Gwamna Fubara Ya Dira Majalisa Yayin da Ake Batun Yunkurin Tsige Shi

• Gwamnan jihar Rivers, Siminalayi Fubara ya ziyarci majalisar dokokin jihar a daidai lokacin da rikicin siyasa ya sake kunno kai a jihar
• Fubara ya ziyarci ɓangaren majalisar ne inda Martin Amaewhule da sauran ƴan majalisar da ke adawa da shi ke gudanar da zamansu na majalisa
• Ziyarar Gwamna Fubara zuwa harabar majalisar ta zo ne sa’o’i 24 bayan da aka samu sabon ɓangare a majalisar wanda ya zaɓi sabon kakaki

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Rivers - Gwamnan jihar Ribas, Siminalayi Fubara, ya ziyarci harabar majalisar dokokin jihar da ke birnin Port Harcourt a ranar Alhamis, 9 ga watan Mayu.

Ziyarar gwamnan na zuwa ne a daidai lokacin da ake batun ƴan majalisar sun fara shirya yunƙurin tsige shi.

Kara karanta wannan

Fubara vs Wike: An yi kira ga Bola Tinubu ya tsoma baki kan rikicin siyasar jihar Rivers

Gwamna Fubara a majalisar Rivers

Tashar Channels tv ta sanya wani bidiyo wanda ya nuna lokacin da gwamnan ya isa harabar majalisar dokokin jihar.

Bidiyon ya nuna Mai girma Gwamna Simi Fubara tare da muƙarrabansa sun shiga cikin harabar majalisar dokokin jihar.

Meyasa Fubara ya kai ziyara majalisa?

Gwamnan yace ya je majalisar ne a matsayinsa na gwamnan jihar. Sai dai ya yi tattaki na tsawon mintuna uku a cikin harabar majalisar kafin ya tafi.

Ziyarar gwamnan ta zo ne a daidai lokacin da wani sabon rikici ya ɓarke a majalisar dokokin jihar.

Wasu daga cikin ƴan majalisar da ke biyayya ga Gwamna Fubara sun gana a ranar Laraba, 8 ga watan Mayu inda suka zaɓi Victor Oko-Jumbo, mamba mai wakiltar mazaɓar Bonny a matsayin kakakin majalisar.

An zaɓi sabon kakaki a majalisar Rivers

Kara karanta wannan

Sojoji sun dauki mataki bayan kwashe kwanaki a kauyen da aka kashe jami'ai

An zaɓi Victor Oko-Jumbo a matsayin sabon kakakin majalisar dokokin mai wakilai 32 da misalin ƙarfe 10:00 na safe yayin zaman majalisar na ranar Laraba, 8 ga watan Mayun 2024.

Sabon kakakin ya kasance ɗaya daga cikin ƴan majalisa huɗu da suka marawa gwamnan baya a farkon rikicin siyasar jihar Rivers.

A lokacin ne dai suka zaɓi Edison Ehie a matsayin kakakin majalisar amma daga baya ya yi murabus daga zama ɗan majalisar.

Daga baya Gwamna Fubara ya naɗa Edison Ehie a matsayin shugaban ma’aikatansa.

Batun tsige Gwamna Fubara

A wani labarin kuma, kun ji cewa ƙungiyar ƙananan hukumomin Najeriya (ALGON) reshen jihar Rivers, sun goyi bayan a tsige Gwamna Siminalayi Fubara na jihar.

Ƙungiyar ta kuma zargi gwamna da riƙe kuɗaɗen ƙananan hukumomin jihar waɗanda ya kamata su gudanar da ayyukansu da su.

Asali: Legit.ng