Bayan Atiku Ya Gana da Buhari, an Karfafawa Uba Sani, Tinubu Guiwa a 2027

• Jiga-jigan APC a Kaduna sun bayyana goyon bayansu ga Bola Tinubu da Gwamna Uba Sani a zaben shekarar 2027
• Taron jiga-jigan APC ya mayar da hankali kan tsaro da ci gaba a yankin karamar hukumar Kachia da ke jihar
• Shugaban Karamar Hukumar ya bayyana cewa SDP ba za ta iya kawo cikas ba ga APC mai mulkin jihar da Najeriya

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kaduna - Jiga-jigan jam’iyyar APC a jihar Kaduna sun nuna goyon baya ga Bola Tinubu a zaben 2027 da ke tafe.

Masu ruwa da tsakin a karamar hukumar Kachia sun bayyana cikakken goyon bayansu ga shugaban da Gwamna Uba Sani, suka ce suna goyon bayan ci gaban mulkinsu bayan 2027.

APC ta nunawa Tinubu da Uba Sani gata

Kara karanta wannan

'Yan sanda sun kwato manyan bindigogi, sun gwabza fada da 'yan fashi

Wannan matsaya ta fito ne a lokacin wani taron masu ruwa da tsaki da aka gudanar a harabar ofishin hukumar karamar hukumar Kachia, cewar Punch.

Rahotanni sun ce an shirya taron ne domin karɓar bayanai dangane da harkokin tsaro da ci gaba a yankin.

Bayan kammala taron, Shugaban karamar hukumar kuma shugaban kungiyar jiga-jigan APC, Dr. Manzo Maigari, ya ce wannan dandalin yana ba da dama wajen sadarwa da juna tsakanin gwamnati da al’umma.

Ya ce:

Mun yi wa jiga-jigan bayani game da ci gaban tsaro, sabuwar Jami’ar Kimiyya da Fasaha ta Tarayya da kuma wasu nasarorin ci gaba.

“Bayan nazari kan yanayin siyasa a Kachia, jiga-jigan sun amince da cewa Shugaba Tinubu da Gwamna Uba sun cancanci ci gaba bayan 2027."

APC ta caccaki SDP da jigonta, El-Rufai

Maigari ya kuma bayyana cewa jam’iyyar SDP da tsohon Gwamna Nasir El-Rufai ke mara wa baya ba za ta dawwama ba a siyasa, Vanguard ta ruwaito.

Kara karanta wannan

'Mun yi kuskure,' Gwamnatin Tinubu ta ba da hakuri kan maganar nada mukamai

Ya bayyana jam’iyyar PDP a matsayin babbar jam’iyyar hamayya, amma ya nuna kwarin gwiwa da ikon APC a yankin da Kudancin Kaduna.

Ya kara cewa:

“Zan iya tabbatar muku cewa yankin Zone 3 da abokan huldar mu za su dawo da Shugaban kasa da Gwamna a 2027.

“Idan aka dubi nasarorin da muka samu a yankin, da wuya wani ya iya shawo kan mutanen Kudancin Kaduna su canza hanya.

“Cikin watanni 24 da jami’ar ta fara aiki, ana sa ran mutane 30,000 za su shiga Kachia, a cikin shekaru 3 zuwa 4, adadin na iya haura 100,000.”

Maigari ya yabawa rundunar soji bisa inganta tsaro, inda ya ce an rage matsalar rashin tsaro da kashi 80 bisa dari a Kudancin Kaduna.

Atiku, El-Rufai sun gana da Buhari

Kun ji cewa tsohon dan takarar shugaban kasa a PDP, Atiku Abubakar ya kai ziyarar gaisuwar Sallah ga tsohon shugaban kasa, Muhammadu Buhari a Kaduna.

Kara karanta wannan

Gaba da gabanta: Umarnin da kotu ta ba shugaban riko a Rivers bayan saba mata

Atiku ya jagoranci manyan mutane ciki har da tsohon gwamnan Kaduna, Nasir El-Rufai da tsohon gwamnan Sokoto, Aminu Tambuwal.

Har ila yau, Sheikh Isa Ali Pantami da Abubakar Malami suma sun kai ziyarar Sallah ga tsohon shugaban kasar.

Wanda ya tantance Muhammad Malumfashi, babban edita a Legit.ng.

Asali: Legit.ng