‘Mun Yi Maguɗin Zaɓe a Baya’ Tsohon Shugaban Jam’iyyar APC Ya Tona Asiri

• Tsohon shugaban jam'iyyar APC a jihar Rivers, Tony Okocha ya bayyana yadda suka hadu suka tafka maguɗin zaɓe a jihar
• Cif Tony Okocha ya yi zargin cewa sun hadu da dama yayin maguɗin zaɓen kuma har da shugaban APC na jihar da yake mulki
• Bayan tabbatar da ya yi maguɗin zaɓe, Okocha ya bayyana abin da ya kamata doka ta masa saboda karfin halin tona asirin

Editan Legit Hausa Ibrahim Yusuf yana da gogewar aikin jarida da rubuce-rubucen adabi sama da shekaru hudu, kuma kwararre ne a kawo rahotannin kasuwanci, siyasa da lamuran yau da kullum.

Jihar Rivers - Tsohon shugaban APC a Rivers ya fasa kwai yayin da ya ce jam'iyyar ta tafka maguɗin zaɓe a baya.

Tony Okocha ya ce ba zai boye abin da ya san sun aikata ba kuma kamata ya yi a yaba masa a kan hakan.

Kara karanta wannan

Gwamnatin Tinubu ta yi magana kan roƙon ƙasar China ta yafewa Najeriya bashi

Jaridar Daily Trust ta wallafa cewa Tony Okocha ya yi zargin cewa shugaban APC na jihar a halin yanzu, Emeka Beke na cikin wandada suka yi maguɗin.

APC ta yi maguɗin zaɓe inji Tony Okocha

Tsohon shugaban APC na jihar Rivers ya tabbatar da cewa sun hada baki sun yi maguɗin zaɓe a jihar.

Tony Okocha ya bayyana cewa ya fadi haka ne a bayyane domin ya ja hankalin yan siyasa su guji tafka maguɗin zaɓe.

Okocha ya tabbatar da cewa lamarin ya faru ne yayin wani zaben kananan hukumomi da ya gudana a jihar.

Maguɗin zaɓe: Za a kama shugaban APC?

The Cable ta wallafa cewa Tony Okocha ya ce ya kamata a karrama shi ne bisa kokarin da ya yi na tona asirin maimakon a ce za a kama shi.

Kara karanta wannan

Matawalle: EFCC ta tabo batun bincikar tsohon gwamnan Zamfara

Tsohon shugaban ya buga misali da cewa kamar yadda ba za a kama barawo da ya bayyana tubansa ba, haka bai kamata a kama shi ba.

Shugaban APC na yanzu ya yi maguɗin zaɓe?

Bayan tabbatar da lamarin, Tony Okocha ya ce shugaban APC na yanzu a jihar Rivers ma tare da shi aka yi maguɗin zaɓen.

Sai dai a nan take shugaban APC a halin yanzu, Emeka Beke ya ƙaryata cewa an yi maguɗin da shi domin nasarar wata jam'yya.

Jonathan ya yi magana kan murde zabe

A wani rahoton, kun ji cewa tsohon shugaban kasa, Goodluck Ebele Jonathan ya yi magana kan zaben gwamna da ya gabata a jihar Edo.

Shugaba Goodluck Jonathan ya bayyana cewa amfani da kimiyya da fasaha kawai ba za ta magance matsalolin maguɗin a zabe ba.

Muhammad Malumfashi, babban edita a sashen Hausa na Legit ya duba labarin.

Asali: Legit.ng