Kasar Iran Ta Farmaki Wani Jirgin Yaki, Ta Kara Yi Wa Amurka da Isra'ila Babbar Illa
- Rundunar juyin juya hali ta Iran ta kai farmaki kan wanijirgin yaki kirar F-15E na Amurka yayin da aka shiga rana ta bakwai da fara musayar wuta
- Sojojin IRGC sun sanar da kaddamar da zayage na 22 na hare-haren kare kai da ramuwar gayya da suke kai wa kan kayayyakin Amurka da Isra'ila
- Gwamnatin Iran dai ta sha nanata cewa ba gudu ba ja da baya a wannan yaki, inda ta ce ba za ta yi kasa a gwiwa ba a kokarin kare kanta
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Ahmad Yusuf, kwararren edita ne a Legit Hausa da ya shafe tsawon shekaru yana kawo muku rahotannin siyasa, nishadi da al'amuran yau da kullum
Iran - Dakarun rundunar juyin juya hali na kasar Iran (IRGC) na ci gaba da kaddamar da hare-hare da makamai masu linzami kan kadarorin Amurka da ke Gabas ta Tsakiya.
Wannan na zuwa ne yayin da aka shiga rana ta bakwai da fara musayar wuta tsakanin Iran da hadin gwiwar kasashen Amurka da Ira'ila.
Source: Getty Images
A wani rahoto da tashar Al-Jazeera ta kawo yau Juma'a, dakarun rundunar juyin juya halin Iran sun yi ikirarin kai hari kan wani jirgin yakin sojojin Amurka.
Iran ta kai hare-hare zagaye na 22
Dakarun IRGC sun bayyana haka ne yayin da suke bayani kan hare-haren makamai masu linzami, zagaye na 22, da suka kaddamar kan sansanoni da kadarorin kasar Amurka da Isra'ila.
Dakarun na Iran sun sanar da fara zagaye na 22 na aikin soji mai suna “True Promise 4”, inda suka tabbatar da kai farmaki kan wani jirgin yaƙin Amurka F-15E, kamar yadda BBC Hausa ta kawo.
A wannan sabon zagaye, sojojin Iran sun harba makamai masu linzami da dama, ciki har da Khorramshahr-4, makamin Khaibar da kuma Fateh, waɗanda aka harba zuwa wurare daban-daban a Isra'ila.
Kasar Iran ta kakkabo jirgi mara matuki
Sojojin na Iran sun kuma bayyana cewa sun harbo wani jirgin sama maras matuƙi na Isra'ila mai suna Heron drone, wanda ke shawagi a sararin samaniyar birnin Isfahan da ke tsakiyar ƙasar.
Jiragen Heron su ne manyan jirage marasa matuƙi (UAV) da Isra’ila ke amfani da su, kuma an fara amfani da su a hukumance tun shekarar 2007.
Source: Getty Images
Rundunar ta yi alƙawarin ƙara faɗaɗa hare-haren zuwa wasu wurare da ta kira “sansanonin abokan gaba.”
Gwamnatin Iran dai ta sha nanata cewa ba gudu ba ja da baya a wannan yaki, inda ta ce ba za ta yi kasa a gwiwa ba wajen kai hare-hare kan Amurka da Isra'ila domin kare kanta.
Iran ta farmaki tankar man Amurka
A baya, kun ji cewa dakarun Iran sun sanar da cewa sun kai hari kan wani jirgi dauke da tankar man Amurka a Arewacin Tekun Farisa.
Harin ya zo ne bayan Ministan harkokin wajen Iran ya yi gargadin cewa Amurka za ta yi nadama kan harin da aka kai kan jirgin ruwansu mai suna IRIS Dena a gabar tekun Sri Lanka.
Amurka ta kai hari kan jirgin Iran ne bayan rundunar IRGC ta bayyana a cikin wata sanarwa cewa ta dakatar da zirga-zirgar jiragen ruwa ta mashigin Hormuz.
Wanda ya tantance Muhammad Malumfashi, babban edita a Legit.ng.
Asali: Legit.ng
