Sheikh Daurawa Ya Jero Abubuwa 7 da za Su Karawa Mace Daraja
- Sheikh Aminu Ibrahim Daurawa ya bayyana abubuwa bakwai da suka wajaba mace ta kiyaye domin ta samu daraja a Musulunci
- Rahotanni sun tabbatar da cewa malamin ya yi wannan nasiha ne a yayin wa’azi a Jami’ar North West da ke jihar Kano
- Legit Hausa ta rahoto cewa Daurawa ya ce kiyaye wadannan dokoki zai kare mutuncin mace a matsayin ta na ‘ya, uwa da kuma mata
Legit.ng Hausa ta bude tasha a manhajar Whatsapp. Kasance tare da mu don samun rahotanni da dumi-dumi!
Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.
Jihar Kano - Shugaban hukumar Hisbah ta jihar Kano, Sheikh Aminu Ibrahim Daurawa, ya jaddada muhimmancin kiyaye dokokin Musulunci da suka shafi martabar mace.
Ya bayyana cewa addinin Musulunci ya ba mace matsayi na musamman wanda ya kamata ta kula da shi ta hanyar kiyaye tsari da ladubban da aka shimfida.
Source: Facebook
Abubuwan da ake so mace ta kiyaye - Daurawa
A bidiyon wa'azin da malamin ya wallafa a shafinsa na Facebook, ya lissafa wasu abubuwa bakwai da ya kamata mace ta yi domin samun daraja.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Malamin ya bayyana wannan ne a yayin wani wa’azi da ya gabatar a Jami’ar North West da ke jihar Kano.
1. Rufe tsiraici na da muhimmanci
Sheikh Daurawa ya ce wajibi ne mace ta rufe duk wani abu da ya shafi tsiraici a jikinta idan za ta fita daga gida.
Wannan shi ne ginshiƙi na farko da zai kare mutuncin mace, domin bayyana tsiraici na rage martabarta a idon al’umma da kuma addini.
2. Rufe kwalliya wajibi ne
Malamin ya bayyana muhimmancin rufe kwalliya idan mace za ta fita waje, saboda addini bai yarda mace ta je wajen jama’a da kwalliyar da za ta jawo hankalin maza ba.
Hakan yana da muhimmanci ne matuka kasancewar mata sun saba yin kwalliya sosai idan za su fita wani waje.
Source: Facebook
3. Ba a so mace ta fesa turare
Sheikh Daurawa ya ja hankalin mata game da yin amfani da turaren da zai cika wuri da kamshi idan suna cikin jama’a.
Ya ce hakan ba daidai ba ne, sai dai mace za ta iya amfani da turaren da zai hana jikinta tsami, ba wanda ake amfani da shi domin kamshi kawai ba.
4. Hani kan rangada murya a waje
Malamin ya yi gargadi ga mata da kada su rika rage murya ko rangwada ta idan suna magana da maza da ba muharramansu ba.
Sheikh Daurawa ya fadi haka ne saboda rangwada murya zai iya kawo fitina kuma yana rage martabar mace a idon al’umma.
5. Kada ta kebanta da namiji
Shehin ya ce bai halatta mace ta kasance a wuri ita da namiji su kadai ba, domin hakan na iya jawo abin da bai dace ba.
Wannan mataki yana daga cikin hanyoyin da Musulunci ya shimfida domin kare martabar mace a idon duniya.
6. Rashin cudanya da maza
Sheikh Aminu Ibrahim Daurawa ya ce bai kamata mace ta kasance tana cudanya da maza a wajen aiki ko taro ba.
Ya bayyana cewa addini ya tsara a samu tazara tsakanin maza da mata a irin wadannan wurare domin kauce wa fitina da kuma kare mutunci.
7. Kada ta gaisa da namiji ko ya taba ta
A karshe, Sheikh Daurawa ya bayyana cewa bai halatta mace ta gaisa da namiji da hannu ba ko kuma ta bari ya taba jikinta.
Sheikh Daurawa ya jaddada cewa kiyaye wadannan matakai bakwai zai taimaka wajen kare darajar mace a Musulunci.
Ya yi addu’a ga daliban jami’ar da Allah ya basu nasara a dukkan al’amuransu tare da kasancewa masu kiyaye mutuncin su a duk inda suka kasance.
Hukuncin sallah da tufafi mai hoto
A wani rahoton, kun ji cewa Sheikh Jabir Sani Mai Hula ya yi bayani ga musulmai kan hukuncin sallah da tufafi mai dauke da hoto.
Malamin ya bayyana cewa ba ya halatta ga musulmi ya yi sallah da riga mai dauke da hoton 'yan siyasa da sauransu ba.
Sai dai duk da bayanin da ya yi, Dr Mai Hula ya bayyana cewa ba dole ne sai an sake sallar da aka riga aka yi da irin tufafin ba.
Wanda ya tantance Muhammad Malumfashi, babban edita a Legit.ng.
Asali: Legit.ng
