Kai Tsaye: Yadda Zanga Zangar Adawa da Gwamnatin Tinubu Ke Gudana Ana Murnar Samun 'Yanci
A yau Talata 1 ga watan Oktoban 2024 yan Najeriya ke murnar cika shekaru 64 da kasar ta yi na samun yanci daga Burtaniya, sai dai bikin ya ci karo da cikas inda wasu matasa ke zanga-zangar adawa da gwamnatin Bola Tinubu.
Wannan shi ne karo na biyu da matasan ke yin zanga-zangar gama-gari tun bayan hawan Bola Tinubu bayan cika tituna a ranakun 1 zuwa 10 ga watan Agustan 2024.
Masu zanga-zanga sun mamaye tituna a Ondo
Wasu mazauna jihar Ondo sun mamaye titunan Akure, babban birnin jihar, domin nuna adawa da halin da tattalin arzikin ƙasar nan ke ciki a halin yanzu.
Masu zanga-zangar da suka yi dandazo a kwanar cocin Cathedral dake Akure, sun rera waƙoki kala-kala na nuna adawa da gwamnati, cewar rahoton jaridar The Punch.
Sun buƙaci Shugaba Bola Tinubu da ya magance matsalar yunwa, tsadar man fetur, da tsadar wutar lantarki domin rage wahalhalun da jama’a ke fama da su.
Dalillai da suka jawo rashin zanga-zanga a Kano
Rahotanni sun tabbatar da cewa ba a gudanar da zanga-zanga ba a jihar Kano saboda kame yan kungiyar Nigerian Patriotic Front Movement.
An cafke wasu daga cikin shugabannin kungiyar da suka shirya zanga-zanga inda ake ganin na daga dalilin rashin yin zanga-zangar.
Punch ta ruwaito cewa wasu kuwa sun ki fita zanga-zangar saboda tsoron abin da ya faru a fitar da aka yi a watan Agusta.
Yan sanda na raba ruwa ga masu zanga zanga
Yayin da masu zanga-zanga ke tattakinsu a jihar Legas, an hango jami'an tsaro na taimaka masu da ruwan sha domin rage zafi.
A sakon da jami'in hulda da jama'a na yan sandan jihar, Benjamin Hundeyin ya wallafa a shafinsa na X, an hango jami'an su na mika ruwan ga jama'a.
An kuma jiyo wasu na cewa "yan sandan abokanmu ne" a cikin bidiyon.
Masu zanga-zanga sun tare hanya a Legas
Masu zanga-zanga sun tare wata babbar hanya a Legas, lamarin da ya haddasa cunkoson motoci a kusa da Ojota.
Masu zanga-zangar ƙarƙashin jagorancin Hassan Soweto, ɗaya daga jagororin ƙungiyar Education Rights Campaign, sun ajiye mota a tsakiyar titin, yayin da suke nuna damuwarsu kan halin da al'ummar ƙasar nan ke ciki.
Motoci da dama sai dai suka juya suka bi wasu hanyoyin yayin da waɗanda cunkosun ya ritsa da su suka kasa wucewa, cewar rahoton Daily Trust.
Masu zanga zanga sun nufi Freedom Park a Legas
Yanzu haka masu zanga-zanga sun nufi Freedom Park Ojota a Legas a kokarinsu na nusar da gwamnati mawuyacin halin da yan kasar nan ke ciki.
Wasu daga cikin masu zanga-zangar sun taru wurin shakatawar na Freedom Park Ojota, yayin da takwarorinsu a sassan kasar nan ke gudanar da zanga-zanga.
Wani mai amfani da shafin X, Unwanna Assan ya wallafa yadda jama'a ke tattaki su na bayyana bacin ransu.
Masu zanga zanga sun fara tattaki a Legas
Masu zanga-zanga karkashin jagorancin Owoyole Sowore sun fara tattaki a jihar Legas domin nuna bacin ransu kan yunwa da talauci da yan kasa ke ciki.
AIT ta wallafa cewa masu zanga-zangar sun samu rakiyar jami'an tsaro domin tabbatar da lafiyar masu tattakin.
A bayanin da Sowore ya yi, ya ce babu wani abu da kasar nan za ta nuna na a zo a gani da gwamnati ta yi.
Ya nemi gwamnati ta saki masu zanga-zangar Agusta da #EndSARS da jami'an tsaro su ka garkame.
Masu zanga-zanga sun tura bukatu 3 ga Tinubu
Jagororin zanga-zanga a jihar Lagos sun tura bukatu guda uku ga Shugaba Bola Tinubu kan halin kunci.
