Dan Takarar Gwamnan APC Ya Bayyana Yadda Aka Yi Masa Butulci Domin Tinubu Ya Lashe Zaben Shugaban Kasa

• Ɗan takarar gwamnan jam'iyyar All Progressives Congress (APC) a jihar Oyo, Tesli m Folarin ya bayyana yadda zaɓen Tinubu ya shafe shi
• Folarin ya ce ya faɗi zaɓen gwamnan jihar ne saboda butulcin da aka yi masa domin Shugaba Tinubu ya lashe zaɓen shugaban ƙasa
• Folarin ya yi rashin nasara ne a hannun gwamna Seyi Makinde wanda yana cikin ƴan G-5 waɗanda suka marawa Tinubu baya a lokacin zaɓe

Jihar Oyo - Ɗan takarar gwamnan jihar Oyo a ƙarƙashin inuwar jam'iyyar All Progressives Congress (APC) a zaɓen ranar 18 ga watan Mayu, Sanata Teslim Folarin, ya bayyana cewa butulci aka yi masa.

Folarin ya ce an yi masa butulcin ne a cikin ƙulla-ƙullar da aka kitsa domin jam'iyyar APC ta yi nasara a zaɓen shugaban ƙasa na ranar 25 ga watan Fabrairun 2023, Daily Trust ta yi rahoto.

Kara karanta wannan

Wane Hukunci Aka Ɗauka Kan Kwamishinan Zaben Adamawa Hudu Ari? INEC Ta Fallasa Gaskiya

Shugaban ƙasa Bola Ahmed Tinubu, wanda ya yi takara a zaɓen a ƙarƙashin inuwar jam'iyyar APC, shi ne wanda ya yi nasara a zaɓen.

Jam'iyyar APC ce mafi girma a jihar Oyo, Folarin

Folarin ya bayyana cewa jam'iyyar APC ita ce jam'iyya mafi girma a jihar, domin ta lashe kujerun Sanatoci uku da kujerun ƴan majalisar wakilai tara cikin 14 da ake da su a jihar, cewar rahoton Tribune.

Ɗan takarar gwamnan ya bayyana hakan ne a Idigbaro cikin yankin Ologuneru a birnin Ibadan, lokacin da yake jawabi ga magoya bayan jam'iyyar a wajen liyafar murna da aka shirya domin Hon. Remi Abasi Oseni, ɗan majalisa mai wakiltar Ibarapa/Ido a majalisar wakilai.

A kalamansa:

"Idan muna maganar jam'iyyar da ta fi girma a jihar Oyo a yau, jam'iyyar APC ce. Mun lashe kujerun Sanatoci uku, kujeru tara na ƴan majalisun wakilai. Za mu ƙara lashe wasu kujerun majalisar guda biyu saboda mutanenmu suna kotu. A ɓangaren zaɓen gwamna kuwa, butulci aka yi mana."

Kara karanta wannan

Ministocin Tinubu: Jigon APC Ya Musanta Zargin Ba Wa Gbajabiamila Cin Hanci Don A Bashi Mukami

Ya kuma yi kira ga ƴan Najeriya da suka ƙara haƙuri kan tsare-tsaren da Shugaba Tinubu ya fito da su, inda ya ce ya yi hakan ne domin ceto ƙasar nan daga halin da ta tsinci kanta a ciki.

Ba Zan Daina Ziyartar Shugaba Tinubu Ba, Gwamna Makinde

A wani labarin kuma, gwamnan jihar Oyo, Seyi Makinde ya bayyana cewa ba za a daina ganinsa a Villa ba kai ziyara wajen Shugaba Tinubu.

Makinde ya ce zai ci gaba da zuwa wajen Shugaba Tinubu har sai ya samowa jiharsa abinda ya je nema a wajen shugaban ƙasan.

Asali: Legit.ng