Jihohin Najeriya 3 da Suka fi Kowa Samun Kuɗin Rabon Albarkatun Ƙasa a Farkon 2027

• Delta, Bayelsa da Akwa Ibom sun karɓi kusan kashi 75 cikin 100 na N321.90bn da aka raba wa jihohin da ke samar da man fetur a zangon farko na 2026
• Jihohi huɗu da suka fi samun kuɗin sun karɓi kusan kashi 90% na jimillar rabon, yayin da Enugu da Kogi suka samu ƙananan kuɗaɗe
• Kuɗaɗen albarkatun ƙasa da jihohin masu samar da mai suka raba sun ƙaru daga N671.9bn a 2024 zuwa N1.51tn a 2025

Sani Hamza Daudawa ƙwararren edita ne a fannin nishaɗi, al'amuran yau da kullum, da kuma siyasa, wanda ke da shekaru sama da takwas a aikin jarida

Jihohin Delta, Bayelsa da Akwa Ibom sun karɓi kusan kashi uku cikin huɗu na N321.90 biliyan da aka raba wa jihohin Najeriya masu samar da man fetur bisa tsarin rabon kashi 13 cikin 100 na albarkatun ƙasa a zangon farko na shekarar 2026.

Binciken bayanan da BudgIT Nigeria ta wallafa, bisa alkaluman Hukumar Kididdiga ta Ƙasa (NBS) da Kwamitin Raba Kuɗaɗen Asusun Tarayya (FAAC), ya nuna cewa jihohi 11 ne suka samu rabon kuɗaɗen albarkatun ƙasa tsakanin watan Janairu da Maris na 2026.

Kara karanta wannan

'Yan bindiga sun yi awon gaba da manoma, sun bukaci N100m

Jihohin da suka fi karbar kudi

Delta ce ta fi samun kuɗin, inda ta karɓi N101.60 biliyan, sai Bayelsa da N71.64 biliyan, sannan Akwa Ibom da N69.39 biliyan, kamar yadda rahoton Punch ya nuna.

A haɗe, jihohin ukun sun samu kusan kashi 75 cikin 100 na jimillar kuɗin da aka raba a lokacin. Jihar Rivers ta zo ta huɗu a jerin jihohin da suka fi samun kuɗin, inda ta karɓi N46.09 biliyan.

Hakan na nufin Delta, Bayelsa, Akwa Ibom da Rivers sun karɓi kusan kashi 90 cikin 100 na dukkan kuɗaɗen albarkatun ƙasa da aka raba a zangon farko na shekarar.

Sauran jihohin sun samu kuɗaɗe masu ƙarancin gaske idan aka kwatanta da manyan jihohin masu samar da mai.

Ondo ta karɓi N9.39 biliyan, Edo N7.47 biliyan, Imo N7.39 biliyan, yayin da Abia ta samu N5.42 biliyan. Anambra kuma ta karɓi N3.49 biliyan.

Enugu da Kogi sun samu kuɗi kaɗan

Sabbin jihohin da aka amince da su a matsayin masu samar da mai, wato Enugu da Kogi, sun samu ƙananan kuɗaɗe sosai.

Kara karanta wannan

Cikin gwamnoni 18 ya duri ruwa da EFCC ta fara bincike kan zargin karkatar da kudade

Bayanan sun nuna cewa kowacce daga cikin jihohin biyu ta samu N46,991 kacal a matsayin rabon kuɗaɗen albarkatun ƙasa a zangon farko na shekarar.

Hakan ya nuna babban bambanci tsakanin jihohin da ke da manyan rijiyoyin mai da waɗanda samar da man fetur a yankunansu bai kai wani babban mataki ba.

Kuɗin da Delta ta karɓa a wannan zangon ya ninka na Enugu da Kogi fiye da sau miliyan biyu.

Rabon albarkatun mai ya ƙaru

Kundin tsarin mulkin Najeriya ya tanadi biyan kashi 13 cikin 100 na kuɗaɗen albarkatun ƙasa ga jihohin da ke samar da mai, a matsayin diyya kan albarkatun man fetur da ake hako daga yankunansu.

Rahoton jaridar New Telegraph ya nuna cewa ana ƙayyade rabon ne bisa wasu abubuwa da suka haɗa da yawan man da kowace jiha ke samarwa.

Bayanan tarihi sun nuna cewa kuɗaɗen albarkatun ƙasa da jihohin masu samar da mai ke samu sun ƙaru sosai a 'yan shekarun nan.

Jihohin sun raba N1.51 tiriliyan a shekarar 2025, sama da N671.9 biliyan da suka samu a shekarar 2024.

Adadin jihohin da ke cin gajiyar rabon ma ya ƙaru daga tara zuwa 11 bayan amincewa da Enugu da Kogi a matsayin jihohin da ke samar da mai, ko da yake har yanzu suna samun ƙananan kuɗaɗe saboda ƙarancin matakin samar da mai a jihohin.

Asali: Legit.ng