Amotekun sun kashe uba da 'ya'yansa biyu a Oyo

- Kungiyar Amotekun ta kai wa fulani hari tare da kashe wani mutum da 'ya'yansa biyu

- Kungiyar ta afkawa fulanin ne yayin shirin bikin auren 'ya'yan mutumin da aka kashen

- 'Yan sandan jihar sun tabbatar da faruwar hakan kuma sun nemi Kwamandan Amotekun basu sameshi ba

An samu barkewar rikici a jihar Oyo ranar Asabar kan kisan wasu Fulani uku, da suka hada da uba da ‘ya’yansa maza guda biyu, da kungiyar tsaro ta Kudu maso Yamma, Amotekun ta aikata.

An kashe Alhaji Usman Okebi tare da ‘ya’yansa a lokacin da jami’an Amotekun suka afka wa matsugunan Fulani a Okebi da ke karamar hukumar Ibarapa ta Arewa.

Wannan lamarin shine mafi sabani a cikin jerin keta, take hakki da kuma nuna kyama ta sabuwar kungiyar.

Hakan na faruwa ne makonni uku kacal bayan da aka zargi Amotekun da kashe mutane biyu a jihar ciki har da wani dalibin Jami’ar Ibadan (UI).

Kashe Alhaji Usman, wani fitaccen makiyayi a jihar, a ranar da daya daga cikin ‘ya’yan nasa suka yi daurin aure, ya jefa al’ummar Fulani cikin jimami yayin da suke kira da a gudanar da cikakken bincike kan lamarin.

KU KARANTA: Amurka: Sabuwar Korona ta sake kunno kai a jihohi takwas

Jaridar Daily Trust ta gano cewa harin ya faro ne daga Aiyete, wani yanki na Bororo, kimanin kilomita daya daga Okebi, inda Fulani suke.

Wani mazaunin kauyen mai suna Umaru Abdulkadir ne ya ba da labarin faruwar lamarin:

“Da sanyin safiyar ranar Asabar, wasu mutane na Amotekun suka afkawa wani kauye na mutanen Bororo. Lokacin da Bororo suka ga cewa akwai hadari, sai suka fara gudu zuwa mazaunin Fulani (Okebi), wanda yake kimanin kilomita daya daga wurin.

"Da isar su, sai mambobin Amotekun suka harbe wani Bafulatani a kafa kuma mutanen sa suka yi kokarin kai shi asibiti.

“Lokacin da Amotekun suka ga sun je asibiti, sai suka far musu a kan babur suka kashe mutumin (Alhaji Usman) wanda ke dauke da mutumin Bororo da ya ji rauni a kan babur da ’ya’yansa biyu.

"Daga nan sai Amotekun suka dawo suka far ma ƙauyen Fulani. Sun kashe mutane bakwai kamar yadda muke magana yayin da da yawa suka bata. Wannan shi ne ainihin abin da ya faru," in ji shi.

Shugaban gargajiya a yankin, ya ce;

“Waɗanda ke ba ku labarin ba su nan. Ina gaya muku gaskiyar lamarin. Ya kamata gwamnati ta dauki mataki a yanzu. Mun kai rahoton wannan karar ga gwamnati sau da yawa.

"Duk gidajen mai ba sa aiki a nan kuma saboda yawan makiyayan."

Yayin da kungiyar ta Amotekun ta ikirarin cewa wadanda aka kashe masu garkuwa da mutane ne.

Amma, Sarkin Fulanin Oyo, Alhaji Salihu Abdulkadir ya musanta ikirarin cewa wadanda aka kashe masu satar mutane ne.

Ya ce kungiyar Amotekun sun afka wa fulanin rugar ne inda suka bude wuta a kan makiyayan da ba su da laifi, yana mai cewa mutumin da aka kashe tare da ’ya’yansa maza biyu kamar Sarki ne a jihar.

Shugaban Fulanin ya dage kan cewa wadanda aka kashe makiyaya ne wadanda ba su dauke da makami kuma suna zaune a wannan yankin fiye da shekaru 45.

“Alhaji Usman yana zaune a wannan matsugunin na fulani tsawon shekaru 45 da suka gabata.

“A can ya girma kuma na yi mamaki mutane na cewa masu satar mutane ne. Mun sha karanta labarai iri-iri na yaudara game da lamarin. Wannan ne ya sa muke son ‘yan sanda su gudanar da cikakken bincike,” inji shi.

Ya bayyana cewa harin ya faru ne a lokacin da suke shirin bikin auren ‘ya’yan mutumin, wanda za a yi ranar Asabar.

