Gwamna Abba Ya Sake Nada Kwamishinan da Ya Bar Gwamnati bayan Wasu Zarge Zarge
- Gwamna Abba Kabir Yusuf ya miƙa sunan Ibrahim Ali Namadi tare da wasu mutane biyar ga Majalisar Dokokin Jihar Kano domin naɗa su kwamishinoni
- Namadi ya yi murabus a watan Agustan 2025 bayan gwamnan ya karɓi rahoton kwamitin binciken lamarin da ya shafe shi
- Ana sa ran majalisar za ta tantance waɗanda aka zaɓa tare da tabbatar da naɗinsu ranar Litinin da ƙarfe 10:00 na safe
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Sharif Lawal yana da kwarewar shekaru wajen kawo rahotannin siyasa, al'amuran yau da kullum, tsegumi da nishadi
Jihar Kano - Gwamnan Jihar Kano, Abba Kabir Yusuf, ya sake naɗa Ibrahim Ali Namadi, tsohon kwamishinan sufuri, wanda ya yi murabus bayan ce-ce-ku-ce da ya biyo bayan bayar da belin wani mutum da ake zargi da safarar miyagun ƙwayoyi, Sulaiman Aminu Danwawu.
Ibrahim Ali Namadi ya yi murabus ne a watan Agustan 2025, sa’o’i kaɗan bayan gwamnan ya karɓi rahoton kwamitin binciken lamarin da ya shafi tsohon kwamishinan.
Source: Facebook
Gwamnan ya miƙa sunayen mutum 6
A ranar Laraba, 21 ga watan Oktoban 2026, Gwamna Abba Kabir Yusuf ya miƙa sunayen mutum shida ga Majalisar Dokokin Jihar Kano domin naɗa su kwamishinoni da mambobin majalisar zartarwa ta jihar, cewar rahoton jaridar Daily Trust.
Cikin waɗanda aka miƙa sunayensu akwai Ibrahim Ali Namadi, wanda ya taɓa riƙe muƙamin kwamishinan sufuri.
Da yake karanta wasiƙar gwamnan yayin zaman majalisar na ranar Laraba, Kakakin Majalisar, Jibril Ismail Falgore, ya ce sauran waɗanda aka miƙa sunayensu sun haɗa da:
- Mai ritaya Air Commodore Salisu Yusha’u
- Farfesa Sani Lawan
- Hon. Muntari Ishaq
- Dr. Aminu Ibrahim Tsanyawa
- Hon. Idris Garba Mustapha
- Ibrahim Namadi Dala
Yaushe za a tantance waɗanda aka zaɓa?
Shugaban masu rinjaye na majalisar, Hon. Lawan Hussaini Dala, ya tabbatar wa jaridar da amsar sunayen mutanen.
Ya ce an gayyaci waɗanda aka miƙa sunayensu zuwa majalisar ranar Litinin domin tantance su da kuma tabbatar da naɗinsu, da ƙarfe 10 na safe.
Tarihin ce-ce-ku-cen da ya shafi Namadi
Idan ba a manta ba Gwamna Abba Kabir Yusuf ya kori Dala daga muƙaminsa sakamakon zargin cewa ya taimaka wajen samun belin wani da ake zargi da safarar miyagun ƙwayoyi.
Batun belin Sulaiman Aminu Danwawu ne ya jawo ce-ce-ku-ce da ya kai ga murabus ɗin Namadi a watan Agustan 2025, bayan an gudanar da bincike kan lamarin.
Sai dai sabon naɗin da aka gabatar wa majalisar har yanzu yana buƙatar tantancewa da tabbatarwa kafin waɗanda aka miƙa sunayensu su fara aiki a matsayin kwamishinoni.
Source: Facebook
Bashir Ahmad ya shiga kwamitin Gwamna Abba
A wani labarin kuma, kun ji cewa tsohon hadimin marigayi Muhammadu Buhari, Bashir Ahmad, ya samu shiga kwamitin yakin neman zaben Gwamna Abba Kabir Yusuf.
Matashin ‘dan siyasar ya ce an nada shi a matsayin Darektan kwamitin kirkira da yada labarai na zamani na kamfen din APC.
Asali: Legit.ng
