El Rufai, Shetty da Mutane 17 da Tinubu Ya ba Mukamai Amma daga baya Ya Soke Nadin

• Shugaba Bola Tinubu ya yi nade naden mukamai, amma daga baya ya soke su, abin da ya jawo ce-ce-ku-ce a cikin al'ummar kasar
• Anamayi Dorcas ta ce soke nadin mukami na iya shafar lafiyar kwakwalwa mutumin da aka sanya wa ran samun mukamin da farko
• Legit Hausa ta jero mutane 10 da Tinubu ya ba mukamai amma daga baya ya soke nadin, ciki har da Maryam Shetty, Nasir El-Rufai

Sani Hamza, kwararren edita ne a fannin nishadi, al'amuran yau da kullum da kuma siyasa. Sani yana da shekaru sama da biyar a aikin jarida

Abuja - Shugaba Bola Ahmed Tinubu ya yi nade-nade da dama tun bayan hawansa mulki a watan Mayun shekarar 2023.

Sai dai kuma, shugaban kasar ya sha soke nade naden da ya yi bayan sanar da nadin a fili, lamarin da ya jawo 'yan kasar suka fada diga ayar tambaya.

Mutane da dama na ganin bai kamata a ce hakan tana faruwa ba, domin akwai ka’idojin nade-nade da aka fayyace gwamnati na bi a cewar rahoton Daily Trust.

Kara karanta wannan

Zanga zanga: Amnesty ta yi zargin ana son 'karasa' matashin da 'yan sanda suka jefawa gurneti

Wani tsohon minista a gwamnatin Umaru Yar’Adua, wanda ya bukaci a sakaya sunansa, ya bayyana yadda ake nade-naden da ke bukatar sahalewar shugaban kasa.

Yadda ake tantance wadanda za a ba mukamai

Ya ce ana fara duba cancanta, kwarewa, tarihin aiki da kuma la’akari da daidaito na yankuna da addinai kafin a zabi wanda za a ba mukami.

Daga nan sai a mika sunan mutumin ga hukumomin tsaro don bincike domin tabbatar da cewa ba shi da wata alaka da aikata laifi.

Bayan samun amincewar tsaro, ana iya gayyatar mutumin ya gana da shugaban kasa, shugaban ma’aikata, ko wanda shugaban ya wakilta kafin sanarwa.

Abin da ke biyo bayan tantance mutane

Tsohon ministan ya ce a yanzu ta kai ga ana duba rubuce-rubucen mutum a shafukan sada zumunta don sanin ra’ayinsa kan gwamnati.

Wani ma’aikacin fadar shugaban kasa ya tabbatar da cewa akwai abubuwa masu yawa da ake la’akari da su wajen nada mukami.

Kara karanta wannan

'Ku koyi rayuwa a haka': Tinubu ya ba yan Najeriya satar amsa kan tsadar wutar lantarki

Weekend Trust ta gano cewa idan aka sanar da sunan mutum, to yana nuna cewa an kammala dukkannin bincike kuma an cika ka’idoji na nadinsa.

Tinubu na soke nadin mutum bayan tantancewa

Amma a karkashin gwamnatin Tinubu, ko bayan an fitar da sunayen wadanda za a ba mukamai, ana iya soke nadin mutum, wasu lokuta ma ko da kuwa ya kama aiki.

Wannan yanayi ya sa mutane suka fara kaffa-kaffa wajen taya wadanda aka sanar za a ba murna, don gudun kunyar soke nadin nasu daga baya.

Soke nadin mutum bayan sanar da nadinsa ya zama ruwan dare a gwamnatin Tinubu wanda har ya haifar da shakku game da gaskiyar nade-naden da ake sanarwa.

Mutane 10 da Tinubu ya soke nadin mukamansu

Legit Hausa ta tattaro jerin mutane 10 da Tinubu ya nada mukamai, amma daga bisani ya soke nadinsu.

1. Maryam Shetty

Abin kunya mafi girma daga cikin ire-iren soke nade-naden da aka yi shi ne batun Maryam Shettima Ibrahim, wacce aka nada so nadawa minista daga Kano.

Kara karanta wannan

Hauhawar farashi: Tinubu ya fadi shirin gwamnatinsa a kan rage tsadar kayayyaki

Sunan Maryam Shetty ya shiga jerin wadanda za a tantance a majalisar dattawa, kuma hakan ya zama abin magana a bainar jama’a.

