Rikita Rikita: Matukan Jirgin 'Yan Isra'ila Sun Kaure da Fada ana Tafiya a Sama

• An yi wa wani jirgin fasinja da ke kan hanyar Dubai zuwa Isra’ila saukar gaggawa a birnin Tabuk na Saudiyya bayan rahoton rikici tsakanin matukan jirgin
• Lamarin ya haifar da fargabar cewa an yi garkuwa da jirgin bayan an aika da alamun gaggawa da suka nuna yiwuwar kutsen ba bisa ka’ida ba
• Daga baya jami’an Isra’ila sun ce ba a yi garkuwa da jirgin ba, yayin da rahotanni suka ce rikicin tsakanin matukan jirgin ne ya jawo lamarin

Editan Legit Hausa Ibrahim Yusuf Kari yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Tel Aviv – Wani jirgin kamfanin Flydubai mai lamba FZ1073 da ya tashi daga Dubai zuwa Isra’ila ya yi saukar gaggawa a Tabuk, arewa maso yammacin Saudiyya, bayan wani lamari da ya faru a cikin jirgin.

Jirgin na shawagi ne a kan sararin samaniyar Jordan lokacin da ya karkata zuwa Saudiyya, inda ya aika da alamun gaggawa guda uku, ciki har da ɗaya da ke nuna yiwuwar kutsen jirgin ba bisa ka’ida ba.

Kara karanta wannan

'Yan daba sun sassara matashi mai shayi da wukake har ya mutu

Matukan jirgin sama sun yi rikici

Rahoton the Guardian ya nuna cewa kafofin yaɗa labarai na Isra’ila sun ce rikicin da ya faru a cikin jirgin ya samo asali ne daga faɗa tsakanin matukan jirgin.

Wani jami’in Isra’ila da ya yi magana ya ce matukan jirgin sun yi arangama da juna, lamarin da ya jawo aika alamun gaggawa daga jirgin.

Sai dai har yanzu ba a tabbatar da cikakken abin da ya haddasa rikicin ko wanda ya kunna alamun matsalar gaggawar ba.

An yi fargabar garkuwa da jirgin

Bayan jirgin ya aika da alamar da ke nuna yiwuwar kutse, hukumomin Isra’ila sun ɗauki matakan tsaro tare da aika jiragen yaƙi domin gano halin da ake ciki.

Daga baya wani kakakin ofishin Firaministan Isra’ila ya ce lamarin ba a yi imanin cewa yunƙurin garkuwa da jirgin ba ne.

Jirgin ya sauka lafiya a filin jirgin saman Tabuk, kuma kamfanin Flydubai ya tabbatar da cewa dukkan fasinjoji da ma’aikatan jirgin suna cikin koshin lafiya kuma an tabbatar da lafiyarsu.

Kara karanta wannan

Matashin da ya yi rai ya bada labarin yadda mutane 37 suka mutu hannun NSCDC a Minna

Rahotannin tashin hankali

Wasu rahotanni sun ce fasinjoji sun ji ihu a cikin jirgin yayin da rikicin ke faruwa, yayin da wata mata, Yasmin Abu Kasis, ta ce ɗiyarta da ke cikin jirgin ta gaya mata cewa ta ga wani mutum da wuƙa yana matsa wa ɗaya daga cikin matukan jirgin ƙasa.

BBC ta ce ba a iya tabbatar da wannan bayani ko hoton wani fasinja da aka ce tufafinsa sun yi jini ba.

Haka kuma, wasu rahotanni sun ce ana bincike kan yiwuwar ɗaya daga cikin matukan jirgin ya yi ƙoƙarin kwace ikon jirgin, amma wannan bayanin bai samu tabbaci mai zaman kansa ba.

Batun nukiliyar Koriya

A wani labarin, mun ruwaito cewa Shugaban Amurka Donald Trump ya bayyana shugaban Koriya ta Arewa, Kim Jong Un, a matsayin abokinsa yayin da yake magana kan makaman nukiliyar Pyongyang.

Trump ya ce Kim yana girmama shi kuma yana son shi, yana mai cewa muddin yana kan mulki, shugaban Koriya ta Arewar zai kasance cikin kwanciyar hankali.

A bayanin da ya yi, shugaba Donald Trump ya kuma ce ƙarfin makaman nukiliyar Koriya ta Arewa yana da yawa, amma bai kai na Amurka ba.

Asali: Legit.ng