Shugaban Kasa Ya Yi Murabus daga Mukaminsa kan Wasu Zarge Zarge
- Shugaban Mongoliya, Ukhnaagiin Khurelsukh, ya sanar da murabus dinsa bayan jam’iyyar adawa ta Democratic Party ta zarge shi da hannu a cin hanci
- Khurelsukh ya musanta zargin, yana mai cewa ba zai bari jama’a da gwamnati suna tunanin ya aikata laifin sata ba
- Shugaban majalisar dokokin ƙasar, Sandag Byambatsogt, ne zai karɓi ragamar ayyukan shugaban ƙasa, yayin da za a shirya zaɓe cikin watanni huɗu
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Kasar Mongoliya - Shugaban kasar Mongoliya, Ukhnaagiin Khurelsukh, ya sanar da murabus dinsa a ranar Talata, 17 ga watan Nuwamba bayan fuskantar zarge-zargen cin hanci da rashawa da kuma barazanar tsige shi daga jam’iyyar adawa ta ƙasar.
Sanarwar murabus ɗin ta zo ne kwana guda bayan jam’iyyar Democratic Party ta fitar da sanarwa, inda ta zarge shi da hannu a almundahana tare da buƙatar ya sauka daga mukaminsa ko kuma majalisa ta tsige shi.

Source: Getty Images
Dalilin da ya sa shugaban ƙasar ya yi murabus
Da yake jawabi a wani taron manema labarai, Khurelsukh ya ce ana yi masa ƙazafi da zargin aikata manyan laifuffuka da bai aikata ba, cewar rahoton tashar Reuters.
Ya bayyana cewa ya yanke shawarar barin mukaminsa ne domin ya dawo da mutuncinsa da kuma tabbatar da gaskiya game da zarge-zargen da ake yi masa.
Khurelsukh ya ce:
“Na yi imanin cewa abin da ya dace da adalci shi ne shugaban ƙasa ya ajiye aikinsa domin a gano gaskiya.
“Saboda haka, a hukumance ina sanar da cewa zan sauka daga wannan babban aikin shugaban ƙasar Mongoliya. Zan miƙa batun mutuncina ga hukumomin da suka dace domin su bincika, kuma zan nemi dawo da sunana mai kyau.”
Jam’iyyar adawa ta nemi a yi bincike
A ranar Litinin, jam’iyyar Democratic Party ta bayyana cewa cin hanci da rashawa ya yi ƙamari a Mongoliya, AP News ta kawo labarin.
Jam’iyyar ta buƙaci manyan jami’an gwamnati da ake dangantawa da zarge-zargen almundahana, ciki har da Khurelsukh, su ajiye mukamansu tare da fuskantar bincike.
Sai dai shugaban ƙasar ya musanta aikata wani laifi, yana mai cewa bai taɓa satar dukiyar jama’a ko ta gwamnati ba tun bayan hawansa kan karagar mulki.
“Ni mutum ne wanda bai taɓa satar dukiyar jama’a ko ta gwamnati ba a lokacin da nake shugaban ƙasa.
"Ban taɓa yin ƙarya ko sata ba. Ban taɓa yaudarar kowa ba.” In ji shi.
Rikicin siyasa ya ƙara kamari a Mongoliya
Mongoliya ta shafe watanni tana fuskantar rikice-rikicen siyasa, musamman sabani tsakanin ’yan jam’iyyar Mongolian People’s Party (MPP) mai mulki.
A watan Maris, ’yan majalisar dokokin ƙasar sun naɗa firaminista na uku cikin ƙasa da watanni 12, bayan zanga-zangar adawa da cin hanci da rashawa da aka shafe makonni ana gudanarwa.
Dubban matasa ne suka fito kan titunan babban birnin ƙasar, Ulaanbaatar, domin nuna fushinsu kan masu hannu da shuni da kuma abin da suke ganin rashin adalci ne da ya mamaye ƙasar.
Wanda zai karɓi ragamar shugabancin ƙasar
Bisa dokokin Mongoliya, shugaban majalisar dokokin ƙasar, Sandag Byambatsogt, wanda yake cikin jam’iyyar MPP, zai karɓi ragamar ayyukan shugaban ƙasa bayan murabus ɗin Khurelsukh.
Dokokin ƙasar sun kuma tanadi cewa dole ne a shirya zaɓen shugaban ƙasa cikin watanni huɗu bayan barin mukamin da Khurelsukh ya yi.

Source: Getty Images
Shugaban maau rinjaye ya yi murabus
A wani labarin kuma, kun ji cewa Saleh Hodi, shugaban masu rinjaye na Majalisar Dokokin Jihar Bauchi, ya yi murabus daga kujerarsa ta wakiltar mazabar Disina domin ya tsaya takarar zaben shugaban karamar hukumar Shira.
Saleh Hodi da ke wakiltar mazabar Disina, ya kasance dan majalisar tun bayan da aka fara zaben sa a shekarar 2019.
Asali: Legit.ng