Jami’in hulda da jama’a na ‘yan sanda (PPRO) a jihar, CSP Olugbenga Fadeyi, ya tabbatar da faruwar lamarin a wani sakon tes da ya aika wa jaridar Daily Trust a Ibadan.

“Lokacin da DPO na Ayete ya fahimci abin da ya faru, sai ya hanzarta don gano musabbabin harin.

“A cikin rahoton nasa, mutane uku sun mutu biyu sun ji rauni. Tuni ya fara bincike kuma ci gaba zai bayyana nan ba da jimawa ba, ”in ji kakakin 'yan sandan."

Duk kokarin da aka yi don jin ta Kwamandan Amotekun Corps a jihar, Kanal Olayinka Olayanju bai yi nasara ba saboda lambarsa ba ta shiga a kuma ba a amsa sakon tes da aka aika masa ba a lokacin hada wannan rahoton.

KU KARANTA: Jam'iyyar APC na harin samun sababbin mambobi miliyan 2 a Adamawa

Kafin nan, a ranar 19 ga Disamba, 2020, an zargi jami'an Amotekun da kashe mutane biyu a Unguwar Isale Osi da ke jihar.

Haka kuma a ranar 20 ga Disamba, an kashe wani dalibi dan aji 400 na Kwalejin Ilimi ta Tarayya da ke jihar, Akolade Gbadegbo wanda jami'an suka ce sun yi zargin cewa shi dan fashi da makami ne.

Kungiyar Daliban Nijeriya ta Kasa (NANS) ba su amince da yadda aka yi wa gawar ba.

Kwanan nan, Kwamandan Amotekun na Jihar Osun ya sami martani lokacin da ya ce kaya, lokacin da aka fara su a jihar a watan Maris, ba za su amince da sanya sutura mara kyau ba da kuma tozarta harshen Yarbanci.

Ba zato ba tsammani kashe makiyayan jiya ya zo daidai da ranar da Nobel Laureate, Farfesa Wole Soyinka ya yi gargadin cewa Amotekun zata iya zama sabuwar (SARS), wata rundunar 'yan sanda da aka wargaza kwanan nan da aka sani da kisan gilla.

Sannan ya ba da shawarin cewa dole ne a bai wa 'yan kungiyar Amotekun horo da koya musu da'a domin gujewa zama kamar SARS.

Wole Soyinka ya bayyana hakan ne a yayin wata hira da aka yi da shi a gidan Talabijin na Arise da ke Legas.

Ya sake nanata cewa horarwa na da mahimmanci ga jami'an Amotekun.

Yana cewa, "Kamar yadda kuke horar da su don kare mu, mu ma muna horar da tunaninsu don kada Amotekun ta zama wata SARS, yana da mahimmanci. Dole ne mu yi komai tare. ”

Sai dai ya bayyana zuwan Amotekun a matsayin wani shiri na 'yan sanda don mayar da martani ga rugujewar tsarin tsaron kasa.

An ruwaito mana cewa Amotekun har yanzu bata fara aiki ba a jihohin Lagos da Ogun yayin da ta fara aiki a wasu jihohin Kudu maso Yamma.

Soyinka ya kuma ce, "Babu wata hujja ga ta'asar da ta faru sakamakon hayaniya, jita-jita, gaskiyar mutanen da ake harbewa a harabar Lekki."

Ya nuna damuwa kan juyawar abubuwa bayan zanga-zangar #EndSARS.

A wani labarin daban, Wasu 'yan bindiga sun yi harbe-harbe tare da tarwatsa jama'a a daidai katafaren shagon Ado Bayero Mall da ke kan titin zuwa gidan Zoo a birnin Kano.

Freedom Radio ta rawaito cewa lamarin ya faru ne da misalin karfe goma na daren ranar Asabar.

A cewar rahoton da Freedom Radio ta wallafa, 'yan bindigar sun yi harbe-harbe a sararin samaniya, lamarin da ya saka jama'a gudun neman mafaka.

Domin sauke manhajar labaran Legit.ng a wayar ku ta hannu, latsa wannan rubutu na kasa:

https://play.google.com/store/apps/details?id=com.naij.hausa

Ku biyo mu a shafukanmu na dandalin sada zumunta:

Facebook: https://facebook.com/legitnghausa

Twitter: https://twitter.com/legitnghausa

Idan kuna da wata shawara ko bukatar bamu labari,

Tuntube mu a: labaranhausa@corp.legit.ng

Asali: Legit.ng