Harin Masallacin Kano: Za a Fara Shari’ar Matashin da Ya Kona Mutane da Asuba

• Wata kotun shari’ar musulunci da ke zamanta a Kano za ta fara sauraron shari'ar matashin da ake zargin ya bankawa masallaci wuta a Gezawa
• Kotun ta sanya ranar 4 ga watan Yuli, domin fara sauraron shari'ar Shafi’u Abubakar kan tuhume-tuhume uku da gwamnati ke yi masa
• An ce Shafi’u ya cinnawa masallacin wuta tare da kulle kofofinsa a ranar 15 ga watan Mayu, inda akalla mutane 21 suka mutu daga wutar

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Jihar Kano - Wata kotun shari’ar musulunci da ke zamanta a Kano ta sanya ranar sauraron karar da aka shigar kan matashin da ya banka wuta a wani masallaci da ke garin Gezawa.

Kara karanta wannan

Bayan kama Donald Trump da laifuffuka, shin zai iya takarar Shugaban kasar Amurka?

A ranar Juma'a kotun ta sanya ranar 4 ga watan Yuli, domin fara sauraron shari'ar Shafi’u Abubakar, mai shekaru 38, kan laifin kona masallata tare da ajalin mutane 21.

Ana tuhumar matashin da laifuffuka 3

Ana tuhumar Abubakar wanda ke zaune a karamar hukumar Gezawa a Kano, da aikata barna da wuta, haddasa mummunan rauni da kuma kisan kai, in ji rahoton The Nation.

An ruwaito cewa laifuffukan sun ci karo da tanadin sashe na 336, 247 da 221 na dokar shari’a ta jihar Kano.

A zaman kotun na yau, Lauyan masu gabatar da kara daga ma’aikatar shari’a ta Kano, Mista Salisu Tahir ya shaida wa kotun cewa ya karbi kwafin kundin karar daga hannun ‘yan sanda.

Tahir ya ce:

"Muna neman karin wa'adi domin sake gurfanar da shi gaban kotu wanda zai ba mu damar kara yawan wadanda suka mutu daga 14 zuwa 19 da kuma karin shaidu."

Kara karanta wannan

"Karancin kudi": Kungiyar ASUU ta tsunduma yajin aiki a jami'ar Kano, ta bayyana dalili

Wanda ake zargi ya samu lauya

Ana zargin Shafi’u Abubakar da cinnawa masallaci wuta a kauyen Larabar Abasawa da ke Gezawa a Kano tare da kulle kofofinsa a ranar 15 ga watan Mayu.

Jaridar Vanguard ta ruwaito cewa wanda ake tuhumar ya amsa cewa ya aikata laifuffkan guda uku da ake tuhumarsa da su.

NAN ta ruwaito cewa Auwal Abubakar, daga majalisar lauyoyi ta LACN ya sanar da cewa zai kare wanda ake zargin bayan kotu ta nemi majalisar ta ba da lauyan da zai kare Shafi’u.

Mutane 21 sun mutu a harin masallaci

A wani labarin, mun ruwaito cewa adadin masallatan da suka rasu sakamakon harin da wani matashi ya kai masallacin da suke Sallah a garin Gezawa ya kai 21.

Wani mazaunin kauyen Larabar Abasawa inda lamarin ya faru ya bayyana cewa sun binne gawar mutum 21 yayin da wasu mutum hudu ke kwance a asibiti rai hannun Allah.

Muhammad Malumfashi, babban edita a sashen Hausa na Legit ya duba labarin.

Asali: Legit.ng