Wata Sabuwa: Zanga Zanga Ta Barke a Abuja, an Gano Dalili

• Wasu masu rajin kare dimokuraɗiyya sun gudanar da zanga-zanga a babban birnin tarayya watau Abuja a ranar Litinin
• Masu zanga-zangar ta lumana suna adawa ne da dauke zaman kotun sauraron ƙararrakin zaɓen ƙananan hukumomin Benue
• Sun buƙaci shugaban ƙasa Bola Ahmed Tinubu da ya gaggauta ɗaukar matakin hana ɓangaren shari'a durƙushewa

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

FCT, Abuja - Wasu mutane sun gudanar da zanga-zangar lumana a babban birnin tarayya Abuja.

Masu zanga-zangar sun gudanar da ita ne daga majalisar tarayya zuwa Kotun Koli, domin nuna rashin jin daɗinsu kan rikicin shari’a da ke faruwa a jihar Benue.

Jaridar The Cable ta ce masu zanga-zangar, waɗanda suka haɗa da ƙungiyoyin farar hula, ƙungiyoyin kare haƙƙin ɗan Adam, suna ɗauke da kwalaye da rubuce-rubuce.

Rubuce-rubucen suna sukar abin da suka kira ƙwace ikon kotun sauraren ƙararrakin zaɓen ƙananan hukumomin Benue da wasu ƴan siyasa suka yi.

Kara karanta wannan

Dakarun sojoji sun samu nasara bayan sun gwabza da 'yan ta'addan ISWAP

Menene buƙatar masu zanga-zangar?

Sun buƙaci alƙalin alƙalai ta Najeriya, mai shari’a Kudirat Kekere-Ekun, da ta gaggauta sanya baki cikin lamarin tare da kawar da alƙalai masu cin hanci daga ɓangaren shari’a na Najeriya, rahoton The Punch ya tabbatar.

Haka kuma, sun roki shugaba Bola Tinubu da ya dauki matakin gaggawa domin magance matsalar tare da tabbatar da an yi adalci.

Jagoran masu zanga-zangar Igwe Ude-Umanta ya bayyana cewa:

"Muna nan a yau a matsayin ƴan Najeriya da ke son bin doka da oda. Dimokuradiyyarmu tana cikin hatsari, kuma dole ne mai shari’a Kudirat Kekere-Ekun ta ceto ta."

"Muna kuma kira ga Shugaban kasa Bola Ahmed Tinubu da ka da ya zura ido ya bari ɓangaren shari’a durkushe."

"Abin da yake faruwa a Benue ya yi muni a yanzu, domin masu shigar da ƙarar ba su ma shiga cikin tsarin zaɓen ba."

Abin da ke faruwa kan zaɓen Benue

Tun da farko, babban alƙalin jihar Benue, mai shari’a Maurice Ikpembese, ya ba da umarnin mayar da zaman kotun sauraren karar zaben ƙananan hukumomi daga Makurdi zuwa Abuja, saboda dalilan tsaro.

Kara karanta wannan

'Yan sanda sun yi kazamin musayar wuta da 'yan bindiga, an samu asarar rayuka

Sai dai, zaman kotun da aka shirya farawa a Abuja a ranar 10 ga Maris ya samu cikas, bayan da wata babbar kotun tarayya da ke Makurdi ta bayar da umarnin hana yin zaman a Abuja.

Babbar kotun tarayyar ta umarci cewa kotun sauraren ƙararrakin zaɓen ta ci gaba da zaman ta a jihar Benue, saɓanin umarnin da mai shari’a Ikpembese ya bayar tun da farko.

Amma jam’iyyar APC mai mulki ta garzaya zuwa wata babbar kotun tarayya a Abuja don neman a mayar da zaman kotun zuwa Abuja kamar yadda babban alƙalin Benue ya umarta tun farko.

A ranar Juma’a, kotun ta amince da buƙatar APC, ta bada umarnin cewa kotun sauraren ƙararrakin ta ci gaba da zaman ta a NBA House da ke Abuja.

Har ila yau, kotun ta hana kotun sauraren karar ci gaba da zama a jihar Benue.

Gwamnan Benue ya musanta shirin komawa SDP

Kara karanta wannan

Ana batun hadaka, fadar shugaban kasa ta fadi fargabar Tinubu kan 2027

A wani labarin kuma, kun ji cewa gwamnan jihar Benue, Hyacinth Alia, ya musanta jita-jitar da ke cewa yana shirin ficewa daga APC zuwa jam'iyyar SDP.

Gwamna Hyacinth Alia ya bayyana cewa zai ci gaba da zama daram a cikin jam'iyyar APC wacce ta ba shi damar zama gwamna.

Muhammad Malumfashi, babban edita a sashen Hausa na Legit ya duba labarin.

Wanda ya tantance Muhammad Malumfashi, babban edita a Legit.ng.

Asali: Legit.ng