Gwamnan Neja Ya Dauki Mataki kan Malamin Musulunci da Ke Wa'azi Irin Na Boko Haram

• Gwamnatin Neja ta dakatar da dukkanin ayyukan wani malamin addinin Musulunci da ake zargin da yada akidar Boko Haram
• Shugaban hukumar kula da harkokin addinai ta Neja, Umar Faruk, ya sanar da cewa an mika rahoton malamin ga jami'an tsaro
• Sheikh Faruk ya ce wani kwamiti da aka kafa ya gano cewa malamin ba shi da ilimin addini kuma yana barazana ga tsaron jihar

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Neja - Gwamnatin jihar Neja ta sanar da cewa za ta mika rahoton wani malamin addinin Musulunci da ake kira da Muhammad Bin Muhammad ga jami'an tsaro.

Gwamnatin ta ce ta dakatar da dukkanin ayyukan malamin yayin da jami'an tsaro za su bincike shi kan zargin da ake yi masa na yaɗa 'aƙidar Boko Haram'.

Shugaban hukumar kula da harkokin addinai ta Neja, Umar Faruk, ya shaidawa BBC Hausa cewa gwamnatin jihar ta gudanar da bincike kan ayyukansa.

Kara karanta wannan

A karshe, FBI ta kama wanda ya shirya harin ta'addanci kan sojojin Najeriya a Borno

An binciki malami mai wa'azin Boko Haram

Sheikh Faruk ya ce kwamitin da aka kafa don duba batun ya gayyaci malamin, inda suka tattauna da shi kuma suka gano cewa ba shi da cikakken ilimin addini.

An ce malamin yana gudanar da karatuttuka a garin Tafa da ke jihar Neja, inda ya mallaki makarantar Islamiyya tare da mabiya masu halartar darussansa.

Sheikh Faruk ya ce binciken ya nuna cewa hanyoyin da malamin ke bi da aƙidar da yake yaɗawa suna da hatsari ga tsaron jihar Neja da na ƙasa baki ɗaya.

An dakatar da malami mai akidar Boko Haram

Shugaban hukumar ya ce:

"Saboda haka ne aka yanke shawarar dakatar da shi tare da rufe makarantarsa har sai hukumomin tsaro sun kammala bincike."

Haka kuma, an gano cewa malamin yana kira ga magoya bayansa da su guji duk wani abu da ya shafi zaɓuka da dimokuraɗiyyar kasar nan.

Kara karanta wannan

Gwamna ya yi ƙarin albashi, ya ɗara yadda Tinubu ke biyan ma'aikata

Malamin dai ya jawo ce-ce-ku-ce da dama a yankin arewacin Najeriya saboda kalamansa kan sauran malaman addinin Musulunci a yankin.

Alakar Boko Haram da Salafiyya da Izala

A wani labarin, mun ruwaito cewa Alex Thurston, mataimakin farfesa a jami'ar Georgetown, ya ce Boko Haram na da alaka da kungiyoyin Salafiyya da Izala a Arewacin Najeriya.

Mista Alex ya ce Amurkawa na kallon marigayi Sheikh Ja'afar Mahmud Adam a matsayin wanda jagoran Boko Haram, Muhammad Yusuf ya samu ilimi a wajensa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng