Matsala Ta Faru: Cutar Ebola Ta Dawo Najeriya, An Ɗauki Tsauraran Matakai
- Gwamnatin Tarayya ta tabbatar da bullar cutar Ebola guda ɗaya a Abuja, inda aka gano mutum 44 da suka yi hulɗa da majinyaciyar
- Ministan Lafiya, Muhammad Ali Pate, ya ce wata mata da ta dawo Najeriya daga Uganda ce ta kamu
- Gwamnati ta fara bin diddigin waɗanda suka yi hulɗa da ita, tare da ƙarfafa matakan kariya, tana kira ga jama'a su kula da alamomin cutar.
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.
Abuja - Gwamnatin Tarayya ta tabbatar da bullar cutar Ebola guda ɗaya a Babban Birnin Tarayya, Abuja.
Majiyoyi suka ce an fara binciken waɗanda suka yi hulɗa da majinyaciyar saboda dakile yaduwarta.
Source: Twitter
Ministan Lafiya da Jin Daɗin Jama'a, Farfesa Muhammad Ali Pate, ne ya bayyana hakan a cikin wata sanarwa bayan sakamakon gwaje-gwajen dakin bincike ya tabbatar da cutar, cewar Punch.
Ebola: Mutane 44 suna cikin hatsari
An gano mutum 44 da suka yi kusanci da ita, a wani mataki na hana cutar yaɗuwa zuwa ga sauran mutane.
Sanarwar ta ce wata mata da ta dawo Najeriya daga Uganda ta jirgin sama na ƙasa da ƙasa, an kwantar da ita a wani asibiti mai zaman kansa a Abuja, inda aka yi mata magani na wasu kwanaki kafin a tabbatar da tana ɗauke da cutar.
A halin yanzu, an keɓe matar kuma tana samun kulawar likitoci yayin da hukumomi ke ke aiki tare da sauran hukumomin da abin ya shafa domin shawo kan cutar da hana yaɗuwarta.
Gwamnati ta bayyana cewa jami'an kula da lafiyar jama'a sun fara bin diddigin mutane 44 da aka gano sun yi hulɗa da majinyaciyar.
Haka kuma, jami'an na ƙoƙarin gano wasu mutanen da wataƙila suka kamu da cutar, ciki har da ma'aikatan lafiya, majinyata, masu kula da marasa lafiya da mutanen da suka yi tafiya tare da ita.
An kuma ƙara tsaurara sa ido kan cututtuka, yayin da ake ba asibitin da aka yi wa matar magani tallafin gaggawa domin inganta matakan kariya daga yaɗuwar cututtuka.
Gwamnati ta buƙaci asibitocin gwamnati da masu zaman kansu a faɗin ƙasar su kasance cikin shirin ko-ta-kwana domin tunkarar duk wata alamar bullar cutar.
Source: UGC
Alamomin cutar Ebola
Ya bayyana cewa alamomin da ya kamata jama'a su lura da su sun haɗa da zazzaɓi, matsananciyar kasala, ciwon kai, amai da gudawa, musamman ga mutanen da wataƙila sun yi hulɗa da cutar.
Sanarwar ta shawarci duk wanda ya fara nuna alamomin cutar Ebola da ya guji kusantar sauran mutane, sannan ya kira hukumomin kula da lafiyar jama'a domin samun shawarwari kafin zuwa asibiti.
DR Congo: Mutane sun mutu sanadin Ebola
A baya, an ji cewa hukumomin lafiya sun tabbatar da mutuwar mutane 15, ciki har da ma’aikatan lafiya huɗu, yayin da cutar Ebola ta barke a kasar Congo.
Akalla mutum 28 ne ake zargin suna dauke da cutar a lardin Kasai, inda aka gano wata kwayar Ebola da ake kira da Zairense.
Hukumar lafiya ta duniya ta ce yanzu haka tana aiki cikin gaggawa domin dakile yaduwar cutar tare bayyana matakan da ta fara dauka.
Asali: Legit.ng
