Masana'antar Fim Ta Yi Rashi, Babban Darakta Ya Yi Bankwana da Duniya
- Masana'antar shirya fina-finai ta Najeriya ta shiga jimami bayan rasuwar fitaccen darakta kuma mai shirya fina-finai, Dimbo Atiya
- Jarumi Mofe Duncan ne ya sanar da rasuwar a shafukan sada zumunta, inda ya yi alhini tare da yabawa marigayin
- Dimbo Atiya ya shahara wajen shirya fina-finai, musamman Halita, wanda ya lashe lambar yabo ta AMVCA a shekarar 2022
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
FCt, Abuja – Masana'antar shirya fina-finai ta Najeriya (Nollywood) ta shiga jimami bayan rasuwar fitaccen darakta kuma mai shirya fina-finai, Dimbo Atiya.
Jarumin Nollywood, Mofe Duncan, ne ya sanar da rasuwar marigayin a shafukan sada zumunta a ranar Alhamis, 6 ga watan Agustan 2026.
Source: Instagram
A rubutun da ya yi a shafinsa na Instagram ranar Alhamis, 6 ga watan Agustan 2026, ya bayyana alhininsa tare da karrama gudummawar da Atiya ya bayar wajen ci gaban masana'antar fina-finai ta Najeriya.
Har zuwa lokacin da aka fitar da wannan rahoto, ba a bayyana musabbabin rasuwarsa ba, domin a sanarwar da aka fitar, ba a bayyana hakan ba.
An yi alhinin rasuwar Dimbo Atiya
Bayan sanar da rasuwar, abokan aikinsa, jarumai da masoya sun cika shafukan sada zumunta da sakonnin ta'aziyya.
Mutane da dama sun bayyana Dimbo Atiya a matsayin hazikin darakta, mai bai wa matasa shawara da kuma mutum mai basirar kirkire-kirkire, wanda ya taka muhimmiyar rawa wajen bunkasa Nollywood.
An kuma yabawa irin gudummawar da ya bayar wajen tallafa wa fitowar sababbin jarumai da ma'aikatan shirya fina-finai.
Gudummawar da ya bari a Nollywood
Dimbo Atiya, wanda ya fito daga jihar Nasarawa, ya samu daya daga cikin manyan lambobin yabonsa a shekarar 2022 lokacin da shahararren shirin Halita ya lashe kyautar Best Africa Magic Original Drama Series a gasar Africa Magic Viewers' Choice Awards (AMVCA), bayan doke sauran fina-finai shida da suka fafata.
Wannan nasara ta nuna irin ingancin ayyukan da ya kasance yana gabatarwa tsawon shekarunsa a masana'antar.
Baya ga lambobin yabo, wadanda suka yi aiki tare da shi sun ce ya kasance jagora kuma mutum mai taka muhimmiyar rawa wajen gina sana'ar jarumai da ma'aikatan shirya fina-finai da dama.
An kuma ce kwarewarsa wajen ba da labarai masu jan hankali, musamman wadanda suka shafi al'adu da rayuwar Arewacin Najeriya, ta taimaka wajen fadada tasirin Nollywood tare da jawo karin masu kallo.
Ba a fadi musabbabin rasuwarsa ba
Har ya zuwa lokacin hada wannan rahoto, ba a bayyana musabbabin rasuwar Dimbo Atiya ba wanda ya bar duniya.
Haka kuma, iyalansa ba su fitar da bayani kan shirye-shiryen jana'izarsa ba.
Source: Instagram
Mijin Kemi Adeosun ya rasu
A wani labarin kuma, kun ji cewa Anthony Adeniyi (Niyi) Adeosun, mijin tsohuwar Ministar Kudi ta Najeriya, Kemi Adeosun, ya rasu yana da shekara 62.
Anthony Adeosun ya rasu ya bar matarsa, Kemi Adeosun; 'ya'yansa; da kuma 'yan uwansa, ciki har da wanda ya kafa Kuramo Capital, Adewale Adeosun.
Asali: Legit.ng