Ta shirya don tantancewa kamar sauran wadanda aka nada, har ta isa ginin majalisar dattawa a ranar tantancewa tana jiran a kira ta.

Amma sai aka shaida mata cewa an janye sunanta daga jerin wadanda za a tantance.

2. Stella Okotete

Bayan tantance ministoci da jiran tabbatar da su, shugaban majalisar dattawa, Godswill Akpabio, ya yi wani bayani da ya ba mutane mamaki.

Akpabio ya sanar da cewa majalisar dattawa ta dakatar da tabbatar da ministoci uku saboda tana jiran izinin tsaro daga hukumomin da suka dace.

Stella Oketete, daraktar ci gaban kasuwanci a Bankin NEXIM, tana cikin ministocin da aka dakatar da tabbatar da su.

3. Nasir El-Rufai

Na biyu daga cikin ministoci uku da aka dakatar da tabbatar da su shi ne tsohon gwamnan Kaduna, Malam Nasir El-Rufai.

Kara karanta wannan

Sarki ya haura ta katanga yayin da wasu miyagu suka kai farmaki fadarsa

El-Rufai ya fara nuna rashin sha’awar mukamin minista, yana cewa ya riga ya yi irin wannan aiki shekaru 20 da suka gabata.

Duk da haka, ya amince da karbar mukamin ministan bayan Tinubu ya fito a fili ya nuna cewa zai yi aiki da shi kuma har El-Rufai ya mika kansa domin tantancewa.

El-Rufai ya kasance cikin jiran tabbatar da shi a matsayin minista amma ya samu labarin cewa an fasa ba shi mukamin.

4. Sani Danladi Abubakar

Na uku cikin wadanda suka fuskanci irin wannan matsala shi ne Sanata Danladi Abubakar daga jihar Taraba.

An rahoto cewa an janye sunansa ne saboda kotun koli ta hana shi rike mukamin gwamnati har na tsawon shekaru 10.

Sai dai Sanata Danladi ya musanta hakan yayin da yake amsa tambayoyi daga sanatoci a lokacin tantancewar da majalisar dattawa ta yi masa.

Duk da ya kare kansa yayin tantancewar, ba a tabbatar da nadinsa ba.

Kara karanta wannan

An shiga tashin hankali: Bello Turji ya kafa sabon sansanin ta'addanci a jihar Sokoto

5. Imam Ibrahim Kashim

Haka zalika akwai batun Imam Ibrahim Kashim, wanda aka nada a matsayin shugaban Hukumar Gyaran Hanyoyi ta Kasa (FERMA).

An samu cece-kuce sosai bayan sanar da nadin Imam, saboda duka duka shekarunsa 24. Ana ganin ya yi matukar kankanta da rashin kwarewa da mukamin.

Gwamnati ta mika wuya ga matsin lambar jama'a, inda ta soke nadin cikin kasa da mako daya bayan sanarwar, inji rahoton BBC.

6. Rikici a CCT kan shugabancin Umar da Kogo

Haka zalika rikici ya kunno kai a Kotun Ladabtar da Ma’aikata (CCT) inda Danladi Umar da sabon shugaba, Mainasara Kogo, ke ikirarin shugabanci.

Umar ne ya ke jagoranci kotun, amma aka cire shi ta hanyar kudurin majalisar dokoki ta kasa.

Shugaba Tinubu ya nada Kogo a matsayin sabon shugaban CCT a ranar 13 ga Yuli, amma aka samu matsala a hanyar da aka bi wajen cire Umar.

Kara karanta wannan

"Akwai lauje cikin nadi," Atiku ya zargi gwamnati da siyasantar da alkaluman NBS

Lamarin dai ya yi tsamari har da zuwa kotu, wanda hakan ya sa har yanzu Umar ke ikirarin cewan shi ne shugaban kotun CCT.

7. Janye nadin Danfulani a SMDF

Shugaba Tinubu ya nada Yazid Shehu Umar Danfulani a matsayin sakataren zartarwa na Hukumar Ci gaban Harkokin Ma'adinai (SMDF/PAGMI)

An ce wannan ya dogara ne da tsammanin cewa lokacin Fatima Shinkafi a matsayin sakataren zartarwa ya kare.

