Gwamna Zulum Ya Yi Babban Rashi, Mai Magana Da Yawunsa, Gusau, Ya Rasu

• Mai taimakawa na musamman bangaren watsa labarai da tsare-tsare na Gwamna Babagana Zulum, Mallam Isa Gusau, ya rasu sakamakon rashin lafiya
• Yayin da kawo yanzu gwamnatin Borno ba ta fitar da sanarwa a hukumance ba, wani rahoto ya yi ikirarin cewa ya rasu a Indiya ne, wani kuma ya ce a Landan ya rasu yayin masa magani
• Gusau shine mai magana da yawun Mataimakin Shugaban Kasa Kashim Shettima lokacin da ya ke gwamnan jihar ta Borno

Maiduguri, Borno - Rahotanni da suka fito na cewa mai magana da yawun Gwamna Babagana Zulum na jihar Borno, Mallam Isa Gusau, ya rasu a wani asibiti da ke kasar Indiya.

A cewar This Day, Gusau shine mai magana da yawun Kashim Shettima, mataimakin shugaban kasan Najeriya, a lokacin da ya ke gwamna a jihar Borno. An rahoto cewa kakakin gwamnan ya shafe kimanin wata guda a wani asibiti a Indiya yana jinyar wani ciyo da ba a bayyana ba kawo yanzu.

Kara karanta wannan

Betta Edu: Gwamonin APC sun dauki mataki ana tsaka da binciken badakala, bayanai sun fito

A ina mai magana da yawun Gwamna Zulum ya rasu

Jaridar ta rahoto cewa Gusau ya yi numfashinsa na karshe a ranar Alhamis, 11 ga watan Janairu, a wani asibitin kwararru a New Delhi, babban birnin Indiya, a cewar wata majiya da nemi a boye sunanta.

A cewar majiyar:

"Mun rasa Isa, ya suma na kimanin kwana uku, dukkanmu muna masa addu'ar samun sauki, amma abin bakin ciki ya rasu da yamma yau (jiya) a asibiti a New Delhi, Indiya."

Ta yaya hadimin Zulum ya rasu?

This Day a cikin rahotonta ta kara da cewa marigayi Gusau bai dena yin ayyukansa ba har ma a gadon asibiti a Indiya, ta kara da cewa ya fitar da sanarwar manema labarai da dama.

Sai dai, Leadership, ta ambaci wata majiya a rahotonta da ke cewa hadimin gwamnan ya rasu a wani asibiti da ke Landan, inda ake masa magani kan wani rashin lafiya da ya dade yana fama da ita.

Kara karanta wannan

Innalillahi: Tsohon Atoni-janar a jihar Arewa ya riga mu gidan gaskiya da shekaru 81

Kawo yanzu gwamnatin jihar Borno ba ta riga ta fitar da sanarwa ba a hukumance dangane da rasuwar hadimin gwamnan, kuma ba a riga an gano ko an dawo da gawansa Najeriya ba don masa jana'iza.

Asali: Legit.ng