Shugaban Majalisa Ya Rantsar da Ragowar Mambobin APC bayan Watanni Suna Jira
- Daga ƙarshe shugaban majalisar dokokin Plataeu ya rantsar da ragowar ƴan majalisar na jam'iyyar APC mai adawa a jihar
- Honarabul Gabriel Dewan ya rantsar da ƴan majalisar ne a ranar Larabawatanni bayan hukuncin babban kotun ɗaukaka ƙara
- Da take martani kan lamarin, jam'iyyar APC ta caccaki shugaban majalisar bisa lokacin da ya ɓata kafin ya rantsar da su
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi
Jihar Plateau - Shugaban majalisar dokokin jihar Plateau, Honarabul Gabriel Dewan, ya rantsar da ragowar ƴan majalisar na jam'iyyar APC.
Shugaban majalisar ya rantsar da ragowar ƴan majalisar guda biyar ne bayan sun kwashe watanni suna jiran ya yi hakan.
Asali: Facebook
Jaridar Daily Trust ta rahoto cewa shugaban majalisar ya rantsar da su ne a ranar Laraba, 11 ga watan Satumban 2024.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
An rantsar da mambobin APC a Plateau
Jaridar The Nation ta ce mambobin da aka rantsar su ne Owen Dagogot (Qua’an-Pan ta Arewa), Theodore Maiyaki (Qua’an-Pan ta Kudu) da Yakubu Sanda (Pengana).
Ragowar su ne: Dachung Dadon (Riyom) da kuma Dalyop Gyang (Shendam ta Kudu).
Mambobin da aka rantsar na daga cikin ƴan majalisa 15 na APC da ɗaya na jam'iyyar LP da kotun ɗaukaka ƙara ta tabbatar da nasararsu a watan Nuwamban shekarar da ta gabata.
A ranar, 5 ga watan Afirilu, shugaban majalisar ya rantsar da guda tara daga cikinsu bayan sun sanya hannu kan takardar yin murabus.
Sai dai, sauran guda bakwai ɗin sun yi zargin cewa an ƙi rantsar da su ne saboda sun ƙi yarda su sanya hannu kan takardar yin murabus ɗin.
A makon da ya gabata ne aka rantsar da guda biyu daga cikinsu a lokuta daban-daban.
Me APC ta ce kan lamarin?
Muƙaddashin kakakin jam'iyyar APC na jihar Plateau, Shittu Bamaiyi, ya caccaki shugaban majalisar saboda lokacin da ya ɓata kafin ya rantsar da su.
Shittu Bamaiyi ya bayyana cewa shugaban majalisar ya hana mutanen mazaɓun da ƴan majalisar suka fito ƴancin samun wakilci har na tsawon wata takwas.
APC ta yi wa shugaban majalisa barazana
A wani labarin kuma, kun ji cewa jamiyyar APC a jihar Plateau ta yi barazanar zuwa kotu kan shugaban majalisar jihar saboda kin rantsar da mambobin majalisar.
Jam'iyyar APC ta ce za ta ɗauki mataki kan shugaban majalisar, Hon. Gabriel Dewan kan biris da rantsarwar da ƴan majalisu 16 a majalisar.
Muhammad Malumfashi, babban edita a sashen Hausa na Legit ya duba labarin.
Asali: Legit.ng
