Yadda Sowore Ya Kusa Yin Fada da Hamza Al-Mustafa da Kashim Shettima a Taro

• ‘Dan takarar shugaban kasa a inuwar African Action Congress ya yi takaddama da takwarorinsa na 2023 a taro
• Omoyele Sowore ya yi cacar baki da Kashim Shettima da ya halarci taron sa hannu a yarjejeniyar zaman lafiya
• An ji Sowore yana surutu da Manjo Hamza Al-Mustapha wanda shi ma yake neman takarar shugaban kasa

Abuja - An yi ‘yar karamar hayaniya a lokacin da ‘yan takarar shugaban kasa suka je sa hannu a yarjejeniyar zaman lafiya a zaben da za ayi a 2023.

Rikici ya nemi ya kaure ne yayin da Kashim Shettima ya zauna a kujerar da aka warewa ‘dan takarar shugaban kasa, alhali shi abokin takara ne.

Ganin Sanata Kashim Shettima a sahun gaba bai yi wa Yele Sowore dadi ba, hakan ta sa ya kalubalanci ‘dan takaran mataimakin shugaban kasar.

Kara karanta wannan

Zaben 2023: Tinubu ya ce zai ba 'yan Najeriya mamaki, zai sauya makomar Najeriya

Yayin da shi Sowore ya samu kansa a kujerar baya, shi kuwa Shettima ya samu kujera a gaba, yana mai wakiltar ‘dan takaran APC, Bola Tinubu.

‘Dan gwagwarmayar yana ganin bai kamata tsohon gwamnan na Borno ya zauna a gaban shi ba domin kuwa Tinubu ne yake rike da tutar APC.

A wani bidiyo da Sowore ya wallafa a shafinsa, an ji yana cewa bai dace Tinubu ya rika neman takarar shugaban kasa ta hanyar aiko wakilci ba.

Meya kai Shettima sahun gaba?

“Wannan bai nufin ba zan cigaba da magana ba, wannan shi ne matsaya ta a kan zamansa a gaba. Na tunkare shi, nace meyasa yake zama a nan tun da Tinubu ba ya nan.”

“Da ni na ke zauna a can, ba zan tashi ba saboda Tinubu ya kamata ya zauna a wurin, ba shi (Shettima) ba. Ba zai yiwu ka rika takara alhali ba ka nan ba.”

Kara karanta wannan

2023: Nasihar da Shugaba Buhari Ya Yi Wa Yan Takarar Shugaban Kasa 18 a Wurin Taron Abuja

- Omoyele Sowore

Sai kuma Manjo Hamza Al-Mustapha

Ana gama wannan sai ga ‘dan takara na AAC yana cacar baki da Manjo Hamza Al-Mustapha mai ritaya wanda ya yi aiki da Marigayi Janar Sani Abacha.

Hamza Al-Mustapha ya fadawa Sowore cewa akwai bambanci a tsakaninsu, inda tsohon ‘dan jaridar yake cewa shi ne wanda ya tsaya a kan gaskiya.

Sowore ya fadawa tsohon sojan cewa a lokacin da shi da Janar Abacha suke ta’adi, shi kuma a matsayin jagoran dalibai, ya tsayawa hakkin al’umma.

Meyasa Tinubu ya tafi Landan?

A ranar Juma’a aka ji labari Ayo Oyalowo yace Bola Tinubu ya bar Najeriya ne da nufin ya samu lokacin hutu, domin a Legas da Abuja, ba zai sarara ba.

Daya daga cikin ‘yan kwamitin yakin neman zaben APC a 2023 yace ‘dan takaran na su yana aikin awanni 20 a kullum yaumin, don haka dole ne ya huta.

Kara karanta wannan

2023: Tinubu Ba Zai Samu Damar Sa Hannu Kan Wata Muhimmiyar Takarda ba

Asali: Legit.ng