Jam'iyyar NNPP Ta Cimma Yarjejeniya da APC Kan Shari'ar Gwamna Abba da Gawuna? Gaskiya Ta Bayyana

• Jam'iyyar New Nigeria Peoples Party (NNPP) ta yi magana kan yarjejeniyar da ake cewa ta cimmawa da jam'iyyar APC kan shari'ar gwamnan Kano
• Mai binciken kuɗi na jam'iyyar na ƙasa ya bayyana cewa sam babu wata yarjejeniya da suka cimmawa da APC
• Ya bayyana cewa fatansu shi ne Gwamna Abba Kabir Yusuf ya yi nasara a kotun ƙoli domin cigaba da ayyukan da yake yi a Kano

Editan Legit Hausa Sharif Lawal yana da ƙwarewar shekaru wajen kawo rahotannin siyasa, al'amuran yau da kullum, tsegumi da nishaɗi

Jihar Kano - Jam’iyyar New Nigeria Peoples Party (NNPP) ta yi watsi da iƙirarin cewa ta cimma yarjejeniya da jam’iyya mai mulki ta All Progressives Congress (APC) kan ƙarar da ta shigar a kotun ƙoli.

Babban mai binciken jam’iyyar na ƙasa, Ladipo Johnson, shi ne ya bayyana hakan yayin wata tattaunawa da jaridar The Punch a ranar Asabar, 30 ga watan Disamban 2023.

Kara karanta wannan

Ganduje ya faɗi matsala 1 da ke neman rusa lissafin APC gabanin hukuncin kotun kolin Najeriya

Ladipo ya bayyana cewa duk da cewa mutum ba zai iya hana mutane yaɗa jita-jita ba, amma maganar ƙarya ce.

'Babu wata yarjejeniya da NNPP' - APC

Ita ma jam’iyyar APC reshen jihar Kano ta musanta wata yarjejeniya da jam’iyyar NNPP.

Yarjejeniyar da ake zargin, a cewar shugaban APC na jihar Kano, Abdullahi Abbas, tatsuniya ce kawai.

Gwamna Abba Yusuf ya ɗaukaka ƙara a kotun ƙoli a matsayin martani ga hukuncin kotun ɗaukaka ƙara da ta tabbatar da hukuncin da kotun sauraron ƙararrakin zabe ta jihar ta yanke.

Kotun zaɓen dai ta soke nasarar da ya samu a zaɓen gwamnan jihar da aka gudanar a ranar 18 ga watan Maris.

NNPP ta musanta cimma yarjejeniya da APC

Johnson ya bayyana cewa:

"Abin da kuke ji magana ce ta kan titi kuma ba za ku iya hana tattaunawar titi ta faru ba."

Kara karanta wannan

Babban dan siyasa ya shiga sahun masu neman takarar gwamna a jihar PDP, ya fadi muhimmin dalili

"Ban da tabbacin wani babban jami’i a jam’iyyar zai gaya muku hakan zai iya faruwa. Muna ƙoƙarin samun nasara a kotu kuma Abba Kabir Yusuf zai cigaba da gudanar da ayyuka nagari ga al’ummar Kano."

APC Za Ta Lallasa NNPP a Kano

A wani labarin kuma, kun ji cewa Dan takarar sanata a mazabar Kano ta Tsakiya, Abdulsalam Abdulkarim Zaura ya ce ko an sake zabe APC ce za ta yi nasara.

Zaura wanda ya yi takara a jam’iyyar APC a wannan shekara ya bayyana cewa jam’iyyar ce za ta yi nasara idan da za a sake zaɓe yanzu a Kano.

Asali: Legit.ng