Lema Ta Yage: Tsohon Mataimakin Gwamna Ya Yi Murabus daga PDP, Ya ba da Haƙuri

• Tsohon mataimakin gwamna a Najeriya ya jefar da lema bayan sanar da yin murabus daga jam'iyyar da ke adawa a jihar
• Cif Ude Oko-Chukwu wanda ya rike muƙamin a jihar Abia, ya yi murabus daga PDP saboda dalilan kansa, inda ya ce babu yadda ya iya
• Jigon PDP ya gode wa jam’iyyar PDP bisa damar yi masa hidima da kwarewar da ya samu, yana yi musu fatan alheri

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Umuahia, Abia - Tsohon mataimakin gwamnan jihar Abia ya tabbatar da yin murabus daga PDP mai adawa a Najeriya.

Cif Ude Oko-Chukwu, ya yi murabus daga jam’iyyar inda ya ce matakin ya zama dole saboda wasu dalilai na karan kansa.

Abia: Jigon PDP ya yi murabus daga jam'iyya

Hakan na cikin wata wasika aka aika wa shugaban PDP na mazabar Ndi Elu, Nkporo, karamar hukumar Ohafia ya sanyawa hannu, cewar Punch.

Kara karanta wannan

Shugaban majalisar malaman Kano zai nemi gwamna, zai kara da Abba a 2027

A cikin wasikar, Oko-Chukwu ya bayyana cewa yin murabus dinsa ya faru ne saboda dalilan kansa wanda ya ce ba zai iya kauce hakan ba.

Kodayake tsohon mataimakin gwamnan bai bayyana matakin siyasa na gaba ba, ya ce yanke shawarar barin jam’iyyar PDP abu ne mai wahala a gare shi, amma shi ne mafi alheri a yanzu.

A cikin wasikar, Oko-Chukwu ya tabbatar da cewa:

“Kuna iya lura cewa na yi murabus ne saboda dalilan kaina, duk da cewa shawarar ta yi mani wahalar yankewa, ita ce mafi dacewa a yanzu.

“Ina godiya da damar da jam’iyyar ta bani na yi wa al’umma hidima a matakai daban-daban da kuma kwarewar da na samu a lokacin kasancewata mamba.

“Na gode da fahimtar ku da goyon bayanku a wannan lamari, tare da yi muku fatan alheri a nan gaba.”

Mukaman da Oko-Chukwu ya rike a PDP

Oko-Chukwu, wanda kuma tsohon kakakin majalisar dokokin jihar Abia ne, ya taba neman tikitin takarar gwamna a jam’iyyar PDP a zaben 2023.

Kara karanta wannan

'Ban yi nadama ba': Ministan Buhari ya faɗi dalilin cire shi daga kujerar gwamna

Sai dai kuma Oko-Chukwu ya sha kaye a hannun Cif Okey Ahaiwe kafin daga bisani jam'iyyar LP ta lashe zaben, Daily Post ta tabbatar da wannan.

An lura cewa Ama Nwoke Ibe ya karɓa tare da sanya hannu a madadin PDP na mazabar Ndi Elu, Nkporo, a kan wasikar da ya gabatar domin tabbatar da murabus dinsa.

Tsohon sanata a Katsina ya bar APC

Mun ba ku labarin cewa tsohon Sanata daga jihar Katsina kuma babba a APC mai mulkin Najeriya ya yi murabus daga jam'iyyar bayan bauta mata na tsawon shekaru.

Sanata Abubakar Sadiq Yar’adua, ya fice daga jam’iyyar saboda gazawar gwamnati da rashin adalcin shugabancin jam’iyyar wacce ya ba da gudunmawa sosai wurin kafa ta.

Yar’adua ya bayyana cewa gwamnatin APC ta juya baya ga talakawa tare da aiwatar da manufofin tattalin arziki masu lalata rayuwar 'yan kasa wanda ya jefa al'umma cikin halin kunci.

Wanda ya tantance Muhammad Malumfashi, babban edita a Legit.ng.

Asali: Legit.ng