko Aregbesola ya ba su umarnin hakan ba ko bai ba su ba, domin ba na magana da shi.”

- Sanata Ademola Adeleke

Rikicin cikin gida

A baya kun samu rahoto rigingimun mutanen tsohon Gwamna Rauf Aregbesola da magoya bayan magajinsa, Rauf Aregbesola ya karya APC a jihar Osun.

Ana tunani Ministan tarayya, Rauf Aregbesola ya umarci mutanensa su yi wa PDP aiki, shi kuma ya tsere zuwa ketare yayin da ake yin zaben Gwamnan.

Asali: Legit.ng