Labari da ɗuminsa: Gwamnatin Kogi ta naɗa sabon Attah na Igala
- Majalisar kolin jihar Kogi ta amince da nada Prince Mathew Alhaji Opaluwa a matsayin Attah na Igala
- Majalisar ta amince da nadin sabon basaraken ne yayin taronta karo na 6 da ta gudanar a ranar Litinin a Lokoja
- Kafin nadinsa, Prince Mathew Alhaji Opaluwa mataimakin direkta ne na hukumar zabe mai zaman kanta INEC
Jihar Kogi - Majalisar koli na jihar Kogi ta amince da nadin Prince Mathew Alhaji Opaluwa a matsayin Attah na masarautar Igala kamar yadda The Sun ta ruwaito.
Majalisar ta bada amincewarta ne yayin taronta na 6 da aka yi a dakin taronta a gidan gwamnatin jihar da ke Lokoja a ranar Litinin.
Source: Facebook
Daily Trust ta ruwaito cewa Opaluwa shine na tara cikin 16 kuma na hudu cikin 'ya'ya maza na marigayi Cif Opaluwa na gidan saurauta na Aju Ameacho a masarautar Igala.
Shin kana da labarin da ka/ki ke son an wallafa ma ka/ki? Ka tuntubemu a info@corp.legit.ng!
Takaitaccen tarihin sabon basaraken
Sabon Attah da aka nada ya fara karatunsa ne a St Boniface Primary School, Idah a 1975 sannan ya yi gaba zuwa St Peter’s College, Idah inda ya samu shaidar kammala sakandare ta West African School Certificate (WASC), a 1980.
Ya hallarci makarantar sharen fage da ke Ugbokolo a jihar Benue a 1981 sannan ya tafi Jami'ar Ahmadu Bello da ke Zaria a wannan shekarar ya samu digiri a bangaren nazarin kasuwanci a 1986.
Kazalika, ya yi digiri na uku (MBA) a bangaren koyan dabarun kasuwanci a 1997.
Kafin nadinsa, ya yi aiki a hukumar zabe mai zaman kanta INEC a 1988 har ya samu karin girma ya zama mataimakin direkta.
Ya yi aiki a wurare da dama a kananan hukumomin jihar Kogi, Kaduna da babban birnin tarayya Abuja a matsayin jami'in zabe yayin da a Katsina shine ke kula da sashin bincike da adana bayanai na hukumar zaben.
Asali: Legit.ng
