2023: Na-hannun daman babban Ministan Buhari yana yi wa PDP aiki a maimakon APC

• Kayode Ogunlowo wanda yana cikin Hadimai kuma na-kusa da Lai Mohammed, bai tare da APC a Kwara
• ‘Dan siyasar zai marawa ‘Dan takaran PDP baya a zaben Gwamna, a maimakon ya goyi bayan jam'iyyar APC
• Ogunlowo ya nuna cewa Bukola Saraki ya canza, hakan ta sa aka gan shi wajen taro a gidan jigon na PDP

Kwara - Daya daga cikin manyan magoya bayan Ministan yada labarai da al’adu, Kayode Ogunlowo, ya ce shi jam’iyyar PDP yake yi wa aiki.

Daily Trust ta rahoto Kayode Ogunlowo yana cewa yana goyon bayan ‘dan takarar gwamnan da PDP ta tsaida ne a jihar Kwara a zabe mai zuwa.

Ogunlowo ya yi wannan bayani da ya halarci wani taro da Bukola Saraki ya kira a gidansa da ke titin Broadway da ke GRA, Ilorin, a jihar Kwara.

Kara karanta wannan

Daga komawa Jam’iyyar APC, Orubebe ya samu mukami mai tsoka a zaben 2023

Mista Ogunlowo ‘dan jam’iyyar APC ne, kuma Hadimin Ministan tarayya, Lai Mohammed, amma sai ga shi a wajen taron ‘Yan PDP a Kwara.

Da yake magana da 'yan jarida, Ogunlowo ya bayyana cewa Alhaji Shuaib Yamman yake yi wa aiki tun da ya zama ‘dan takaran Gwamna na PDP.

Ina tare da Lai amma da sake - Ogunlowo

‘Dan siyasar yake cewa bai rabu da Magidansa da jam’iyyar APC ba, amma abubuwa sun canza.

A zaben gwamna da za ayi a 2023, na-kusa da Ministan ya ce babu wanda zai iya doke APC illa jam’iyyar PDP, don haka ya yi tarayya da Saraki.

“Ban yi watsi da Alhaji Lai Mohammed, na komawa Saraki ba. Jagora na ne, kuma har yanzu shugaba yake a wuri na, amma halin da Kwara ta ke ciki ya canza.”

Kara karanta wannan

Jigon Jam’iyya ya ce ba zai taba-goyon bayan ‘Dan takaran da APC ta tsaida ba

“Abin da ya sa na tafi wancan bangare shi ne Yamman mutum ne wanda na yi aiki da shi a lokacin mu na jam’iyyar APC, na yi mamaki da ya samu tikiti (a PDP).”

Bukola Saraki ya canza salon siyasar

“Ba mu taba tunanin hakan za ta faru ba. Wannan ya nuna cewa Bukola Saraki ya canza. Kuma Yammana ya gayyace ni domin mu zo, mu yi aiki tare da shi.”

“Lissafin da ake yi shi ne yanzu APC ta rabu, PDP ce kadai jam’iyyar da ta ke da mutanen da za su iya tunkarar ta, ba kamar SDP da har yanzu fama ta ke yi ba.”

Takaran APC a Sokoto

An samu rahoto ‘Dan takarar Gwamna a Sokoto, Ahmed Aliyu ya dauki Idris Muhammad Gobir ya zama ‘Dan takarar Mataimakin Gwamna.

Baya ga Digiri shi da yake da su, Idris Gobir ya yi aiki Gwamnati, da a ofishin Minista, kuma tsohon Kwamishina ne, har Kantoma ya rike a jihar Sokoto.

Kara karanta wannan

Shettima: Tsohon ‘Dan takarar Gwamna ya bar APC, yana neman kawo cikas

Asali: Legit.ng