Wasu ’Yan Bindiga Sun Kashe Jami’an NSCDC 3 da Fararen Hula 2 a Jihar Imo
- Wasu tsagerun ‘yan ta’adda sun hallaka jami’an tsaro a jihar Imo, lamarin da ya jawo hargitsi a yankin da abin ya faru
- An ruwaito cewa, baya ga jami’an tsaron, an kashe wasu fararen hula biyu da ke zaune a gefen inda suka farmaka
- Ya zuwa yanzu dai rundunar ‘yan sanda ta tabbatar da faruwar lamarin, amma NSCDC bata ce komai ba
Jihar Imo - Wasu tsagerun ‘yan bindiga a ranar Litinin suka kashe wasu jami’an tsaro uku na hukumar NSCDC da kuma wasu fararen hula biyu a jihar Imo, Punch ta ruwaito.
An ruwaito cewa, ‘yan bindigan sun dura kasuwar Ekelsu ne da ke yankin Obiangwu na karamar hukumar Ngor Okpala ta jihar, inda suka harbe jami’an na NSCDC da mutanen biyu.
Ya zuwa yanzu, rahoto bai bayyana bayanan mutum biyun da aka kashe ba a tare da wadannan jami’an tsaron da ke bakin aiki.
Kara karanta wannan
Abin tausayi: Bayan rikicin zabe, 'yan bindiga sun hallaka 'yan sanda a wata jiha
Asali: UGC
Yadda lamarin ya faru daga bakin ganau
Wata majiya daga yankin ta bayyana cewa, an farmaki wadannan bayin Allah ne da sanyin safiyar yau Litinin 27 ga watan Maris.
DUBA: Bibiyemu a Instagram don samun labarai masu muhimmanci kai tsaye cikin manhajar
A cewar majiyar, jami’an na NSCDC na cikin motarsu ne a lokacin da ‘yan ta’addan suka yi musu kwanton bauna tare da kashe su da wasu mutane da ke gefe.
A cewarta, yanzu dai jami’an tsaro sun mamaye yankin tare da kokarin kame duk wasu da ake zargi da aikata barnar a yankin, matasa sun shiga taitayinsu.
Har yanzu ba a tattara gawarwakin ba
Ta kuma kara da cewa, ya zuwa lokacin hada wannan rahoton ba a tattara gawarwakin matattun ba daga inda hakan ya faru.
Sai dai, da aka tuntubi jami’in hulda jama’a na rundunar ‘yan sandan jihar, Henry Okoye ya shaidawa The Nation cewa, lamarin ya faru ne da daren jiya Lahadi.
Kara karanta wannan
Kaico: 'Yan ta'adda sun kone wani babban kotu a wata jiha, sun barnata kayan aiki
Kakakin NSCDC, Chimeziri Lowell bai dauki waya ba a lokacin da majiya ta so jin ta bakinsa game da lamarin.
An harbe ‘yan sanda a jihar Enugu
A wani labarin, an naqalto yadda wasu tsagerun ‘yan bindiga suka hallaka jami’an tsaro na ‘yan sanda a jihar Enugu.
Lamarin ya haifar da cece-kuce, inda aka ga gawarwakinjami’an a cikin kwalbatin da ke bakin titi.
Ana yawan samun aukuwar hare-hare kan jami’an tsaro a yankunan kudancin kasar nan, musamman Kudu maso Gabas.
Asali: Legit.ng
