Gwamnatin Tinubu za ta Binciki Yadda Buhari Ya Jinginar Filayen Jirgin Sama

• Gwamnatin tarayya karkashin jagorancin Bola Ahmed Tinubu ta bayyana cewa za ta binciki yadda gwamnatin Muhammadu Buhari ta bayar da jinginar filayen jirgin sama
• A shekarar 2023 gwamnatin tarayya ta amince a jinginar da filin jirgin saman Nnamdi Azikiwe da ke Abuja da kuma Mallam Aminu Kano da ke Kano domin farfado da su
• Amma a taron cikar shekarar Bola Tinubu daya a kan mulki, Ministan sufurin jirgin sama, Festus Keyamo ya ce za a duba domin gano muhimman bayanai kan jinginar da su

A'isha Ahmad edita ce a sashen Hausa na Legit. Tana da ƙwarewa wajen rubutun labarai da rahotanni tsawon shekaru uku. Ta kware a kawo rahotannin, al'amuran da su ka shafi mata da yara da siyasa.

Abuja- Ministan sufurin jiragen sama, Festus Keyamo ya bayyana shirin gwamnatin Bola Ahmed Tinubu na sake bibiyar jinginar da filayen saman kasar nan biyu da gwamnatin Muhammadu Buhari ta yi.

Kara karanta wannan

Gwamnatin Tinubu ta dakatar da muhimmin aikin da Buhari ya fara a Najeriya

Ya bayyanawa taron masu ruwa da tsaki yayin bikin cika shekara daya na gwamnatin tarayya cewa za a sake waiwayar batun ne domin bankado gaskiyar yadda jinkinar ta kasance.

Premium Times ta wallafa cewa ministan ya ce ba za a dukunkune jinginar filayen ba tare da bayyana gaskiyar abun da ke kunshe cikinsa ba.’

An dakatar da jirgin Nigeria,’ Keyamo

Ministan sufurin jirgin sama, Festus Keyamo ya ce gwamnati na kan bakarta na dakatar da jirgin saman Najeriya na Nigeria Air da gwamnatin Buhari ta samar a karshen mulkinta.

Ya bayyana cewa sun gano jirgin na kasar Ethiopia ne da aka makala masa tutar Najeriya wanda tsohon minister Hadi Sirika ya kaddamar.

Buhari ya jinginar da filayen jirgin sama

The Guardian ta wallafa cewa tsohon ministan ya bayyana cewa gwamnatin wancan lokaci za ta bayar da jinginar manyan filayen jirgin sama guda hudu.

Kara karanta wannan

Tinubu zai kaddamar da jirgin kasan Abuja, ya yi albishir 1 ga yan Najeriya

Duk da a shekarar 2023, shi ma Festus Keyamo ya goyi bayan jinginar da filayen jirgin saman, amma yanzu ya ce za a sake bincikar yadda aka bayar da su jingina.

Ana binciken gwamnatin Buhari kan Nigeria Air

A baya mun kawo muku labarin cewa gwamnatin tarayya ta dakatar da jirgin saman Najeriya, Air Nigeria har sai baba ta gani domin gudanar da bincike.

Ministan sufurin jiragen sama, Festus Keyamo ya bayyana cewa sun gano kura-kurai cikin yadda aka samar da jirgin, saboda haka an dakatar da shi har sai an gama dubawa.

Muhammad Malumfashi, babban edita a sashen Hausa na Legit ya duba labarin.

Asali: Legit.ng