'Me Shirunsa ke Nufi?' An Taso Kwankwaso a Gaba game da Dokar Ta Ɓaci a Rivers

• Sanata Rabiu Kwankwaso yana fuskantar suka daga jama'a saboda kin fadin ra'ayinsa kan dokar ta-ɓacin da aka kafa a jihar Rivers
• Wani ɗan PDP ya bayyana damuwarsa, ya na tambayar dalilin da ya sa Kwankwaso bai bayyana matsayinsa ba kamar sauran shugabannin adawa
• Ya ce Atiku Abubakar, Peter Obi, Nasir El-Rufai da Kungiyar Gwamnoni duk sun yi magana, amma har yanzu Kwankwaso bai ce komai ba
• Matashin ya tambaya ko Kwankwaso na da niyyar shugabantar adawa ganin yadda har yanzu bai kare muradin 'yan hamayya ba

Abdullahi Abubakar, Editan Legit Hausa ne ta bangaren siyasa, kasuwanci da al'amuran yau da kullum, ya na da gogewar aikin jarida sama da shekaru biyar.

Kano - An taso Sanata Rabiu Kwankwaso a gaba kan rashin yin magana game da sanya dokar ta-ɓaci a jihar Rivers.

Manyan ƴan adawa a Najeriya sun yi martani kan lamarin inda suke sukar matakin da Bola Tinubu ya dauka a jihar.

Kara karanta wannan

Kaduna: Ɗan PDP ya aikawa sanatansa sako ya hana dakatar da Fubara a Majalisa

An bukaci sanin matsayar Kwankwaso kan dokar ta-ɓaci

Wannan na kunshe ne a cikin wata sanarwa da @AdnanMouckhtar ya wallafa a shafin X a yau Alhamis 20 ga watan Maris, 2025.

Adnan matashin 'dan siyasa wanda sau biyu ya na neman damar tsayawa takarar 'dan majalisa a jihar Kano, amma bai yi nasara ba.

A cikin rubutun, malamin jami'ar ya tambaya shin menene matsayar Rabiu Kwankwaso duba da yadda bai ce komai ba game da lamarin da ya faru a jihar Rivers.

Matashin ya bayyana cewa:

“Atiku Abubakar ya yi magana, haka ma Peter Obi, Kungiyar Gwamnonin Najeriya ta fadi albarkacin bakinta, El-Rufai ma bai yi shiru ba.

“Yawancin ‘yan adawa sun riga sun bayyana matsayinsu, amma Rabiu Kwankwaso bai ce uffan ba, saboda wani dalili da shi kadai ya sani.

“Wasu mutane kuwa sai ihu suke, suna kiransa jagoran adawa, amma har yanzu bai yi magana ba domin kare muradin kasa ko bayyana matsayinsa.

Kara karanta wannan

Fubara: Atiku, El Rufai, Obi da mutanen Buhari sun tunkari Tinubu da murya daya

“To yanzu, yaushe ne Kwankwaso zai fito fili ya yi magana? Shin da gaske ne yana shirin jagorantar adawa a kasar nan?”

Rivers: Martanin mutane game da shirun Kwankwaso

Mutane da dama sun yi martani kan lamarin inda wasu ke cewa Kwankwaso bai cancanci zama jagoran adawa a Najeriya ba.

@BashirAhmaad:

"Shirin haɗewa mana, Kwamred."

@Tahirtalba:

"Wani lokaci shiru fa alheri ne."

@JACOB_EML:

"Kwankwaso ba dan siyasar kasa ba ne kawai jagora ne a masarautar Kano."

@Anthonyapakboro:

"Ni kam waye ne ma Kwankwaso kam?"

@Educatedlawyer:

"Wannan lamari ne na kasa da ya fi ƙarfinsa, ya kamata ya mayar da hankali ne kan siyasar Kano kawai."

@otuo_ogbajie:

"Bayan wannan, wani da ake kira Buba Galadima zai fito yana yaudaran kansa cewa Kwankwaso kwararren dan siyasa ne."

Rivers: 'Dan PDP ya tura sako ga sanatansa

A baya, kun ji cewa wani matashi dan jam'iyyar PDP a Kaduna, Aliyu Kwarbai ya tura sako ga Sanata Ibrahim Khalid Soba kan dokar ta-ɓaci a Rivers.

Kara karanta wannan

Rivers: Atiku ya sauya salo, ya roƙi ƴan Najeriya bayan Tinubu ya sanya dokar ta ɓaci

Matashin ya roki sanatan ka da ya goyi bayan dakatar da Gwamna Siminalayi Fubara daga kujera, yana cewa hakan zai bar baya da kura a jihar.

Kwarbai ya bayyana cewa ya taimaka wurin yakin neman zaben sanatan a 2023, amma bai taba neman wani abu a wajensa ba sai a yanzu.

Wanda ya tantance Muhammad Malumfashi, babban edita a Legit.ng.

Asali: Legit.ng