Sanatan APC Ya Kawo Hujjoji, Ya Fadi Yankin da Ya Dace Sabon Shugaban Majalisa Ya Fito

• A shekarar 2003 Osita Izunaso ya fara zama ‘dan majalisar wakilan tarayya, ya zama Sanata a 2007
• Ganin haka ne Sanatan ya ce a duk masu harin shugabancin majalisar dattawa, shi ya fi kowa dacewa
• Sanata Osita Izunaso yana ganin idan za ayi adalci, yankin Kudu maso gabas ya kamata a kai kujerar

Abuja - Osita Izunaso (APC-Imo) ya sake nanata cewa a halin da ake ciki a yanzu, shi ne ya fi dacewa ya karbi shugabancin majalisar dattawan kasar nan.

A ranar Talata, Vanguard ta rahoto Osita Izunaso yana mai cewa adalci, daidaito da gaskiya shi ne a bar Kudu maso gabas su fito da sabon shugaban majalisa.

Sanata Osita Izunaso yana ganin daga yankinsa ya kamata a samu wanda zai zama na uku a kasar idan aka duba cewa tun bayan 1966 Ibo bai rike mulki ba.

Kara karanta wannan

Gwamnoni Sun Hango Matsala a Majalisa, Sun Nemi a Dauki Matakin Gaggawa a APC

‘Dan siyasar yake cewa yana da kwarewa da sanin aikin da ake bukata wajen ganin bangaren zartarwa ya ji dadin aiki da ‘yan majalisar tarayya a Najeriya.

Osita Izunaso ya ce ya san hanya

Ganin cewa tun shekarar 2003 ya zama ‘dan majalisa, Izunaso ya shaidawa manema labarai a garin Abuja cewa shi ne ya dace ya zama shugaban Sanatoci.

Baya ga dadin aiki da za a ji tsakanin bangarorin gudanarwa da masu yin doka, Sanatan ya ce abubuwa za su lafa a yankinsa idan Ibo ya dare kujerar.

Tsohon sakataren gudanarwar na jam’iyyar APC ta kasa ya ce a duk Sanatocin Kudu maso gabas, babu wanda ya sha gaban shi, ya fi kowa sanin kan majalisa.

Gogewar da Osita Izunaso ya samu

A shekarar 1992, Sanatan na Imo ya ce ya yi aiki da shugaban majalisar wakilan tarayya, Agunwa Anakwe, shi ne sakataren yada labaransa a lokacin.

Kara karanta wannan

Dubu ta cika: Yadda dan kasar waje ya shigo Najeriya da kayan hodar iblis a cikin kwaroron roba

Haka zalika Izunaso ya ce ya rike wannan mukami na Sakataren yada labarai a sa'ilin da Evans Nwerem ya zama shugaban majalisar dattawa a 1999.

Tun 1995 kuwa ‘dan majalisar ya yi aiki da Jim Nwobodo lokacin da ya rike Ministan matasa da wasanni. People Gazette ta fitar da rahoton nan a makon nan.

Tsakanin 1997 da 1999, ‘dan siyasar ya shaidawa ‘yan jarida cewa ya cigaba da aiki a matsayin babban sakataren yada labarai na Ministan kwadago na kasa.

An taso Obi a gaba - PCC

A zaben Shugaban kasan da aka yi a bana, an ji labari wani ‘Dan kwamitin yakin zaben shugaban kasa na jam'iyyar LP ya ce Peter Obi yana ganin barazana.

Kamar yadda yake fada, tun da Obi ya tsaya takarar shugabanci a LP, ake bin sa da kulle-kulle, har an yi kokarin a dasa mata otel saboda makiricin siyasa.

Kara karanta wannan

Majalisa ta 10: Shehu Sani ya fadi sanatan da ya kamata ya gaji kujerar Ahmad Lawal

Asali: Legit.ng