Fatima Shinkafi ta dage cewa lokacin ta bai kare ba, kuma gwamnati ta sauya shawara a kan wannan inda Tinubu ya soke nadin da aka yi wa Yazid.

8. Shugaba da mambobin SEDC

A wannan watan ne, aka soke nadin Hon. Emeka Atuma, wanda aka sanar da shi a matsayin shugaban hukumar ci gaban Kudu maso Gabas (SEDC), tare da maye gurbinsa da Dr. Emeka Nworgu.

Dukkanin daraktocin zartarwa uku da aka nada a farko, an maye gurbinsu, sannan an nada sabbin daraktocin zartarwa guda biyu.

Kara karanta wannan

An kai hari kan babban layin wuta a Arewa, yankuna sun shiga duhu

Shugaban kasa ya kuma cire daya daga cikin mambobin hukumar, Donatus Eyinnah Nwankpa, sannan ya maye gurbin daraktan zartarwa na kudi, Anthony Ugbo, da Stanley Ohajuruka.

9. Shugaba da mambobin NWDC

Shugaban kasa ya sauya shugabannin farko na Hukumar ci gaban Arewa Maso Yamma (NWDC) tare da sauya su gaba daya 'yan kwanaki da nada su.

A cikin jerin wadanda aka turawa Majalisar Dattijai a karshen Satumba domin nada su akwai Haruna Ginsau a matsayin shugaba, tare da Sanata Tijani Yahaya Kaura da Hon. Abdulkadir S. Usman a matsayin mambobi.

An maye gurbinsu da Alh. Lawal Samai’la Abdullahi a matsayin sabon shugaba, tare da Ja’afar Abubakar Sadeeq da Yahaya Aminu Abdulhadi a matsayin mambobi.

10. Tawagar Watsa Labarai

Wani lamari da ya kara jawo ce-ce-ku-ce shi ne sauye sauyen da Tinubu ya yi a tawagar watsa labarai da sadarwar shugaban kasa.

Tsohon mai magana da yawun shugaban kasa, Ajuri Ngelale, ya ajiye mukaminsa a Satumba, sannan a Nuwamba, aka nada Daniel Bwala.

Kara karanta wannan

Hankalin Tinubu ya tashi da jin labarin mutuwar yara 35, ya ba gwamna sabon umarni

Bwala ya dauka cewa an nada shi domin maye gurbin Ngelale, kuma ya fara aiki da wannan ra'ayi, amma bayan bayyana hakan ga jama'a, Tinubu ya gaggauta yin gyara.

A gyaran da Tinubu ya yi, an canja nadin Sunday Dare, daga mai ba da shawara kan sadarwar jama'a da wayar da kai zuwa mai ba da shawara kan watsa labarai.

Shi kuwa Mista Daniel Bwala, an canza mashi matsayi zuwa mai ba da shawara a bangaren watsa labarai kan tsare-tsaren gwamnati.

'Janye nadi na iya shafar kwakwalwa' - Likita

Anamayi Dorcas, likitar kwakwalwa a asibitin koyar da kimiyya na jami'ar Jos, ta bayyana cewa soke mukaman da Tinubu ke yi na iya taba lafiyar kwakwalwar mutane.

A wata hira da aka yi da Dakta Dorcas ta ce:

“Sanya wa mutum rai kan wani abu, ba wai mukami kawai ba, na iya shafar lafiyar kwakwalwa, musamman ga wanda bai taba rike irin wannan matsayin ba.”

Kara karanta wannan

Fafaroma ya fadi yadda ya tsallake harin kunar bakin wake sau 2 a kasar Iraqi

Ta kara da cewa, idan aka janye nadin to hakan na shafar abubuwa da dama game da mutum ciki har da tunani, rayuwa da kuma canja mu'amalarsa da mutane.

Tinubu ya nada mukamai kusan 100

A wani labarin, mun ruwaito cewa Bola Tinubu ya yi rabon mukamai kusan 100 a makon da ya gabata, inda aka zakulo mutane daga jihohi 36 da Abuja.

Shugaban kasa Bola Ahmed Tinubu ya amince da nada sababbin shugabannin hukumomin raya tafkin ruwa 12 da ake da su a shiyyoyi daban daban na kasa.

Asali: Legit.ng