Rikicin VAT: Babu abun da Arewa za ta rasa, in ji jigon APC
- Batun karbar harajin kaya na VAT na ci gaba da haifar da rashin jituwa tsakanin wasu gwamnonin jihohi da gwamnatin tarayya
- Wasu gwamnoni karkashin jagorancin Gwamna Nyesom Wike sun ce jihar na da cikakken yancin karɓar harajin VAT daga mazauna cikinta da masu kasuwanci
- A halin yanzu lamarin yana gaban kotu yayin da dukkan bangarorin da abin ya shafa ke jiran hukuncin da manyan kotuna za su zartar
Yayin da ake ci gaba da cece-kuce tsakanin wasu jihohi da gwamnatin tarayya kan wanda zai dunga karbar harajin VAT a Najeriya, wani tsohon ɗan majalisar wakilai ya ce babu abinda yankin arewa zai rasa.
Aminu Jaji, tsohon shugaban kwamitin majalisar wakilai kan tsaron cikin gida kuma jigo a jam'iyyar All Progressives Congress (APC) ya ce arewa za ta ci gaba da harkoki idan kudu ta dage kan karbar VAT.
Asali: Facebook
Jaridar The Nation ta ruwaito cewa, Jaji ya ce yankin kudu ba zai iya tsorata yankin arewa kan rike harajin VAT da ake karba daga 'yan Najeriya da kasuwancinsu a jihohinsu mabanbanta.
Jaji ya ce damuwar arewa ta ta'allaka ne kan hadin kan Najeriya da wanzuwarta koda ba tare da rikicin VAT ba.
A cewar tsohon dan majalisar, jihohi a yankin arewa sun fara shirin kirkirar wasu hanyoyin samar da kudaden shiga baya ga VAT.
Ya ce:
"Lokacin da tsarinmu ya fara aiki, wadanda ke kokarin mallakar VAT za su firgita."
"Muna shiri a madadin arewa kuma idan ba saboda hadin kan kasar ba, a shirye muke dari bisa dari mu ce a basu VAT din."
VAT: Gwamnonin Arewa za su hada-kai da Gwamnatin Tarayya suyi shari’a da Jihohin Kudu
A gefe guda, mun kawo cewa akwai alamu da ke nuna cewa gwamnatin tarayya da wasu gwamnonin jihohin Arewa za su kalubalanci hukuncin da kotu tayi a kan harajin VAT.
Babban lauyan gwamnati zai yi shari’a da gwamnatocin jihohin Legas, Ogun, Akwa Ibom da Oyo domin a warware gardama kan wanda zai rika karbar VAT.
Jaridar Daily Trust ta rahoto cewa gwamnatin Ribas tana kalubalantar hukumar FIRS a kotun koli.
Asali: Legit.ng
