Kotun Koli: Sabuwar Zanga-Zanga Ta Barke Kan Shari'ar Gwamnan APC da Dan Takarar PDP

• Taƙaddamar zaɓen gwamnan jihar Nasarawa na cigaba da tayar da ƙura a tsakanin al'ummar jihar
• Wasu ƙungiyoyin mata da ba su gamsu da hukuncin kotun ɗaukaka ƙara ba na cigaba da gudanar da zanga-zanga a jihar
• Ƙungiyoyin sun koka kan rashin adalcin da suka ce an yi musu, inda suka kai kukansu a gaban kotun ƙoli

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Nasarawa - Wasu mata a jihar Nasarawa sun sake gudanar da zanga-zanga a garin Lafia babban birnin jihar a ranar Talata.

Matan sun gudanar da zanga-zangar ne kan abin da suka bayyana a matsayin rashin adalcin da aka yi wa ɗan takarar gwamnan jihar, David Ombugadu, na jam’iyyar PDP, cewar rahoton The Punch.

Kara karanta wannan

Babbar magana: Sabuwar rigima ta barke tsakanin APC da gwamnatin Kano kan abu 1

A ranar 2 ga watan Oktoba ne kotun sauraron ƙararrakin zaɓen gwamna ta kori Gwamna Abdullahi Sule na jam’iyyar APC, tare da bayyana Ombugadu a matsayin wanda ya lashe zaɓen.

Rashin gamsuwa da hukuncin, Sule ya garzaya kotun ɗaukaka ƙara inda aka bayyana shi a matsayin wanda ya lashe zaɓen gwamnan jihar.

Menene buƙatun masu zanga-zangar?

Da take magana da manema labarai a Lafia a ranar Talata, shugabar ƙungiyoyin mata masu zanga-zangar, Hanatu John, ta ce dimokuradiyya ta shafi ƙuri’un jama’a ne.

Hanatu ta yi mamakin dalilin ƙin bayyana Ombugadu a matsayin wanda ya lashe zaɓen, rahoton Sahara Reporters ya tabbatar.

A kalamanta:

"Mun fara zanga-zangar ta wannan makon ne a ranar Litinin, 25 ga watan Disamba, saboda bikin Kirsimati ya zama mara armashi tunda an yi mana ƙwacen nasara."

Kara karanta wannan

Babban jigo ya bayyana kujerar gwamnan APC da kotun ƙoli za ta ƙwace ta bai wa jam'iyyar PDP

"Mun kasance a nan tun watan Maris muna nuna rashin amincewa da abin da muka bayyana a matsayin rashin adalci na zaɓe. A lokacin zaɓen gwamna mun zaɓi Ombugadu ba Sule ba. Amma muna fatan za a yi abin da ya dace a kotun ƙoli."

"Domin haka muna kira ga alƙalai da su duba sakamakon zaɓen gwamna da aka yi daga jihar Nasarawa cikin natsuwa domin a dawo mana da nasarar mu."

Gwamna Sule Ya Zargi PDP

A wani labarin kuma, kun ji cewa gwamnan jihar Nasarawa, Abdullahi Sule, ya zargi jam'iyyar PDP da shirin tayar da zaune tsaye a jihar.

Gwamnan ya yi nuni da cewa jam'iyyar na son yin amfani da bambance-bambancen addini da ƙabila domin kawo hargitsi a jihar.

Asali: Legit.ng