'Tsofaffin Ministoci da Sanatoci Sun Shiga SDP don Kifar da Tinubu a 2027,' Gabam

• Shugaban jam’iyyar SDP na kasa, Shehu Gabam, ya ce manyan jiga-jigan ‘yan siyasa daga sassan Najeriya na sauya sheka zuwa SDP
• Gabam ya bayyana cewa tsohon gwamnan Kaduna, Nasir El-Rufai, na daga cikin fitattun ‘yan siyasan da suka koma jam’iyyar daga APC
• A cewarsa, sama da manyan mutane 300, ciki har da tsofaffin ministoci da sanatoci, sun sauya sheka don shiga tafiyar SDP a Najeriya

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

FCT, Abuja - Shugaban jam’iyyar SDP na kasa, Shehu Gabam, ya ce jam’iyyarsu na karɓar ‘yan siyasa daga dukkan jihohin Najeriya domin ƙarfafa jam’iyyar gab da babban zaɓen 2027.

A cewarsa, kowace rana akwai sababbin mutane da ke sauya sheka zuwa SDP, ciki har da manyan ‘yan siyasa da suka riƙe muƙamai daban-daban a gwamnatin Najeriya.

Kara karanta wannan

Buba Galadima ya fadi matsayar NNPP kan hadaka da 'yan adawa

Shehu Musa Gabam ya bayyana hakan ne a wata hira da aka yi da shi a shirin shiyasa na Channels TV, inda ya jaddada cewa burinsu shi ne kwace mulki daga APC.

Manyan ‘yan siyasa na shiga SDP - Gabam

Shehu Musa Gabam ya bayyana cewa jam’iyyar SDP na ci gaba da samun karɓuwa daga manyan ‘yan siyasa da suka fito daga jam’iyyun APC da PDP.

Ya ce tsohon gwamnan Kaduna, Nasir El-Rufai, ya shiga SDP, kuma akwai sauran jiga-jigan siyasa da za su biyo sahu a makwanni masu zuwa.

A cewarsa, idan aka duba bayanai da suka tattara, sama da mutum 300 sun fita daga tafiyar su ta baya domin shiga SDP, ciki har da tsofaffin ministoci da sanatoci.

SDP na shirin karɓar mulki daga hannun APC

Shehu Gabam ya ce burinsu na siyasa shi ne karɓar mulki daga APC a zaɓen 2027, domin ceto al’ummar Najeriya daga halin da take ciki.

Kara karanta wannan

El Rufai ya fara karɓe magoya bayan Kwankwaso, jiga jigan NNPP sun koma SDP

Ya bayyana cewa kowace jam’iyya ta na da burin karɓar mulki, PDP na kokarin komawa kan karagar mulki, yayin da APC ke son ci gaba da rike shi, amma SDP za ta kawo sabon salo.

Ya ce rashin sauraron koke-koken jama’a na iya jawo wa APC faduwa a zaɓen gaba, saboda hakan na nuna gazawarta a shugabanci.

Gabam ya ce APC na iya faduwa a 2027

Shugaban SDP ya ce kwarewar siyasar Bola Tinubu ba ita ce kadai za ta ba APC damar lashe zaɓe a 2027 ba.

A cewarsa:

“Idan akwai ƙwarewa da dabarun siyasa, ba za a samu kura-kuran da ake yi a yau ba. Duk wanda bai yi daidai ba, za a iya kawar da shi a zaɓe.”

Ya ce Najeriya na da dimbin mutane masu basira da za su iya jagoranci, don haka babu wani mutum guda da ya mallaki ilimin shugabanci fiye da kowa.

Kara karanta wannan

Dalilan manyan 'yan siyasa da suka caccaki El-Rufa'i kan komawa jam'iyyar SDP

Binani ta gana da shugaban jam'iyyar SDP

A wani rahoton, kun ji cewa tsohuwar 'yar takarar gwamna a jam'iyyar APC, Aishatu Dahiru Binani ta gana da shugaban SDP na kasa.

Shugaban jam'iyyar, Shehu Musa Gabam ya ce sun tattauna lamura da suka shafi siyasar Najeriya da ci gaban kasa yayin ganawar da suka yi.

Wanda ya tantance Muhammad Malumfashi, babban edita a Legit.ng.

Asali: Legit.ng