WAIWAYE: ‘Na Fi So Na Ba Tinubu Gudunmawa Daga Waje’, El-Rufai Ya Magantu Kan Mukamin Minista
- Rashin tabbatar da Mallam Nasir El-Rufai a matsayin minista na ci gaba da haddasa cece-kuce a soshiyal midiya
- Wasu rahotanni sun kawo cewa El-Rufai ya daina sha'awar minista a gwamnatin Bola Tinubu, wasu rahotanni kuma sun ce 'cabals' ne suka hana tabbatar da shi
- Sai dai tsohon gwamnan jihar Kadunan a cikin wani tsohon bidiyo da ke yawo a intanet ya ce ya fi so ya ba Tinubu gudunmawa a matsayin daga waje maimakon aiki a matsayin minista
Wani tsohon bidiyo na tsohon gwamnan jihar Kaduna, Mallam Nasir El-Rufai yana bayyana matsayinsa dangane da samun mukami a gwamnatin Shugaban Kasa Bola Ahmed Tinubu ya bayyana.
A tuna cewa tsohon gwamnan na cikin zababbun gwamnonin jam'iyyar All Progressives Congress (APC) da suka tsaya tsayin daka kuma suka marawa Tinubu baya har ya zama shugaban kasa.
Kara karanta wannan
El-Rufai Ya Bada Sunan Wanda Zai Canje Shi, Ya Cire Sha’awar Zama Ministan Tinubu
Asali: Facebook
Burina bayan mika mulki, El-Rufai
Sai dai kuma El-rufai, a wata hira da aka yi da shi kafin ya mika mulki ga magajinsa, Uba Sani a jihar Kaduna, ya bayyana matsayinsa kan mukamin minista a gwamnatin Tinubu.
DUBA: Bibiyemu a Instagram don samun labarai masu muhimmanci kai tsaye cikin manhajar
A hirar da aka yi a gidansa, da jaridar Premium Times, El-Rufai ya bayyana cewa ya fi so ya yi aiki a wajen gwamnatin Tinubu sannan ya bayyanawa Tinubu gaskiyar da wasu ba za su iya fada masa ba idan bukatar hakan ya taso.
El-Rufai ya ce:
"Na kasance minista shekaru 20 da suka wuce. Na samu damar zama ministan babban birnin tarayya shekaru 20 da suka wuce. Darakta Janar na BPE na shekaru hudu, kuma zan cika shekaru 63 nan da mako guda daya yau.
"Kuma magana ta gaskiya, na yarda cewa Najeriya na da tarin matasa masu hazaka da za su iya yin duk wani aiki da za a basu. Kuma ina da tarin wadannan matasa, da yawa da na yi aiki da su, da dama da na horar da su tsawon shekaru.
"Kuma na fada ma Asiwaju sau da dama cewa da wuya ace akwai aikin da za ka bani da ba zan iya samo maka wani matashi da zai yi shi fiye da ni ba.
"Shakka babu, bai yarda da wannan ba, abu ne da ake kan tattaunawa.
"Abun da na fi so bayan na mika mulki da yardar Allah shine na dauki hutu sannan na kammala Ph.D dina a bangaren shugabanci da manufofin gwamnati a wata jami'a da ke Neterlands.
"Bayan cika wa'adin mulkina, ina niyan kammala Ph.D na, na rubuta takardata, sannan na kula da yarana daga nan zan yanke shawara kan abu na gaba.
"Shakka babu, zan so jam'iyyarmu ta yi nasara. Zan kasance a kasa kuma ina nan don ba Asiwaju Bola Tinubu gudunmawa domin ya zama shugaban kasa mai nasara a duk bangaren da zan iya; amma zan fi son haka a matsayin mai ba da shawara daga waje wanda zai iya fada masa abun da sauran mutane ba za su fada masa ba."
El-Rufai ya daina sha'awar zama minista
A wani labarin kuma, mun ji cewa Nasir El-Rufai bai sha’awar zama minista a sabuwar gwamnatin tarayya.
Nasir El-Rufai bai sha’awar yin aiki da Bola Ahmed Tinubu bayan abin da ya faru a wajen tantance wadanda ake so su zama ministoci a kasar nan.
Asali: Legit.ng
