Gwamnonin Arewa Sun Haɗa Kai kan Kisan Hausawa a Edo, Sun Shawarci Al'umma

• Gwamnonin Arewa sun yi Allah-wadai da kisan matafiya a Edo, suna cewa wannan abin takaici ne da ya sabawa hakkin dan Adam
• Gwamna Inuwa Yahaya ya ce dole ne a binciki lamarin tare da hukunta masu laifi, domin hana irin haka faruwa a gaba
• Ya jaddada cewa kowane dan Najeriya na da ‘yancin tafiya ba tare da fargabar farmaki, barazana ko muzgunawa ba
• Ya bukaci gwamnati da jami’an tsaro su dauki matakin gaggawa don kare lafiyar matafiya da hana sake aukuwar irin wannan lamarin

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Gombe - Gwamnonin jihohin Arewa sun yi magana kan kisan wulakanci da aka yi wa ƴan Arewa a jihar Edo.

Gwamnonin sun yi Allah-wadai da kisan matafiya daga Arewacin Najeriya a garin Udune Efandion da ke Uromi a jihar Edo.

Kara karanta wannan

Sheikh Pantami ya jero hanyoyi 3 da za a kama waɗanda suka kashe yan Arewa a Edo

Rabiu Kwankwaso ya yi magana kan kisan Hausawa

Wannan na kunshe ne a cikin wata sanarwa da daraktan yada labaran gwamna Inuwa Yahaya, Ismaila Uba Misilli ya wallafa a shafin Facebook a yau Juma'a.

A bangarensa, Sanata Rabiu Musa Kwankwaso ya yi magana kan harin da aka kai wa ƴan Arewa a jihar Edo.

Kwankwaso ya yi Allah wadai da abin da ya faru inda ya bukaci jami'an tsaro su yi duk mai yiwuwa domin tabbatar da hukunta waɗanda suka aikata laifin.

Kisan Hausawa: Gwamnonin Arewa sun yi Allah-wadai

Sanarwar ta ce shugaban gwamnonin Arewa, Inuwa Yahaya, ya ce wannan hari ya saba wa hakkin dan Adam kuma ba za a yarda da shi ba.

Ya ce gwamnonin sun mika ta’aziyya ga iyalan wadanda suka rasa rayukansu da duk masu alhinin wannan mummunan al’amari.

Sanarwar ta ce:

“Mu na cikin damuwa matuka kan asarar rayuka da kuma yadda aka kai harin.

Kara karanta wannan

Atiku ya bi layin Kwankwaso game da mummunan kisan da aka yi wa ƴan Arewa a Edo

“Dole ne a gano wadanda suka aikata wannan aika-aika, a kama su, kuma a gurfanar da su gaban kuliya ba tare da bata lokaci ba."

Matakin da gwamnonin Arewa suke bukata

Sanarwar ta ce wannan danyen aiki yana barazana ga doka da oda, don haka dole ne hukumomi su gudanar da bincike mai zurfi don hukunta masu laifi.

Gwamna Yahaya ya ce dole ne kowane dan Najeriya ya sami ‘yancin tafiya cikin kwanciyar hankali ba tare da tsoro ko barazana ba.

Ya bukaci gwamnati da jami’an tsaro su dauki matakin gaggawa don hana sake faruwar irin wannan mummunan lamari.

Har ila yau, ya kira ga jama’a da su kwantar da hankalinsu yayin da ake cikin wannan hali na rashin tabbas.

Gwamnan Edo ya magantu kan kisan Hausawa

Mun ba ku labarin cewa Gwamna Monday Okpebholo ya yi Allah-wadai da kisan matafiya ƴan Arewa a garin Uromi da ke ƙaramar hukumar Esan a jihar Edo.

Kara karanta wannan

Gwamna ya yi magana da aka yi wa ƴan Arewa kisan 'wulakanci' a jihar Edo

Gwamna Okpebholo ya ba da umarnin gudanar da bincike domin hukunta duk mai hannu a aikata wannan ɗanyen aiki.

Wannan na zuwa ne bayan wasu matasa sun ƙone Hausawa da ke hanyar dawowa gida domin shagalin ƙaramar sallah bisa zargin cewa masu garkuwa ne.

Wanda ya tantance Muhammad Malumfashi, babban edita a Legit.ng.

Asali: Legit.ng