"Ko Kai dan Buhari ne"; Matashi Ya Mayar da N6.8m da Aka Masa Tura bisa Kuskure

• Wani mai amfani da Facebook mai suna Muhammad Bello Buhari ya ce an tura masa Naira miliyan 6.8 bisa kuskure a asusunsa na OPay
• Ya bayyana cewa matar da ta tura kuɗin tana da sunan Igbo, kuma ya mayar mata da kuɗin gaba ɗaya bayan ya fahimci kuskuren
• Matar ta tambaye shi ko shi ne ɗan marigayi tsohon shugaban ƙasa ne, yayin da ya bayyana cewa kuɗin da suka rage masa ba su isa sayen data ta 100MB ba

​​​​​​​​​​​​​​​​​​​​​​​​​Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi

FCT, Abuja - Wani mai amfani da Facebook mai suna Muhammad Bello Buhari ya ba da labarin yadda aka tura masa Naira miliyan 6.8 bisa kuskure a asusunsa na OPay da safiyar yau.

Muhammad ya bayyana cewa matar da ta tura kuɗin tana da sunan Igbo, kuma bayanin da aka rubuta a wajen cinikin ya nuna cewa ba da gangan ta tura kuɗin ba.

Kara karanta wannan

Gwamnatin Tarayya ta faɗi yankuna da jihohin da su ci moriyar tallafin N50,000

Yadda aka tura masa N6.8m bisa kuskure

A cikin wani saƙo da ya wallafa a shafinsa na Facebook, ya ce wayarsa ta kuma nuna alamun kira da aka yi a ɓoye a kusan lokacin da kuɗin suka shigo.

Ya ce lambobin farko da na ƙarshe na lambar wayar da ta kira shi sun yi daidai da lambar asusun OPay da aka turo kuɗin daga gare shi.

Muhammad ya ce da zarar ya fahimci cewa kuɗin ba nasa ba ne, sai ya mayar da Naira miliyan 6.8 ɗin gaba ɗaya ga matar.

Matar ta tambaye shi ko ɗan Buhari ne

Ya bayyana cewa matar ta ci gaba da kiransa a waya, amma yana cikin wani taro, don haka bai samu damar amsa kiranta ba.

Bayan ya kammala taron, sai ya kira ta domin tattauna batun. A cewarsa, tambayar farko da matar ta yi masa ita ce ko shi ne ɗan marigayi tsohon shugaban ƙasa.

Kara karanta wannan

Amsoshin tambayoyin da 'yan Najeriya suka fi yi kan tallafin N50,000

Muhammad ya ce matar ta yi mamakin yadda ya mayar da kuɗin cikin gaggawa ba tare da wata gardama, hayaniya ko jayayya ba.

Ya ce ya yi dariya tare da gaya mata cewa ba shi ne ɗan tsohon shugaban ƙasar ba. Ya kuma bayyana mata cewa tun da farko kuɗin ba nasa ba ne, bai ga dalilin da zai sa ya riƙe su ba.

Ya nuna damuwa

Muhammad ya ce duk da cewa sun kammala tattaunawar cikin lumana, tambayar matar ta ci gaba da damunsa.

Ya yi tambayar ko matar ta danganta gaskiyarsa da halin mutunci da ake dangantawa da marigayi tsohon shugaban ƙasar ne, ko kuma tana ganin ɗan tsohon shugaban ƙasa yana da arzikin da zai sa Naira miliyan 6.8 ba su dame shi ba.

Ya bayyana cewa abin takaici ne yadda a cikin al'umma, wasu mutane ke ganin dole ne a samu wata nasaba ta musamman, kamar arziki ko fitattun iyaye, kafin su yarda cewa mutum zai iya yin abin kirki.

A cewarsa, yin gaskiya da ƙin riƙe abin da ba naka ba ya kamata a ɗauke su a matsayin kyawawan halayen mutum, ba sai an danganta su da matsayin iyali ko yawan dukiya ba.

Kara karanta wannan

Abin da Gwamnatin tarayya take so mutum ya yi idan aka tura masa saƙon tallafin N50,000

Kuɗin da suka rage masa ba su isa sayen data ba

A ƙarshen labarinsa, Muhammad ya yi wani bayani cikin raha, inda ya ce matar ba ta san cewa bayan ya mayar mata da Naira miliyan 6.8 ɗinta ba, kuɗin da suka rage a asusunsa na OPay ba su isa sayen data mai girman 100MB ba.

Ya ƙare saƙonsa da kalaman mamaki da nuna damuwa, inda ya rubuta: “Chaaaaaai😩😭”.

Yadda masu Opay za su nemi tallafi

A wani labarin kuma, kun ji cewa 'yan Najeriya masu amfani da wayoyin hannu na yau da kullum, waɗanda ba su da damar amfani da intanet, za su iya duba ko sun cancanci tallafin N50,000 na Gwamnatin Tarayya ta hanyar danna USSD na OPay.

Wannan dama za ta bai wa kwastomomin OPay damar amfani da sabis ɗin ba tare da sauke manhajar kamfanin ko samun haɗin intanet ba.

Asali: Legit.ng