Buba Galadima Ya Fadi Matsayar NNPP kan Hadaka da 'Yan Adawa

• Buba Galadima ya caccaki ƴan siyasan da ke komawa jam'iyyar APC bayan sun yi takara a wasu jam'iyyun
• Jigon na jam'iyyar NNPP ya kuma bayyana SDP a matsayin wani reshe na APC mai mulki a tarayyar Najeriya
• Injiniya Galadima ya nuna cewa NNPP ba za ta shiga wata haɗaka ba da nufin ƙwace mulki ko ta halin ƙaƙa

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

FCT, Abuja - Babban jigo a jam’iyyar NNPP, Alhaji Buba Galadima, ya yi watsi da sauya sheƙar da wasu ƴan siyasa suke yi zuwa SDP.

Buba Galadima ya bayyana cewa SDP ba komai ba ce illa wani reshen jam’iyya mai mulki, wato APC.

Jigon na NNPP ya bayyana hakan ne lokacin da yake magana a wani shiri na tashar Arise Tv a ranar Talata, 18 ga Maris, 2025.

Kara karanta wannan

El Rufai ya fara karɓe magoya bayan Kwankwaso, jiga jigan NNPP sun koma SDP

Me Buba Galadima ya ce kan SDP?

Buba Galadima ya ce babu wani abin mamaki dangane da rashin ganin jiga-jigan NNPP suna komawa SDP, domin a cewarsa, jam’iyyar wani reshe ne na APC.

"SDP da kuka ambata a gabatarwarku wani reshen APC ce. Mutanen APC ne suka koma abin da kuke kira SDP. Babu wani abu daban."

“Waɗanne mutane daga wasu jam’iyyu suka koma SDP? Wannan shi ne tambayar da mutane ya kamata su yi. Saboda haka, babu abin mamaki. Kun san irin salon siyasar Legas, yin duk mai yiwuwa don murƙushe ƴan adawa."

- Buba Galadima

Jawabin Galadima ya biyo bayan kiran da tsohon gwamnan jihar Kaduna, Malam Nasir El-Rufai, ya yi na cewa ya kamata shugabannin ƴan adawa su haɗu a SDP domin su ƙwace mulki daga APC a 2027.

Buba ya soki ƴan adawar da ke komawa APC

Buba Galadima ya kuma caccaki ƴan siyasar adawa da ke komawa APC bayan sun tsaya takara a wasu jam’iyyu.

Kara karanta wannan

A karon farko, jam'iyyar APC ta kasa ta yi maganar sauya shekar El Rufai zuwa SDP

Ya kawo misalin tsohon ɗan takarar gwamnan jam’iyyar PDP a jihar Legas, Abdul-Azeez Adediran (Jandor), wanda ya koma APC a ranar Litinin.

"Kalli abin da Jandor ya yi. Ka kalli irin goyon bayan da mutanen Legas suka ba shi. A gaskiya, zan ce shi ne ya lashe zaɓen, kawai an ƙwace masa ne.”

“Amma ka dube shi, ya koma baya ya sake komawa APC. Yaya za mu yi adawa idan mutane na komawa baya? Ya kamata muyi adawa bisa tsari da ƙa’ida. Ko da kai kaɗai ne, ya kamata ka tsaya kan abin da ka yarda da shi."

- Buba Galadima

NNPP ba za ta yi haɗaka don neman mulki ba

Sai dai, Buba Galadima ya jaddada cewa NNPP ba za ta yi haɗaka da wata jam’iyya don samun mulki ba.

“Mu jam’iyya ce mai aƙida. Mu jam’iyya ce mai tsari. Ba ma shiga haɗaka da wasu kawai don mu samu mulki ko ta halin ƙaƙa."

Kara karanta wannan

SDP ta tono 'makarkashiyar' da gwmanatin APC ke shiryawa El Rufai

“Mun gamsu da jam'iyyar da muke da ita. Wata rana, za mu ƙarfafa jam’iyyar nan mu lashe zaɓen ƙasa."

- Buba Galadima

Buba Galadima ya magantu kan saukar farashi

A wani labarin kuma, kun ji cewa Buba Galadima, ya bayyana cewa saukar da farashin abinci ke yi a ƙasar nan ba abin farin ciki ba ne.

Buba Galadima ya bayyana cewa saukar da farashin ya yi saboda shigo da abinci daga ƙetare, zai haifar da matsaloli a nan gaba.

Muhammad Malumfashi, babban edita a sashen Hausa na Legit ya duba labarin.

Wanda ya tantance Muhammad Malumfashi, babban edita a Legit.ng.

Asali: Legit.ng