Rigima za ta kaure saboda ‘taba’ sunayen masu tsaida 'Dan takarar Shugaban kasa a APC
- Akwai kishin-kishin din samun rashin jituwa tsakanin ‘ya ‘yan jam’iyyar APC mai mulki a Najeriya
- Hakan yana zuwa ne a sa’ilin duka wasu jam’iyyan siyasa su ke shirin gudanar zaben fitar da gwani
- Idan shugabannin jam’iyya ba su sa baki ba, za a iya samun matsala wajen zaben tsaida ‘dan takara
Abuja - Tribune ta ce za a iya samun kalubale a kan batun zaben tsaida ‘dan takarar shugaban kasa da APC za ta gudanar a karshen watan Mayun 2022.
Akwai ‘yan jam’iyyar ta APC mai mulki da suke zargin cewa za a taba jeringiyar sunayen da shugabanni na reshen jihohi za su gabatar a sakatariya.
Ana tunanin za a iya cusa sunayen wadanda bai dace su shiga zaben fitar da gwani ba a jerin da za a kai Abuja, ganin irin adadin masu yin zaben gidan.
Rahoton ya ce kimanin mutum 7800 ake lissafin za su kada kuri’a wajen fito da ‘dan takarar shugaban kasa a zaben da za ayi nan da makonni biyar.
Tsakanin 7 zuwa 9 ga watan Mayun 2022 jam’iyyar APC za ta zabi wadanda za su kada kuri’a domin a tsaida ‘yan takara a matakin jihohi da na kasa.
Korafin da ake yi shi ne takardar da za a kai wa uwar jam’iyya na dauke da sunayen wasu da sun sauya-sheka daga APC ko ba su da lafiya, ko ma sun mutu.
Asali: Twitter
Sashe na 12.1 (v) na tsarin mulkin APC ya sa tsofaffi da ‘yan majalisar tarayya masu ci da shugabannin majalisar dokoki a cikin masu fito da ‘yan takara.
Wasu jihohin da ake zargin za ayi rikici
Wata majiya ta shaidawa manema labarai cewa zai yi wahala a gudanar da wannan zabe a wasu jihohi saboda irin kwamacalar da suka cika APC a jihohi.
Rigima ta kaure tsakanin ‘ya ‘yan APC na reshen jihar Oyo, har sai da ta kai uwar jam’iyya ta tsoma baki. Yanzu haka wannan rikici ya shiga wasu jihohi.
Sauran jihohin da aka samu wannan matsala a game da sunayen masu fito da ‘dan takara akwai Benuwai, Filato, Ogun, Ribas, Imo, Zamfara, Legas da Kano.
An samu matalsa tun lokacin Mala Buni
Wasu na kukan sunayen da aka kai wa kwamitin rikon kwarya na Mai Mala Buni kwanakin baya, cike yake da wasu mutanen da ba su cancanta da zabe ba.
Ana zargin an hada kai da jami’an gwamnati ne an kara sunayen wasu a jerin. Masu neman mulki kan yi haka domin su yi nasarar samun takara a jam’iyya.
Gwamna Wike na neman tutan PDP a 2023
A jiya ne aka ji Gwamna Nyesom Wike ya yi rabon N200m a Kaduna, ya bar tsofaffin ma’aikatan jihar Ribas su na kukan cewa rabonsu da fansho tun a 2014.
Mai neman takarar shugaban kasar ya roki ‘Ya ‘yan jam’iyyar PDP na reshen jihar Kaduna su ba shi 80% na kuri’unsu a zaben fitar da gwani da za a gudanar.
Asali: Legit.ng
