An Samu Bayani, Jami'a Ta Faɗi Adadin Daliban da Suka Mutu Ana Bikin Kammala Karatu
- Jami’ar Nsukka (UNN) ta tabbatar da mutuwar ɗalibanta huɗu bayan wani bikin murna da aka gudanar a wajen harabar jami’ar
- Mataimakin shugaban jami’ar, Farfesa Simon Ortuanya, ya ce ɗalibai 10 ne suka halarci bikin, inda shida ke karɓar magani a asibitoci daban-daban
- Jami’ar ta ayyana zaman makoki na kwanaki uku tare da dakatar da dukkan ayyukan karatu da sauran harkokin jami’a
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Abdullahi Abubakar, Editan Legit Hausa ne ta bangaren siyasa, kasuwanci da al’amuran yau da kullum, ya na da gogewar aikin jarida sama da shekaru biyar.
Enugu – Jami’ar Nsukka (UNN) da ke jihar Enugu ta tabbatar da mutuwar ɗalibanta huɗu bayan sun halarci wani bikin murna da aka gudanar a wajen harabar jami’ar.
Haka kuma, jami’ar ta ayyana zaman makoki na kwanaki uku domin girmama ɗaliban da suka rasu sakamakon lamarin.
Source: Facebook
Mataimakin shugaban jami’ar, Farfesa Simon Ortuanya, ne ya tabbatar da aukuwar lamarin yayin da yake ganawa da manema labarai a ranar Alhamis, kwana guda bayan faruwar al’amarin, cewar Punch.
Yadda ɗalibai huɗu suka mutu bayan bikin
Farfesa Ortuanya ya bayyana cewa ɗalibai 10 na jami’ar ne suka halarci bikin da aka shirya domin murnar kammala jarabawar shekarar ƙarshe ta ɗaya daga cikin abokansu.
Sai dai ya ce huɗu daga cikinsu sun mutu bayan an yi zargin sun sha wasu abubuwa da ake zargin giya da ƙwayoyin maye ne.
Ya ƙara da cewa sauran ɗalibai shida da suka tsira daga lamarin na karɓar magani a asibitoci daban-daban.
Mataimakin shugaban jami’ar ya bayyana rasuwar ɗaliban a matsayin babban rashi ga jami'ar, yana mai cewa wannan mutuwar ta yi yawa. UNN ta ayyana zaman makoki na kwanaki uku
Bayan faruwar lamarin, Ortuanya ya ayyana zaman makoki na kwanaki uku domin nuna alhini da girmama ɗaliban da suka rasu.
A lokacin zaman makokin, jami’ar za ta dakatar da dukkan ayyukan karatu da sauran harkokin zamantakewa da ake gudanarwa a makarantar.
Source: UGC
Matakan da jami'ar ta dauka
Haka kuma, ya sanar da dakatar da wani taron tattaunawa da aka shirya gudanarwa tsakanin al'ummar jami'ar da gwamnan jihar Enugu, cewar TheCable.
Ya kuma miƙa ta'aziyyarsa ga iyalan ɗaliban da suka mutu, abokansu da sauran al'ummar jami'ar, yana mai cewa jami'ar na tare da su a wannan lokaci na jimami. An yi ƙarin bayani kan sashen da ɗaliban suka fito
Mataimakin shugaban jami'ar ya kuma yi watsi da rahotannin da ke cewa dukkan ɗaliban da lamarin ya shafa sun fito ne daga sashen ilimin harhada magunguna.
Ya bayyana cewa ɗaliban sun fito ne daga sassa daban-daban na jami'ar, ba daga sashe guda ba.
Ortuanya ya sake jaddada dokar da jami'ar ta kafa ta haramta bukukuwan sign-out, inda ya buƙaci ɗalibai su guji duk wani abu da ka iya jefa rayuwarsu cikin haɗari.
Ya ce ya kamata kammala karatu ya zama lokacin yin tunani kan makomar rayuwa, ba lokacin gudanar da bukukuwan da ba a kula da haɗarinsu ba.
Jami'a na binciken musabbabin mutuwar ɗaliban
A ƙarshe, mataimakin shugaban jami'ar ya ce suna aiki tare da jami'an tsaro domin gano ainihin abin da ya haddasa mutuwar ɗaliban.
Ya ce har yanzu ana gudanar da bincike domin tabbatar da musabbabin aukuwar lamarin.
Ɗalibai sun yi wa abokindu dukan tsiya
A baya, an ji cewa wasu dalibai hudu da ba a bayyana sunayensu ga manema labarai ba sun kashe abokin karatunsu ta hanyar lakada masa duka.
Rahotanni sun ce dalibin ya gamu da ajalinsa ne bayan da abokan hudu suka kama shi yana nadar bidiyon su, lamarin da ya ja suka duke shi.
Jami’in hulda da jama’a na 'yan sanda, Toun Ejire-Adeyemi (DSP), ya tabbatar da afkuwar lamarin tare da fadin matakin da aka dauka.
Asali: Legit.ng
