Tinubu Ya Fice daga Abuja, Ya Shilla zuwa Kasar Waje a Karo na 2 cikin Janairu

• Shugaba Bola Tinubu ya tafi Abu Dhabi don halartar taron ADSW na 2025, wanda ke tattauna dabarun ci gaba da tattalin arziki
• Taron shekara-shekara na ADSW da ke gudana a Hadaddiyar Daular Larabawa na samar da hadin kai, da tsare-tsaren makamashi
• Tinubu zai bayyana nasarorin gwamnatinsa yayin taron tare da tattauna hanyoyin karfafa dangantaka tsakanin Najeriya da UAE

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Shugaba Bola Tinubu ya bar Abuja zuwa Abu Dhabi, babban birnin Hadaddiyar Daular Larabawa (UAE), don halartar taron ADSW na 2025.

An rahoto cewa Shugaba Tinubu ya tashi daga bangaren shugaban kasa na filin jirgin saman Nnamdi Azikiwe, Abuja, da misalin karfe 6:30 na yamma.

Wata sanarwa da mai magana da yawun shugaban kasar, Bayo Onanuga ya fitar a shafinsa na X ta nuna cewa za a gudanar da taron ADSW na tsawon mako guda.

Kara karanta wannan

Yarjejeniyar $2bn: Shugaba Tinubu ya roki arziki da ya hadu da Ministan China

Tinubu ya shilla zuwa kasar UAE

Sanarwar Bayo Onanuga ta ce:

"Shugaba Bola Ahmed Tinubu zai bar Abuja ranar Asabar 11 ga watan Janairu domin halartar taron ADSW na 2025 da za a gudanar a Abu Dhabi

"Mai Martaba Sheikh Mohamed bin Zayed Al Nahyan, shugaban UAE, ya gayyaci Shugaba Tinubu domin halartar taron, wanda zai gudana daga ranar 12 zuwa 18 ga Janairu."

Manyan jami’an gwamnati da suka yiwa Tinubu rakiya sun hada da shugaban ma’aikata, Femi Gbajabiamila, da shugaban jam’iyyar APC, Abdullahi Ganduje.

Abin da taron ADSW na 2025 ya kunsa

Taron ADSW na 2025 zai tattara 'yan siyasa, manyan 'yan kasuwa da wakilan kungiyoyin farar hula daga sassa daban-daban na duniya.

Zasu tattauna dabaru da za su kawo saurin samun ci gaban duniya mai dorewa da bunkasa tattalin arziki a matakin kasa da kasa.

Taron shekara-shekarar ya kasance dandamali na duniya na tallafa wa hanyoyin samar da mafita mai dorewa ta tsawon sama da shekaru 15.

Kara karanta wannan

Majalisa ta fara nazarin kasafin kudin N49tr, za a tsefe bukatun gwamnatin Tinubu

Ana jin dadin taron saboda kafa yarjejeniyoyi masu muhimmanci, hadin gwiwa na dabarun ci gaba, da samar da sababbin tsare-tsaren makamashi mai tsafta.

Tinubu zai isar da manufofin Najeriya a UAE

Shugaba Tinubu zai bayyana nasarorin gwamnatinsa da ayyukan sauye-sauye masu nufin bunkasa isasshen makamashi, kimiyya a sufuri da yadda ya inganta kiwon lafiya.

Shugaban kasar zai kuma jaddada aniyar Najeriya wajen magance matsalolin duniya ta hanyar amfani da dabaru masu dorewa da hadin gwiwa.

Baya ga halartar taron, Shugaba Tinubu zai tattauna da shugabannin UAE don kara karfafa dangantaka da tattauna bukatun kasashen biyu.

Wadannan tattaunawar na nufin samar da damarmakin hadin kai tsakanin Najeriya da Hadaddiyar Daular Larabawa.

Tinubu zai dawo Najeriya 16 ga Janairu

Shugaba Tinubu zai yi amfani da wannan dama don kara bayyana aniyar Najeriya kan manufofin ci gaban kasa da kasa.

Ana tsammanin Shugaba Tinubu zai dawo Najeriya a ranar Alhamis, 16 ga Janairu, bayan an kammala taron da ke da muhimmanci ga manufofin dorewar Najeriya.

Kara karanta wannan

Rikici ya ƙara tsanani, an gano mai zuga gwamna ya yi wa Bola Tinubu 'rashin kunya'

Taron ADSW na 2025 zai taimaka wajen tabbatar da ci gaban Najeriya a matsayin jagorar ci gaba mai dorewa a matakin duniya.

Tinubu ya ziyarci sama da kasashe 15 a 2023/2024

A wani labarin, mun ruwaito cewa Shugaban kasa, Bola Ahmed Tinubu ya ziyarci sama da kasashen waje 15 tun bayan rantsar da shi a watan Mayun 2023.

Haka kuma, an gano cewa Shugaba Bola Tinubu ya kwashe sama da kwanaki 96 a kasashen waje yayin wadannan tafiye-tafiyen zuwa kasar Landan, Faransa da sauransu.

Asali: Legit.ng