'Yan Bindiga Sun Kai Farmaki a Jihar Kogi, Sun Halaka Mutane Da Dama
- Miyagun ƴan bindiga sun kai wani mummunan a farmaki cikin tsakar dare a wani ƙauye cikin jihar Kogi
- Ƴan bindigan sun kai farmakin ne a cikin ƙauyen Ejule da ke a ƙaramar hukumar Ofu ta jihar a daren ranar Alhamis
- Ana fargabar mutane da dama sun rasa rayukansu a harin inda aka gano gawar mutum biyu daga cikin waɗanda suka rasu
Jihar Kogi - Wasu ƴan bindiga sun farmaki ƙauyen Ejule a cikin ƙaramar hukumar Ofu ta jihar Kogi inda suka halaka mutane da dama.
Jaridar Daily Trust ta kawo rahoto cewa harin ya fara da misalin ƙarfe 3:00 na daren ranar Alhamis.
Asali: UGC
Rahotanni sun tabbatar da wani ɗan Achaɓa da matar wani shugaban matasa a garin sun baƙunci lahira a harin.
Harsashi ne ya samu ɗan Achaɓan yayin da matar tana tsaka da neman mijinta ne lokacin da harbin ya iso kanta inda nan ta ke tace ga garinku nan.
LURA: Shin kana son bamu labari da tattaunawa da marubutanmu? Tuntubemu a info@corp.legit.ng
Haka kuma ƴan bindigan sun ƙona wani gida a yayin da suka kai a ƙauyen.
Wani mazaunin garin ya bayyana cewa:
"Ba zan iya faɗin adadin mutanen da suka mutu ba. An gano biyu daga cikinsu, ɗaya ɗan Achaba yayin da ɗayar matar wani shugaban matasa ce na garin."
"Har yanzu ƙura bata lafa ba, amma an ga gawarwaki a bakin hanya. Babu wanda zai iya fitowa waje yanzu."
Na kusa da gwamna ya tabbatar da aukuwar harin
Mai ba gwamnan jihar shawara kan harkokin tsaro, Kwamanda Jerry Omadara (mai ritaya), ya tabbatar da aukuwar amma ya bayyana cewa bai samu cikakkun bayanai ba dangane da harin.
Ya zuwa ƙarfe 9:30 na safiyar ranar Alhamis rahotanni sun nuna cewa mutane basu fito daga cikin gidajensu ba yayin da wasu kuma suka arce suka bar garin.
Kakakin rundunar ƴan sandan jihar, SP William Aya, bai ɗauki kiran wayar da aka yi masa ba lokacin da aka so jin ta bakin shi.
'Yan Bindiga Sun Sace Basarake Da Matarsa a Jihar Kogi
A wani labarin na daban kuma, ƴan bindiga sun yi awon gaba da Oba na Odofin da matarsa suna cikin tafiya a ƙaramar hukumar Yagba ta Gabas a jihar Kogi.
Ƴan bindigan sun ɗauke Shedrack Durojaiye Obibeni da mao ɗakinsa ne lokacin da suke kan hanyarsu ta zuwa wata unguwa.
Asali: Legit.ng
