Tinubu da Shettima: CAN ta yi bore da martani mai zafi kan tikitin Muslmi da Musulmi
- Zaben Sanata Kashim Shettima a matsayin abokin takarar Bola Tinubu na ci gaba da jawo martani daban-daban a fadin kasar nan
- Kungiyar kiristocin Najeriya ta ce matakin da Tinubu ya dauka na zabo dan uwansa musulmi mataki ne da bai dace ba
- Kungiyar ta kiristoci ta kara da cewa da irin wannan shawarar, babu tabbas kiristoci za su kasance cikin aminci a kasar
ABIN LURA: Za ku iya ceton rayuwar diya mace dake cikin hadari. Bada gudunmuwarka ga Patreon na Legit
Najeriya - Kungiyar kiristocin Najeriya CAN ta ki amincewa da zabo tsohon gwamnan jihar Borno, Kashim Shettima a matsayin dan takarar mataimakin shugaban kasa na jam’iyyar APC.
Da yake magana a wata hira da jaridar Punch a ranar Lahadi, 10 ga watan Yuli, mai magana da yawun CAN, Adebayo Oladeji, ya ce yanke irin wannan shawari a cikin kasa mai cike da rudani irin Najeriya, mataki ne da bai dace ba.
Asali: UGC
Ya bayyana cewa, kasar na da fasto a matsayin mataimakin shugaban kasar kuma ake kashe malamai da mabiya addinin kirista, to lallai babu tabbacin kiristoci za su samu aminci a mulkin Musulmi da Musulmi.
Oladeji, ya yi gargadin cewa ‘yan Najeriya su kasance a shirye su fuskanci girbar abin da shuka idan suka amince da tikitin Musulmi da Musulmi.
DUBA: Shigo shafin Legit.ng na manhajar Legit.ng na Telegram! Kada ka bari komai ya wuce ka
Kalamansa, kamar yadda Vanguard ta ruwaito:
“Mun san wannan shi ne abin da zai yi kuma mun yi gargadi a kan hakan. Ya rage ga ‘yan Najeriya su yanke shawarar abin da suke so.
“Dukkan ku kuna raye lokacin da muka gargadi Buhari da kada ya bari Musulmi su mamaye tsarin tsaron kasar nan kuma ya yi hakan. Ina tsammanin za mu iya ganin yadda 'yan ta'adda ke aiki cikin alfahari.
"Don haka, idan Tinubu ya ce zai yi tikitin Musulmi da Musulmi a kasa mai cike da rudani kamar tamu, idan 'yan Najeriya suka amince da shi kuma suka zabe shi, duk abin da ya faru, 'yan Najeriya za su fuskanci sakamakon aikinsu.
“Idan kuna da gwamnatin da fasto ne mataimakin shugaban kasa kuma ake kashe fastoci da masu ibada ku iya tunanin abin da zai faru idan muka samu tikitin Musulmi da Musulmi.
“Ya ragewa ’yan Najeriya su yi zabi, su zabe su, dukkanmu za mu fuskanci sakamakon tare."
Tinubu ya dauki Kashim Shettima a matsayin abokin takararsa
A tun farko, rahotanni da ke zuwa mana a yanzu sun nuna cewa dan takarar shugaban kasa na jam’iyyar All Progressives (APC) a zaben 2023, Bola Tinubu, ya bayyana abokin takararsa.
Jaridar Vanguard ta rahoto cewa Tinubu ya zabi tsohon gwamnan jihar Borno, Sanata Kashim Shettima a matsayin abokin takararsa a babban zaben mai zuwa.
Tinubu ya sanar da hakan ne a ranar Lahadi, 10 ga watan Yuli, a garin Daura, jihar Katsina, yayin da ya kaiwa shugaban kasa Muhammadu Buhari gaisuwar ban girma na babban Sallah, Channels Tv ta rahoto.
Asali: Legit.ng
