Sarkin Musulmi Ya Sanar da Shiga Watan Rabi'ul Auwal 1448

• Sultan Muhammadu Sa’ad Abubakar ya sanar da Juma’a, 14 ga Agusta 2026, a matsayin ranar farko ta watan Rabi’ul Awwal 1448 bayan ganin jinjirin wata
• Kwamitin ganin wata na ƙasa ya karɓi rahotannin ganin watan a ranar Alhamis, 13 ga Agusta, wadda ta yi daidai da ranar 29 ga watan Safar 1448.
• Sanarwar ta ce Sultan ya amince da rahotannin bayan an tantance su, tare da tabbatar da shiga sabon watan Rabi’ul Awwal daga ranar Juma’a.

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Jihar Sokoto – Shugaban Majalisar Ƙoli ta Harkokin Addinin Musulunci ta Najeriya (NSCIA), Sultan Muhammadu Sa’ad Abubakar, ya sanar da cewa Juma’a, 14 ga Agusta 2026, ce ranar farko ta watan Rabi’ul Awwal 1448.

Kara karanta wannan

Maganin mallaka: Matashin da ya birne Kur’ani da wasu kayan tsubbu ya shigo hannu

Sultan ya bayyana hakan ne bayan samun sahihan rahotannin ganin jinjirin watan Rabi’ul Awwal a sassa daban-daban na Najeriya.

Vanguard ta ruwaito cewa sanarwar ta fito ne cikin wata sanarwa da Wazirin Sokoto kuma Shugaban Kwamitin Shawara kan Harkokin Addini na Majalisar Sarkin, Farfesa Sambo Wali Junaidu, ya sanya wa hannu a madadin Sultan.

Sanarwar ta ce kwamitin ya yi aiki tare da Kwamitin Duba Wata na Kasa wajen tattarawa da tantance rahotannin ganin jinjirin watan.

An ga jinjirin watan ne a ranar Alhamis, 13 ga Agusta, wadda ta yi daidai da ranar 29 ga watan Safar 1448 AH.

Sultan ya amince da ganin wata

A cewar sanarwar, an samu rahotannin ganin watan daga kwamitocin ganin wata da aka amince da su a sassa daban-daban na ƙasar.

Rahoton Punch ya nuna cewa an ce an gudanar da bincike da tantance rahotannin kafin gabatar da su ga Sultan Muhammadu Sa’ad Abubakar domin yanke hukunci.

Bayan duba rahotannin da kuma tabbatar da sahihancinsu, Sultan ya amince da shiga watan Rabi’ul Awwal 1448 daga ranar Juma’a, 14 ga Agusta.

Kara karanta wannan

'Yan bindiga: Yadda gwamnatin Sokoto ta shirya sayo baburan Naira biliyan 2

Sanarwar ta ce matakin zai taimaka wajen tantance ranakun ibadu da sauran harkokin addini da suka shafi sabon watan a faɗin Najeriya.

Muhimmancin watan Rabi’ul Awwal

Watan Rabi’ul Awwal na da muhimmiyar matsayi a kalandar Musulunci saboda abubuwan tarihi da na addini da suka shafe shi.

Watan yana da alaƙa da wasu muhimman abubuwan da suka faru a rayuwar Annabi Muhammad (SAW), ciki har da batun haihuwarsa da rasuwarsa.

Tinubu ya gana da Sheikh Al-Issa

A wani labarin, mun ruwaito cewa Shugaba Bola Ahmed Tinubu ya gana da shugaban Ƙungiyar Ƙasashen Musulmi ta Duniya (MWL), Sheikh Mohammed bin Abdulkarim Al-Issa, a Fadar Shugaban Ƙasa da ke Abuja.

Sheikh Al-Issa ya jagoranci tawaga zuwa ziyarar girmamawa ga shugaban ƙasar, tare da jakadan Saudiyya a Najeriya, Dakta Yakubu Gambo, da shugaban Jama’atu Izalatil Bid’ah Wa Iqamatus Sunnah (JIBWIS), Sheikh Bala Lau.

Ziyarar ta kasance wani ɓangare na ƙoƙarin ƙarfafa alaƙa da tattaunawa tsakanin shugabannin addinai da ƙungiyoyin addini domin samar da zaman lafiya.

Asali: Legit.ng