Shugabannin sun bukaci dawo da tallafin mai da tabbatar da gyara matatun mai sai kuma mambobin Majalisar Tarayya su fara karbar mafi ƙarancin albashi.
Masu zanga-zanga sun tura bukatu 3 ga Tinubu
Shugabanni da ke zanga-zanga a jihar Lagos sun tura bukatu guda uku ga Shugaba Bola Tinubu.
TThe
Sowore ya bukaci a sake Nnamdi Kanu
Dan takarar shugaban kasa, Omoleye Sowore ya bukaci sakin shugaban kungiyar IPOB, Nnamdi Kanu daga inda ake tsare da shi.
Sowore ya kuma bukaci sakin dukan wadanda aka cafke ba bisa ka'ida ba musamman a lokacin zanga-zanga, cewar rahoton The Guardian.
Ƴan daba sun mamaye filin zanga-zanga
Ƴan daba sun mamaye filin zanga-zangar da aka yi amfani da shi wajen zanga-zangar #EndadBadGovernance a watan Agusta a dandalin Pleasure Park da ke birnin Port-Harcourt babban birnin jihar Rivers.
Ƴan daban ɗauke da bulalai sun mamaye filin inda suka ce ba su son wata zanga-zanga a jihar Rivers, cewar rahoton tashar Channels tv.
Ƴan barandan sun yi barazanar cewa za su lakaɗa duka ga duk wani ɗan jaridan da ya kuskura ya yi musu bidiyo.
Yan sanda sun tarwatsa masu zanga zanga
Jami'an yan sandan kasar nan sun tarwatsa dandazon masu zanga-zanga da borkonon tsohuwa a Abuja.
Jama'ar kasar nan sun yi shirin bayyana rashin jin dadin manufofin gwamnati a ranar zagayowar murnar samun yanci.
Kafin a tarwatsa su dai, mutanen na dauke da kwalaye, inda su ke neman "a kawo ƙarshen rashin shugabanci nagari" tare da wake-waken "yunwa muke ji."
Dan takarar shugaban kasa, Omoyele Sowore ya iso wurin zanga-zanga
Tsohon dan takarar shugaban kasa a zaben 2023, Omoleye Sowore ya isa wurin da ake gudanar da zanga-zanga a jihar Lagos.
A wani faifan bidiyo da The Guardian ta wallafa, an gano Sowore a wurin zanga-zangar inda mutane ke shewa da murna.
Sowore a makon da ya gabata ya sha alwashin jagorantar zanga-zanga inda ya ce bai tsoron zaman gidan yari.
Jami'an tsaro sun mamaye Eagles Square
Yanzu haka jami'an tsaro sun rufe hanyar da za ta kai masu shirin zanga-zanga a babban filin taro na Eagles Square da ke Abuja.
Masu ababen hawa da yan jarida sun gaza shiga yankin domin gudanar da ayyukansu.
Jaridar Punch ta wallafa cewa Eagles Square a makare ta ke da jami'an tsaro a ciki da wajen filin taron, duk da cewa masu zanga-zanga sun nuna sha'awar amfani da filin domin taronsu.
Masu zanga zanga sun bijirewa sabon taken Najeriya
Wasu matasa da ke zanga-zanga a jihar Lagos sun gudanar da tsohon taken Najeriya domin nuna rashin jin dadinsu da ƙasar.
The Guardian ta wallafa faifan bidiyon masu zanga-zangar inda suka bijirewa sabon taken Najeriya da aka dawo da shi.
Wanann na zuwa ne yayin da ake cigaba da gudanar da zanga-zangar adawa da gwamnatin Tinubu saboda halin kunci da ake ciki.
Sharif Lawal Sharif Lawal ma'aikacin jarida ne wanda ya samu gogewa a harkar aikin jarida. Ya yi digirinsa na farko a jami'ar Ahmadu Bello (ABU) da ke Zaria. Ya samu horo daga Reuters kan aikin jarida da tantance labarai. Za a iya tuntubarsa ta Sharif.lawal@corp.legit.ng
Abdullahi Abubakar (Hausa editor) Marubuci kuma kwararren ɗan jaridan da ya shafe shekaru 3 yana rubutu a fannin siyasa da harkokin yau da kullum. Ya kammala digirin farko a jami'ar Maiduguri. Ya samu horon aikin jarida a Reuters da AFP, ya sha halartar tarukan karawa juna sani game da bincike da adabi. Tuntube shi a abdullahi.abubakar@corp.legit.ng.
