'Ka da Ku Dogara da Gwamnati': Sanata Ya ba Matasan Najeriya Sirrin Neman Kudi

• Dan majalisar dattawa, Adeniyi Adegbonmire ya nemi matasa da su rage dogaro da neman aikin gwamnati bayan kammala karatu
• Sanatan mai wakiltar mazabar Ondo ta tsakiya ya bayyana hakan ne a wajen wani taron ba matasa horo da ya shiryawa matasa
• A zantawarmu da Sanusi Ya'u Mani, ya ce sau tari 'yan siyasa kan ba matasa horo amma su gaza basu jarin da zai ishe su rike sana'ar

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Ondo - Sanata mai wakiltar Ondo ta tsakiya a jihar Ondo, Adeniyi Adegbonmire (SAN), ya yi kira ga matasan Najeriya da su rungumi sana'o'in dogaro da kai.

Sanata Adegbonmire Adeniyi ya ce ya kamata matasa, musamman wadanda suka kammala digiri su kama sana'o'i tare da rage dogaro ga neman aikin gwamnati.

Kara karanta wannan

‘Yan adawa sun fara yabawa a Kano, Abba ya yi bayanin yadda yake inganta lantarki

'Aikin gwamnati ba tabbas' - Sanata Adeniyi'

Sanatan ya bayyana cewa yanzu aikin gwamnati ba shi da wani tabbas kuma ita kanta gwamnatin ba za ta iya ba kowa aiki a kasar ba, inji rahoton Punch.

Saboda hakan, dan majalisar dattawan ya ce akwai bukatar duk wanda ya kammala karatunsa ya yi tunanin koyon sana’o’in da zai dogara da kansa.

Sanata Adeniyi ya bayyana hakan ne a garin Akure, babban birnin Ondo a wani taron ba da horon sana'o'i ga wadanda suka kammala jami'a daga mazabarsa ta Ondo ta tsakiya.

Sanata ya horar da matasan mazabarsa

Shirin ba da horon wanda aka fara daga ranar Litinin zai ba matasa sama da 170 horo har zuwa ranar Laraba, kuma sanatan ne ya dauki nauyi.

An ce shirin na kwanaki uku wanda sanatan ya dauki nauyi ya kuma samu hadin gwiwar hukumar fadada ayyukan noma da bincike ta kasa.

Kara karanta wannan

Bayan ayyana ilimi kyauta, gwamna a Arewa ya kawo sabon tsari a manyan makarantu

Dan majalisar na tarayya ya bayyana cewa ya ba matasan mazabarsa wannan horo ne domin ya dauke su aiki a fannin da suka samu horon.

Da wanne kudi matashi zai fara sana'a?

A zantawarmu da Sanusi Ya'u Mani, wakilin daliban durbin Katsina hakimin Mani, ya ce akwai bukatar 'yan siyasa su fara kallon halin da mutane ke ciki kafin furta magana.

Wakilin daliban ya ce sau tari 'yan siyasa na hankoron ba matasa horo, amma bayan kammala horon sukan gaza basu jarin da zai isa su fara sana'a, sai a barsu da ilimin ba sana'ar.

Sanusi Ya'u Mani ya ce matasa da dama, musamman wadanda suka kammala karatu, na da fikirar sana'a, amma rashin wadataccen jari ne ke hana su shigar kasuwancin.

Ga wadanda ke da kudin fara sana'ar, wakilin daliban ya ce hauhawar farashin kayayyaki da lalacewar darajar Naira kan sa jarin nasu ya lalace, har su rasa sana'ar.

Kara karanta wannan

"Shi ne mafi alheri" Sanata a Arewa ya fito da manufar cire tallafin mai a Najeriya

Ya yi kira ga sanatoci, 'yan majalisun tarayya da na jihohi, gwamnatocin jiha da tarayya da su rika ba matasa jari mai kauri yayin da za su ba da wani tallafi na kasuwanci.

'Ku koyi sana'a, babu aikin gwamnati' - Sanata

A wani labarin, mun ruwaito cewa Sanata Ajibola Basiru, ya shawarci 'yan bautar kasa da su nemi sana'o'in dogaro da kai maimakon jiran samun aikin gwamnati.

Sanatan ya shawarci matasan Najeriya da su tabbatar sun habaka kwarewar kasuwancinsu domin dacewa da yanayin tattalin arziki na yanzu.

Muhammad Malumfashi, babban edita a sashen Hausa na Legit ya duba labarin.

Asali: Legit.ng