Yadda Gwamnoni Ke Taimakawa Wajen Tada Rikici a Lokutan Zabe, Bayanin Oshiomole

• Tsohon gwamnan jihar Edo ya bayyana bacin ransa da yadda wasu gwamnoni ke taimakawa wajen ta'azzarar tsaro a lokacin zabe
• Tsohon ministan ya ce tabbas wasu gwamnoni ne ke siyawa tsageru bindigogi AK-47 a duk lokacin da zabe ke kara karatowa
• Ana yawan samun tashe-tashen hankula a lokutan zabe a Najeriya, lamarin da ke sanya tsoro a zukatan 'yan kasa

Najeriya - Tsohon minsitan Buhari, kuma tsohon shugaban APC na kasa, Adams Oshiomole ya bayyana yadda gwamnoni ke taimakawa wajen dagula kasar nan a lokutan zaben.

Oshiomole ya bayyana sirrin gwamnonin ne a wata tattaunawa da kungiyar YIAGA Afrika ta shirya tare da hadin gwiwar majalisar dinkin duniya da gidan talabijin na Channels.

Hakazalika, ya bayyana cewa, ya kamata jam'iyyun siyasa suke bayyanawa mabiyansu cewa, zabe lamari ne na 'yanci kuma damar bayyana ra'ayi.

Kara karanta wannan

Rudani: Bayan dogon nazari, kotu ta wanke Magu daga zargin almundahana

Ya kara da cewa:

"Ya kamata mu ke fadawa shugabanninmu cewa, dole su yi da'awar yin zabe ba tare da tashin hankali ba. Ina sake nanata cewa, dukkanmu aiki ne a kanmu. Najeriya ta fi gaban dukkan jam'iyyun siyasa."

Ba haka siddan ake samun makamai ba

Oshiomole ya bayyana cewa, yawancin makaman da ake gani a hannun masu dagula lamarin zabe ba abu ne mai sauki samunsu ba, Daily Trust ta ruwaito.

Tsohon gwamnan na Edo ya ce:

"A lokacin da nake gwamna na fadi haka, ku tambayi (tsohon) shugaban kasa Goodluck Jonathan, na tada batu a wata ganawa a Villa cewa, wasu gwamnoni a wasu lokutan na taimakawa wajen tada hankali a lokacin zabe saboda AK-47 ba abu ne mai araha ba kamar kosai.

"Sannan duk lokacin da ka ga matasa maras sana'a dauke da makaman AK-47, waye ke samar dasu? Don haka shugabancin siyasa nauyi ne a ka, dole mu dauki wannan nauyin."

Kara karanta wannan

Yanzu-Yanzu: BoT na PDP ta kammala zama da gwamnan da ke ba Atiku ciwon kai

A bangare guda, ya yabawa shugaban kasa Muhammadu Buhari bisa jajircewa wajen tabbatar an samu zaman lafiya da wataccen tsaro a Najeriya.

Ban Sani Ba Ko Tinubu Yana Najeriya, Inji Jigon Kamfen Din Tinubu, Oshiomole

A wani labarin, mataimakin daraktan gangamin kamfen din APC, Adams Oshiomole ya ce bai da masaniya ko dan takarar shugaban kasansu na nan a Najeriya.

Ya bayyana hakan ne a ranar Laraba 28 ga watan Satumba yayin wata tattaunawa da gidan talabijin na Channels.

Ya bayyana cewa:

"Ba da shi nake aiki kullum ba, ban san yana nan ko bai nan ba."

Asali: Legit.ng