Jigawa: Kotu ta daure masu garkuwa da mutane tsawon shekaru 28 bisa sace yarinya
- Wata kotu a jihar Jigawa ta yankewa wasu mutane da suka aikata laifin garkuwa a wani yankin jihar
- Hakazalika, an yankewa wani matrashi hukuncin kisan kai ta hanyar rataya bisa laifin kisan kai a wani yankin
- Ana ci gaba da samun rikice-rikicen sace mutane tare da kisan kai a sassa daban-daban na Najeriya
Jigawa - Babbar Kotun Jihar Jigawa mai zamanta ta a Dutse, babban birnin jihar ta yanke wa wasu masu garkuwa da mutane uku hukuncin daurin shekaru 28 da watanni biyar a gidan yari ba tare da zabin tara ba.
An samu wadanda ake tuhumar da laifin yin kutse, hada baki da kuma sace wata yarinya mai suna Fatima Abdirrahman, dake karamar hukumar Taura ta jihar, inji Leadership.
Asali: UGC
Da yake jawabi yayin yanke hukuncin, alkalin kotun, Mai shari’a M.A Abubakar, ya ce bayan gabatar da shaidu uku ta bakin lauya mai shigar da kara, kotun ta gamsu da cewa babu shakka wadanda ake zargin sun aikata laifin.
A cewarsa:
Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!
“Wadanda ake zargin sun aikata laifin hada baki, zagon kasa, da kuma yin garkuwa wanda ya sabawa sashe na 272 karamin sashe na 273 na kundin laifuffuka na jihar Jigawa.
“Bayan samun Musa Garba na karamar hukumar Ringim, Isah Sule Wangara na karamar hukumar Dutse da Shu’aibu Haruna na karamar hukumar Taura da aikata wadannan laifuka, kotun ta yanke musu hukuncin daurin shekaru 28 da watanni biyar a gidan yari.”
Kotu ta yankewa wani hukucin kisa ta hanyar rataya
Hakazalika, wata babbar kotun jihar Jigawa dake zamanta a karamar hukumar Birninkudu ta jihar ta yankewa wani matashi mai suna Zubairu Idris dan shekaru 30 hukuncin kisa ta hanyar rataya bisa laifin aikata laifin kisan kai.
An gurfanar da Zubairu a gaban kotu a ranar 11 ga watan Oktoba, 2017 kan zargin daba wa wani Abubakar Abubakar wuka a kauyen Baji.
Da yake yanke hukunci, alkalin kotun, Mai shari’a Musa Ubale, ya ce an samu wanda ake zargin da laifin kisan kai wanda ya sabawa sashe na 221 (B) na kundin laifuffuka na Jigawa.
A cewar alkalin yayin hukunci:
“Kotu ta samu Idris da laifin kisan kai, don haka an yanke masa hukuncin kisa ta hanyar rataya."
An cafke mutumin da ya tada hankalin jama'a da ikrarin Boko Haram sun shigo gari
A wani labarin, Daily Trust ta rahoto cewa, rundunar ‘yan sanda a jihar Ogun ta cafke wani mutum mai suna Wakilu Ogundairo bisa zarginsa da tayar da hankalin jama'a da cewa kungiyar Boko Haram ta farmaki garin Imosan-Ijebu da ke karamar hukumar Ijebu-Ode a jihar.
Abimbola Oyeyemi, kakakin rundunar ‘yan sandan jihar a wata sanarwa da ya fitar ranar Alhamis, ya ce wanda ake zargin ya yi ikrari a sakon murya ta Whatsapp da aka yada ga jama’a kan wannan lamari.
Ogundairo ya yi ikirarin cewa maharan na dauke da makamai, lamarin da ya haifar da firgici a tsakanin mazauna yankin da kuma kewayensa.
Asali: Legit.ng
