Bola Tinubu Ya Shiga Ganawar Sirri da Ribadu, Manyan ECOWAS a kan Yaki da Nijar
- Shugaba Bola Ahmed Tinubu ya shiga ganawa a kan sha’anin tsaro da jagororin kungiyar ECOWAS
- Tun da aka kifar da Mohammed Bazoum, Shugaban Najeriya da ECOWAS su ke ta fadi-tashi a Afrika
- Yanzu haka Dr Omar Touray da Abdulsalami Abubakar su na Aso Rock, sun hadu da Shugaba Tinubu
Abuja - Shugaban Najeriya Bola Ahmed Tinubu yanzu haka ya na ganawa da wasu a cikin masu ruwa da tsaki na kungiyar ECOWAS.
Makasudin tattaunawar ba za ta rasa alaka da rikicin da ake neman shiga a yammacin Afrika a sakamakon juyin mulki a Nijar ba.
Vanguard a rahoton da ta fitar ta ce ana zaman ne domin ganin yadda za a shawo kan matsalar da ake ciki tun bayan kifar da farar hula.
Asali: Facebook
ECOWAS ba ta tare da Sojojin Nijar
Kungiyar ECOWAS ta kasashen yammacin Afrika ta na son ganin an koma mulkin farar hula a Nijar da ke da iyaka da kasar Najeriya.
DUBA: Shigo shafin Legit.ng na manhajar Legit.ng na Telegram! Kada ka bari komai ya wuce ka
Shugaban hukumar ECOWAS, Dr Omar Touray da shugaban tawagar da aka tura zuwa Nijar, Abdulsalami Abubakar su na wajen taron.
Mai ba shugaban Najeriya shawara a kan harkar tsaro, Mallam Nuhu Ribadu ya na cikin wadanda aka sa labule da shi domin a tattauna.
Rahoton Abdulsalami Abubakar
Da Janar Abdulsalami Abubakar su ka hadu da sojojin tawaye a Niamey, sam bai bari ya shaidawa duniya yadda zamansu ya kaya ba.
Tsohon shugaban Najeriyan ya ki cewa uffan a jamhuriyyar Nijar, ya ce Mai girma Bola Tinubu ne zai fara jin yadda aka yi tukuna.
Tattaunawar ta na zuwa ne yayin da mutane har da Nasir El-Rufai su ke ganin alakar Arewacin Najeriya da Nijar ta fi karfin a jawo yaki.
An kifar da gwamnati a Nijar
Mai girma Bola Tinubu shi ne shugaban ECOWAS, karbar wannan kujera ke da wuya, sojoji su ka shirya juyin mulki a makwabtan na sa.
A makon jiya Janar Abdourahamane Tchiani ya yi wa 'Yan jahmuriyyar Nijar jawabi a gidajen talabijin, ya nuna sai 2026 za su bar mulki.
Asali: Legit.ng
